រាជរដ្ឋាភិបាលកម្ពុជា នីតិកាលទី៧ បានដាក់ចេញនូវគោលនយោបាយបណ្តុះបណ្តាលជំនាញវិជ្ជាជីវៈ និងបច្ចេកទេស ជូនដល់យុវជនមកពីគ្រួសារក្រីក្រ និងងាយរងហានិភ័យនៅទូទាំងប្រទេស នៅតាមបណ្តាគ្រឹះស្ថានបណ្តុះបណ្តាលវិជ្ជាជីវៈនានារបស់រដ្ឋ ក្នុងកម្រិតសញ្ញាបត្របច្ចេកទេស និងវិជ្ជាជីវៈកម្រិត១ ដោយមិនគិតថ្លៃ។
យុវនារី យិន ចន្ធា ជាសិស្សនៃវិទ្យាស្ថានជាតិពហុបច្ចេកទេសអង្គរ ខេត្ដសៀមរាប បានបង្ហាញក្ដីរីករាយដែលរារដ្ឋាភិបាលកម្ពុជា បានគិតគូរពីប្រជាពលរដ្ឋក្រីក្រ តាមរយៈការផ្ដល់ជំនាញវិជ្ជាជីវៈដោយឥតគិតថ្លៃ ដោយសារសិស្សនិស្សិតមួយចំនួនមានជីវភាពខ្វះខាត ហើយពួកគាត់គ្មានលទ្ធភាពបន្ដការសិក្សាថ្នាក់ខ្ពស់។ ហើយរាជរដ្ឋាភិបាលផ្ដល់ឱ្យកាសដល់យុវជនឱ្យរៀនជំនាញវិជ្ជាជីវៈបែបនេះ នឹងធ្វើឱ្យពួកគាត់មានជំនាញមួយច្បាស់លាស់ទៅថ្ងៃអនាគត។
ជាសិស្សនៅវិទ្យាស្ថានជាតិពហុបច្ចេកទេសអង្គរ ដូចគ្នា យុវជន ទី សុផាន់ បានលើកឡើងថា យុវជនដែលរៀនមិនទាន់ចប់ថ្នាក់ទី១២ ឬប្រលងធ្លាក់ ក៏អាចចាប់យកជំនាញនៅសាលានេះបានដែរ ព្រោះការបណ្ដាលជំនាញវិជ្ជាជីវៈរបស់រដ្ឋនោះ មានជំនាញមានទាំងវគ្គសិក្សាខ្លី និងរយៈពេលវែងផងដែរ។ យុវជនរូបនេះបន្ដថា ជំនាញដែលបានបណ្ដុះបណ្ដាលមានសារៈសំខាន់ខ្លាំងណាស់ សម្រាប់គ្រួសារនិងខ្លួនឯងទៅថ្ងៃអនាគត។ក្រុមសិក្ខាកាមចង់ឱ្យយុវជនទាំងអស់ដែលគ្មានលទ្ធភាពទៅសិក្សាយកជំនាញមួយប្រចាំជីវិតខ្លួនឯង។
បើតាមលោក ម៉ប់ ស៊ីនួន នាយកវិទ្យាស្ថានជាតិពហុបច្ចេកទេសអង្គរ បានឱ្យដឹងថា ការបណ្ដុះបណ្ដាលនៅវិទ្យាស្ថានជាតិពហុបច្ចេកទេសអង្គរ មានទាំងទ្រឹស្ដី និងការអនុវត្ដ ហើយសិក្ខាកាមដែលមកពីគ្រួសារក្រីក្រ វិទ្យាស្ថានក៏បានផ្ដល់ទាំងកន្លែងស្នាក់នៅដោយមិនគិតថ្លៃផងដែរ។ ក្នុងនោះជំនាញដែលនឹងត្រូវបណ្ដុះបណ្ដាល មានកម្រិតសញ្ញាបត្របច្ចេកទេស និងវិជ្ជាជីវៈ ដល់កម្រិតបរិញ្ញាបត្របច្ចេកវិទ្យាលើមុខរបរ និងជំនាញ រួមមាន ការថែទាំ និងជួសជុលអគ្គិសនីរថយន្ត ការថែទាំ និងជួសជុលរថយន្ត ការថែទាំ និងជួសជុលម៉ាស៊ីនត្រជាក់រថយន្ត ការដំឡើងបណ្តាញអគ្គិសនីក្នុងអគារ សេវាកម្មបរិក្ខារត្រជាក់ក្នុងគេហដ្ឋាន ការិយាល័យជួរមុខ ការងារកំបោរ ការដំឡើងបណ្តាញបំពង់ទឹក សេវាកម្មកុំព្យូទ័រ វិស្វកម្មរថយន្ត វិស្វកម្មអេឡិចត្រូនិក ព័ត៌មានវិទ្យា វិស្វកម្មអគ្គិសនី វិស្វកម្មសំណង់ស៊ីវិល។ ជាមួយគ្នានោះ លោកនាយកបានអំពាវដល់យុវជនក្រីក្រ អ្នករត់ផាស់អាប់ អាចមកដាក់ពាក្យចូលវគ្គបណ្ដុះបណ្ដាលវគ្គខ្លីដោយមិនគិតថ្លៃនៅវិទ្យាស្ថានបាន ដោយក្រុមសិក្ខាកាមដែលបានចូលរៀន គឺអាចទៅប្រកបអាជីវកម្មបានយ៉ាងល្អប្រសើរនៅពេលបញ្ចប់ ហើយមិនខ្វះការងារធ្វើនោះទេ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
