គម្រោងជួសជុលផ្លូវដីសក្រាលគ្រួសធម្មជាតិចំនួន ២ខ្សែ ស្ថិតក្នុងឃុំតាអាន និងឃុំចន្លាស់ដៃ នៃស្រុកក្រឡាញ់ ខេត្តសៀមរាប ដែលជាការចំណាយរបស់គម្រោងមូលនិធិឃុំឆ្នាំ២០២៣ ត្រូវបានប្រកាសបញ្ចប់ការដេញថ្លៃជាស្ថាពរ នៅព្រឹកថ្ងៃទី១១ ខែកញ្ញា ឆ្នាំ២០២៣នេះ ដោយមានការចូលរួមពី អភិបាលរង នៃគណ:អភិបាលស្រុកក្រឡាញ់ មន្ត្រីបច្ចេកទេសសាលាខេត្ត មន្ត្រីបច្ចេកទេសស្រុក គណ:កម្មការលទ្ធកម្មឃុំ អ្នកសារព័ត៌មាន រួមនឹងតំណាងក្រុមហ៊ុនដេញថ្លៃផងដែរ។
បើតាមប្រធានគណ:កម្មការលទ្ធកម្មឃុំតាអាន បានឲ្យដឹងថា គម្រោងដែលបានបើកការដេញថ្លៃថ្ងៃនេះ ជាគម្រោងជួសជុលផ្លូវដីសក្រាលក្រួសធម្មជាតិប្រវែង ៣០០ម៉ែត្រ ទទឹងក្រួស៤,៥០ម៉ែត្រ កម្រាស់ក្រួស០,១៥ម៉ែត្រ និងដាក់ស្លាកសញ្ញា គម្រោងចំនួន០១កន្លែង ក្នុងតម្លៃប៉ាន់ស្មាន ២៤,៧៧០,០៣០រៀល ដោយលទ្ធផលបានទៅលើក្រុមហ៊ុន លាំ សោភ័ណ្ឌ ដេញថ្លៃបានក្នុងតម្លៃ ២៣,៥០០,០០០រៀល។
ព័ត៌មានជាតិ ថ្មីៗ
ដោយឡែកគណ:កម្មការលទ្ធកម្មឃុំចន្លាស់ដៃ បានបើកការដេញថ្លៃគម្រោងជួសជុលផ្លូវដីសក្រាលក្រួសធម្មជាតិ ចំនួន ៣ខ្សែ ប្រវែង១,៣០០ម៉ែត្រ ទទឹង ៤,៥ម៉ែត្រ កម្រាស់០,១៥ម៉ែត្រ និងលូកាត់ផ្លូវចំនួន ២កន្លែង និងដាក់ស្លាកសញ្ញាគម្រោងចំនួន៣ ក្នុងតម្លៃប៉ាន់ស្មាន១០៨,១៨៤,៦៣៣រៀល ជាលទ្ធផលបានទៅលើក្រុមហ៊ុន វឿង សុម៉េង ដេញថ្លៃបានក្នុងតម្លៃ ១០៥,៨០០,០០០រៀល។
ជាមួយគ្នានោះ ក្រុមហ៊ុនដែលទទួលបានការម៉ៅការគម្រោងផ្លូវទាំងពីរខាងលើ បានធ្វើការប្ដេជ្ញាចិត្តដោយសន្យាថា ធ្វើឲ្យបានត្រឹមត្រូវស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដូចមាន ចែងនៅក្នុងកិច្ចសន្យា ជាពិសេសសហការជាមួយអាជ្ញាធរមូលដ្ឋានឲ្យបានល្អប្រសើរ ប្រកបដោយគុណភាព តម្លាភាព គណនេយ្យភាព និងសម្រេចបានជោគជ័យ៕
អត្ថបទ និងរូបភាព: លោកធន់ ពូថេ កែសម្រួលដោយ លីវ សុខុន!!!
