ប្រជាពលរដ្ឋជាច្រើនគ្រួសាររស់នៅក្នុងឃុំប្រាសាទ ស្រុកវ៉ារិន ខេត្តសៀមរាប បានសម្ដែងការរីករាយ ជឿជាក់ថាផ្លូវបេតុងថ្មីមួយខ្សែទៀត មានប្រវែង ១៧០ម៉ែត្រ ដែលអាជ្ញាធរគ្រោងនឹងស្ថាបនានាពេលខាងមុខ នឹងជួយដល់ការងារប្រចាំថ្ងៃរបស់ប្រជាពលរដ្ឋក្នុងមូលដ្ឋាន ខណៈដែលផ្លូវនេះបានដាក់ដេញថ្លៃរកក្រុមហ៊ុនទទួលម៉ៅការសាងសង់ បានប្រកាសបញ្ចប់ការដេញថ្លៃជាស្ថាពរ នៅថ្ងៃទី១៣ ខែកញ្ញា ឆ្នាំ២០២៣នេះ។
ប្រជាពលរដ្ឋក្នុងមូលដ្ឋានខាងលើបានលើកឡើងថា ផ្លូវមួយខ្សែនេះមានភាពលំបាកខ្លាំង ពិបាកក្នុងការធ្វើដំណើរពេលយប់។ មួយវិញទៀតសម្រាប់ធ្វើដំណើរ ទៅរកសេវាសាធារណៈផ្សេងៗ នៅសាលាស្រុក និងអធិការស្រុកវ៉ានរិន សិស្សមួយចំនួនក៏ធ្វើដំណើរតាមផ្លូវនេះផងដែល។ ពួកគាត់ក៏បានសម្ដែងសប្បាយរីករាយ ចំពោះសមិទ្ធផលថ្មីនេះ ក្រោយសាងសង់រួចរាល់នឹងជួយសម្រួលការធ្វើដំណើររបស់ពួកគាត់ងាយស្រួលជាងមុន ជាពិសេសបានជួយលើកស្ទួយកម្ពស់ជីវភាពរបស់ពលរដ្ឋនៅតំបន់នេះផងដែរ ។ក្នុងនោះដែរពួកគាត់បានថ្លែងអំណរគុណដល់រាជរដ្ឋាភិបាល ដែលបានខិតខំអភិវឌ្ឍន៍ហេដ្ឋារចនាសម្ព័ន្ធ ឱ្យក្លាយជាទីរស់នៅដ៍ល្អរបស់ប្រជាពលរដ្ឋ។
អ្នកស្រី ព្រិន ហោន ប្រធានគណៈកម្មការលទ្ធកម្មឃុំប្រាសាទ បានឲ្យដឹងថា គណៈកម្មការលទ្ធកម្មឃុំបានដាក់ដេញថ្លៃគម្រោងសាងសង់ផ្លូវបេតុងអាមេចំនួន ១ខ្សែ ស្ថិតភូមិទំនាបស្វាយ ឃុំប្រាសាទ ស្រុកវ៉ារិន មានប្រវែង១៧០ម៉ែត្រ ទទឹង ៥.៥ម៉ែត្រ កម្រាស់បេតុង ០.១៥ម៉ែត្រ ដាក់លូការពារផ្លូវមុខកាត់០.៨ម៉ែត្រ ចំនួន៤កង់ និងស្លាកសញ្ញាគម្រោងចំនួន១កន្លែង ក្នុងតំលៃប៉ាន់ស្មាន១១៤,៧២៨,២៤០ រៀល តភ្ជាប់ពីផ្លូវបេតុងមួយខ្សែទៀត ប្រវែង៦០០ម៉ែត្រដែលសាងសង់ដោយមូលនិធិឃុំឆ្នាំ២០២១។ ប្រធានគណៈកម្មការ បន្តថាសម្រាប់ឆ្នាំ២០២៤ខាងមុខ ខាងសាលាស្រុកនឹងធ្វើផ្លូវនេះបន្តទៀត ព្រោះផ្លូវនេះមានប្រជាពលរដ្ឋធ្វើដំណើឆ្លងកាត់ជាង ២ពាន់គ្រួសារ ។
ព័ត៌មានជាតិ ថ្មីៗ
ជាមួយគ្នានោះ ក្រុមហ៊ុន មិញ អ៊ា ដែលដេញថ្លៃបាន ក្នុងតម្លៃ ៦០,៥៨៨,០០០រៀល លើការសាងសង់ផ្លូវបេតុងមួយខ្សែនេះ បានធ្វើការប្ដេជ្ញាចិត្តដោយសន្យាថា ធ្វើឲ្យបានត្រឹមត្រូវស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដូចមាន ចែងនៅក្នុងកិច្ចសន្យា ជាពិសេសសហការជាមួយអាជ្ញាធរមូលដ្ឋានឲ្យបានល្អប្រសើរ ប្រកបដោយគុណភាព តម្លាភាព គណនេយ្យភាព និងសម្រេចបានជោគជ័យ៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
