ថ្លែងក្នុងកិច្ចប្រជុំដើមី្បពិភាក្សា និងប្រមូលទិន្នន័យព័ត៌មាន អំពីការងារសន្តិសុខ សណ្តាប់ធ្នាប់ និងការរស់នៅក្នុងចម្ការលោក ខឹម វាសនា ប្រធានគណៈបក្សសម្ព័ន្ធដើម្បីប្រជាធិបតេយ្យ ក្បែរជើងភ្នំគូលែន នាព្រឹកថ្ងៃទី១២ ខែកញ្ញា ឆ្នាំ២០២៣នេះ លោក នាក់ ណេរ៉ុន អភិបាលរងខេត្ត បានណែនាំដល់អាជ្ញាធរស្រុក កងកម្លាំងសមត្ថកិច្ច និងមន្ទីរអង្គភាពពាកព័ន្ឋនានា ត្រូវបន្តជាប្រចាំក្តាប់សភាពការណ៍ ស្ថានភាពការជួបជុំប្រមូលផ្តុំ តែចំពោះការជួបជុំគ្មានសុំការអនុញ្ញាតិពីអាជ្ញាធរនោះ គឺដាច់ខាតមិនឲ្យមានការប្រមូលផ្តុំនេះឡើយ បើការជួបជុំប្រមូលផ្តុំពុំមានការអនុញ្ញាតិពីអាជ្ញាធរដែនដីទេ កម្លាំងសមត្ថកិច្ចត្រូវអនុវត្តតាមផ្លូវច្បាប់។
លោក នាក់ ណេរ៉ុន មានប្រសាសន៍ថា ជារួមទោះជាស្ថានភាព និងសភាពការណ៍នានាដំណើរការបានល្អប្រសើរក្តី ក៏កងកម្លាំងសមត្ថកិច្ចគ្រប់អង្គភាពបានអនុវត្តម៉ឺងម៉ាត់តាមបទបញ្ជាគណៈបញ្ជាការឯកភាពរដ្ឋបាលខេត្ត ដាក់ពង្រាយតាមគោលដៅ ដើម្បីរក្សាការពារសន្តិសុខសណ្តាប់ធ្នាប់២៤ម៉ងលើ២៤ម៉ោង ជាមួយគ្នានេះ គណៈបញ្ជាការឯកភាពរដ្ឋបាលក្រុងស្រុក និងកម្លាំងមានសមត្ថកិច្ចនៅតែបន្តពង្រឹង និងការពារសន្តិសុខ សណ្តាប់ធ្នាប់ទូទៅក្នុងខេត្តជាប្រចាំ ជាពិសេសតាមទីផ្សារ ទីប្រជុំជន និងតំបន់រមណីយដ្ឋាននានា។
ព័ត៌មានជាតិ ថ្មីៗ
លោកអភិបាលរងខេត្ត ក៏បានណែនាំបន្ថែមពីនេះ ដល់អាជ្ញាធរស្រុកពាក់ព័ន្ឋត្រូវប្រមូលឯកសារ និងសម្រង់ទិន្នន័យព័ត៌មាន និងក្តាប់សភាពការណ៍ឱ្យបានជាប្រចាំនៅចំណុចចំការរបស់លោក ខឹម វាសនា នូវរាល់សកម្មភាពនៃការចេញចូលរបស់គ្រួសារ និងសកម្មជនទាំងនោះ ទៅលើជីវភាពរស់នៅប្រចាំថ្ងៃ ការសិក្សារបស់កុមារតូចៗ ការស្វែងរកសេវាព្យាបាលជំងឺជាដើម ដោយវាយតម្លៃសន្និដ្ឋានត្រៀមជាមុនដើម្បីឆ្លើយតបបានលឿនទាន់ពេលសម្រាប់ជូនថ្នាក់ដឹកនាំ។
បើតាមសមត្ថកិច្ច និងអាជ្ញាធរមូលដ្ឋាន បានឲ្យដឹងថា ក្រោយការបោះឆ្នោតជ្រើសតាំងតំណាងរាស្ត្រ នីតិកាលទី៧ ក្រុមអ្នកគាំទ្រ និងសកម្មជន គណៈបក្សសម្ព័ន្ធដើម្បីប្រជាធិបតេយ្យ បានធ្វើសកម្មភាពក្នុងការប្រមូលផ្តុំគ្នានៅក្នុងភូមិសាស្ត្រ ភូមិរលួសខាងលិច ឃុំរលួស ស្រុកប្រាសាទបាគង ដោយពុំបានធ្វើការស្នើសុំច្បាប់អនុញ្ញាតិពីថ្នាក់មូលដ្ឋានឡើយ ដោយក្នុងមួយសប្តាហ៍ មកជួបជុំគ្នា៤ដង ដែលសកម្មភាពទាំងនេះ បានបង្កនូវភាពអាណាធិបតេយ្យ ភាពអសន្តិសុខនៅ ក្នុងមូលដ្ឋាន និងសង្គម ដូចគ្នានឹងការប្រមូលផ្តុំនៅចំណុចចំការ របស់លោក ខឹម វាសនា កន្លងមកដែរ៕
អត្ថបទ និងរូបភាព៖ លោក យូ វង្ស, ម៉ី សុខារិទ្ធ
កែសម្រួល៖ លោក អ៊ុន ណារាជ្យ
