លោក អៀង ពិសិដ្ឋ អភិបាលស្រុកស្វាយលើ មានប្រសាសន៍ថា ស្វាយលើ ជាស្រុកមួយស្ថិតនៅតំបន់ឦសាននៃខេត្តសៀមរាប ដែលកាលពីមុន បើយើងនិយាយពីស្រុកមួយនេះ គេតែងនឹកស្រមៃថា ទីនេះជាតំបន់ដែលដាច់ស្រយាល និងជាទឹកដីនៃសមរភូមិក្តៅក្នុងអំឡុងដែលកម្ពុជាកើតមានសង្គ្រាមស៊ីវិល ប៉ុន្តែមកដល់ពេលនេះ ស្រុកស្វាយលើ បានប្រែមុខមាត់ថ្មី នឹងក្លាយជាទឹកដីមាសបៃតងមួយទៀតរបស់ខេត្តសៀមរាប ។
លោក អៀង ពិសិដ្ឋ បន្តថា ចាប់តាំងពីបញ្ចប់សង្គ្រាមស៊ីវិលនៅឆ្នាំ១៩៩៨ ក្រោមនយោបាយឈ្នះឈ្នះ និងការអនុវត្តយុទ្ធសាស្រ្តនយោបាយចតុកោណរបស់រាជរដ្ឋាភិបាលកម្ពុជា ដែលដឹកនាំដោយសម្តេចតេជោ ហ៊ុន សែន បានធ្វើឲ្យកម្ពុជាមានការអភិវឌ្ឈ រីកចម្រើន គ្រប់វិស័យ។ ក្នុងនោះស្រុកស្វាយលើ មានឱកាសប្រែក្លាយខ្លួនធ្លាប់ជាតំបន់សង្គ្រាម ទៅជាតំបន់ដែលមានសក្តានុពលលើផ្នែកកសិកម្ម ពិសេសផ្នែកដំណាំដំឡូងមី និងស្វាយចន្ទី ហើយសម្រាប់វិស័យទេសចរណ៍ គឺមានសក្ដានុពលសំខាន់ផងដែរ ដោយស្រុកជាប់នឹងភ្នំគូលែន ពញរមទាំងមានប្រាសាទបេងមាលាដ៏ស្រស់ស្អាត មានរមណីយដ្ឋានទេសចរណ៍ដ៏សំបូរបែប នៅលើភ្នំគូលែន ក៏បានក្លាយទៅជាគោលដៅទេសចរណ៍ដ៏សំខាន់មួយ ។
លោកអភិបាលស្រុកស្វាយលើ បានអះអាងថា ដោយសារសកត្តានុពលទាំងអស់នេះ បានធ្វើឲ្យវិស័យឯកជនធ្វើការវិនិយោគជាមួយធនធានធម្មជាតិនៅស្រុកស្វាយលើ ដែលជាក់ស្តែងថ្មីៗនេះ ស្រុកបានទទួលការចូលរួមវិនិយោគលើវិស័យទេសចរណ៍ពីផ្នែកឯកជនដ៏ធំចំនួន២ មួយគឺស្ពានពស់ និងមួយទៀត ឈ្មោះធិសក្ត័រីសត ដែលការវិយោគនេះ បានជំរុញកំណើនការងារ និងសេដ្ឋកិច្ចពលរដ្ឋក្នុងតំបន់នេះបានយ៉ាងប្រសើរ ។
លោក វីរៈ ដែលជាជំនួយការរបស់ម្ចាស់រមណីយដ្ឋាន ធិសក្ត័ បានឲ្យដឹងថា ការរជ្រើសរើសយកទីតាំងជើងភ្នំគូលែននេះ សម្រាប់បង្កើតជារមណីដ្ឋាននេះ ព្រោះវាជាចំណុចកណ្តាលមួយដែលអាចឲ្យយើងបង្កើតជាខ្សែទស្សនាមួយបន្ថែមទៀតក្នុងការទាក់ទាញអ្នកទេសចរ ទាំងជាតិនិងអន្តរជាតិ ឲ្យមកទទួលយកនូវបទពិសោធន៍នៃដំណើរកម្សាន្តថ្មីមួយ ហើយប្រសិនបើអ្នកទេសចរណ៍គាត់មានពេលខ្លី ចង់ដើរកម្សាន្តច្រើនទីតាំងនោះ ពួកគាត់អាចជ្រើសរើសយកស្រុកស្វាយលើជាគោលដៅទេសចរណ៍បាន ដោយពួកគាត់អាចធ្វើដំណើរចូលមកកម្សាន្តនៅប្រាសាទបឹងមាលា រួចអាចមកទទួលទានអាហារថ្ងៃត្រង់នៅរមណីយដ្ឋានធីសក្ត័ អាចដើរលេងមើលទេសភាពនៅក្នុងរមណីយដ្ឋាន និងទៅទស្សនានៅពើងគំនូរនៅជើងភ្នំគូលែន។
លោកវីរៈ បន្តថា ជាមួយគ្នានេះ ខាងរមណីយដ្ឋានក៏មានរៀបចំសេវាស្នាក់នៅ តាមបែបទំនើបសម្រាបអ្នកទេសចរដែលមានបំណង់ចង់ស្នាក់នៅទីផ្ទាល់ ដែលការស្នាក់នៅនេះ ក៏បានបង្កលក្ខណៈងាយស្រួលដល់អ្នកទេសចរ ដោយពួកគាត់អាចគន់ទេសភាពដ៏ស្រស់ស្អាត មើលមេឃចុះអ័ព្ទនាពេលព្រលឹមយ៉ាងស្រស់ស្រាយ។ ហើយបន្ទាប់មកពួកគាត់អាចបន្តដំណើរកម្សាន្តរបស់ពួកគាត់ នៅលើភ្នំគូលែន តាមផ្លូវបេតុងដែលទើបស្ថាបនាថ្មី ឬក៏អាចបន្តទៅកម្សាន្តនៅប្រាសាទកោះកែរក៏បាន។
ក្នុងឱកាសនោះដែរលោកអភិបាលស្រុកស្វាយលើ បានអះអាងថា ការចូលរួមរបស់វិស័យឯកជន ពិតជាមានសារៈសំខាន់ណាស់ ហើយក្នុងនាមអាជ្ញាធរស្រុក ក៏ដូចជាថ្នាក់មូលដ្ឋាន តែងតែគាំទ្រជានិច្ចចំពោះការវិនិយោគរបស់វិស័យឯកជន ហើយលោកជឿជាក់ថា ជាមួយនឹងយុទ្ធសាស្ត្របញ្ចកោណរបស់រាជរដ្ឋាភិបាល ដែលដឹកនាំដោយសម្តេចធិបតី ហ៊ុន ម៉ាណែត នឹងជំរុញកំណើនសេដ្ឋកិច្ចកម្ពុជាកាន់តែរីកចម្រើន និងអភិវឌ្ឍន៍គ្រប់វិស័យ ក្នុងនោះស្រុកស្វាយលើ នៃខេត្តសៀមរាប ក៏នឹងទទួលបាននូវសមិទ្ធិផលថ្មីៗបន្ថែមទៀត ពីការរីកចម្រើន និងសុខសន្តិភាពនេះ៕
អត្ថបទ និងរូបភាព៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
