ប្រជាពលរដ្ឋ និងអាជ្ញាធរមូលដ្ឋាន បានធ្វើអំពាវនាវដល់អ្នកបើកបរយានយន្តគ្រប់ប្រភេទ សូមបើកបរដោយស្មារតីប្រុងប្រយ័ត្ន យោគយល់ និងអធ្យាស្រ័យគ្នាទៅវិញទៅមក ជាពិសេសចូលរួមគោរពច្បាប់ចរាចរណ៍ឱ្យបានខ្ជាប់ខ្ជួនទាំងអស់គ្នា ចៀសវាងការបើកវ៉ាជែង បើកបរក្នុងស្ថានភាពស្រវឹងឬងងុយដេក និងបើស្រវឹងកុំបើកបរ។
លោក ញ៉ឹប សារ៉េត មេភូមិក្រសាំងរលើង សង្កាត់សៀមរាប បានឱ្យដឹងថា នៅតាមផ្លូវពីផ្លូវបំបែកផ្សារក្រោម ឆ្ពោះទៅភ្នំក្រោម រយៈពេល១ខែនេះ មានអ្នកស្លាប់ ៣នាក់ ដោយសារគ្រោះថ្នាក់ចរាចរណ៍។ ដោយយល់ឃើញថា កំណាត់ផ្លូវនេះមានគ្រោះថ្នាក់ចរាចរណ៍ញឹកញាប់ពេក កត្តាដែលបង្កឱ្យមានការស្លាប់ និងរងរបួសញឹកញាប់នេះ ដោយសារការបើកបរពេលយប់ក្នុងស្ថានភាពស្រវឹង ខ្វះការយោគយល់ និងផ្លូវនេះពុំទាន់មានគំនូសបែងចែកទ្រូងផ្លូវ ពិសេសនោះគ្មានភ្លើងបំភ្លឺ យប់ឡើងគឺងងឹតស្លុបតែម្តង។ ជាពិសេសនៅចំណុចផ្លូវប្រសព្វបែកជាបួននេះ ទើបបានសាងសង់ចាក់កៅស៊ូរួចរាល់ ប៉ុន្តែមានភាពងងឹតខ្លាំងនៅពេលយប់ ហើយបងប្អូនអ្នកទេសចរណ៍ជិតឆ្ងាយតែងតែនាំគ្នាធ្វើដំណើរតាមផ្លូវនេះទៅកំសាននៅតំបន់ភ្នំក្រោមនាវេលាបាក់រសៀលរហូតដល់យប់ ជាមួយគ្នានេះពេលថ្ងៃក៏មានរថយន្តដឹកដីធំៗបើកបរយ៉ាងគគ្រឹកគួរឱ្យបារម្ភ។
សូមជម្រាបថា លោកមេភូមិលើកឡើងបែបនេះ ក្នុងឱកាសប្រជាពលរដ្ឋនៃភូមិក្រសាំងរលើង សហការជាមួយអាជ្ញាធរ និងព្រះសង្ឃក្នុងសង្កាត់សៀមរាប ដឹកនាំដោយលោក ទូច ដារិទ្ឋ សមាជិកក្រុមប្រឹក្សាសង្កាត់ បាននិមន្តព្រះសង្ឃដើម្បីចម្រើនព្រះបរិត្ត សូត្រជយ័ន្តោ រំដោះគ្រោះ និងរម្ងាប់ឧបទ្រពចង្រៃតាមដងផ្លូវកៅស៊ូក្នុងមូលដ្ឋាន នៅព្រឹកថ្ងៃទី១៩ ខែកញ្ញា ឆ្នាំ២០២៣នេះ។
ក្នុងឱកាសនោះដែរ ព្រះគ្រូសង្ឃវិសុទ្ធិញាណ បិយធម្មោ ភ្លឿន រត្ន័ ព្រះគ្រូសូត្រស្តាំ វត្តអធ្វា មានថេរដីកាថា ការសូត្រមន្តចម្រើនព្រះបរិត្តនៅតាមដងផ្លូវនៅពេលនេះ គឺជាសារមួយជួយដាស់តឿនអ្នកប្រើប្រាស់ផ្លូវថ្នល់ឱ្យមានការប្រុងប្រយ័ត្នកុំឱ្យប៉ះពាល់ដល់អាយុជីវិត និងទ្រព្យអ្នកដទៃដោយសារតែការធ្វេសប្រហែស និងក៏ដើម្បីប្រោះព្រំ រម្ងាប់បង់នូវឧបទ្រុពចង្រៃទាំងឡាយដែលតែងតែមកយាយីជាប្រចាំ។ មួយវិញទៀតគឺឧទ្ទិសទៅដល់អ្នកដែលស្លាប់បាត់បង់ជីវិតដោយសារគ្រោះថ្នាក់ចរាចរណ៍នៅតាមដងវិថីនានាក្នុងរយៈកាលកន្លងទៅ និងសូមឱ្យវិញ្ញាណក្ខន្ធពួកគាត់ទៅកាន់សុគតិភពកុំបីឃ្លៀងឃ្លាតឡើយ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
