ថ្ងៃទី២២ ខែកញ្ញា ឆ្នាំ២០២៣នេះ ការដេញថ្លៃគម្រោងជួសជុលផ្លូវដីសក្រាលគ្រួសក្រហម ២ខ្សែ ក្នុងឃុំល្វែងឫស្សី ស្រុកជីក្រែង ខេត្តសៀមរាប បានបញ្ចប់ជាស្ថាពរ ដោយមានការចូលរួមពីអភិបាលរងស្រុកជីក្រែង មន្ត្រីបច្ចេកទេសសាលាខេត្ត មន្ត្រីបច្ចេកទេសស្រុក គណៈកម្មការលទ្ធកម្មឃុំ អ្នកសារព័ត៌មាន និងតំណាងក្រុមហ៊ុនដេញថ្លៃចំនួន ៤។
បើតាមលោក យុន ប្រុស ប្រធានគណៈកម្មការលទ្ធកម្មឃុំល្វែងឫស្សី បានឲ្យដឹងថាគណៈកម្មការលទ្ធកម្មឃុំ បានដាក់ដេញថ្លៃគម្រោងជួសជុលផ្លូវដីសក្រាលក្រួសក្រហមចំនួន០២ខ្សែ ដែលមានប្រវែងសរុប ១,៦៥០ម៉ែត្រ ទទឹង ៥ម៉ែត្រ ជើងទេផ្លូវ ១.៥ ម៉ែត្រ កម្រាស់គ្រួសក្រហម០.១៥ម៉ែត្រ និងមានដាក់លូការពារផ្លូវមុខកាត់០.៨ម៉ែត្រចំនួន៤កង់។ ក្នុងនោះ ក៏មានផងដែរនូវស្លាកសញ្ញាគម្រោង ចំនួន១។ ជាលទ្ធផលគម្រោងជួសជុលផ្លូវខាងលើនេះ ទទួលសាងសង់ដោយក្រុមហ៊ុន អ៊ឹង លីសួរ ដេញបានក្នុងតម្លៃ ១១៣ ៣៥០ ០០០រៀល។
ជាមួយគ្នានោះ ក្រុមហ៊ុនដែលទទួលបានការម៉ៅការគម្រោងផ្លូវខាងលើ បានធ្វើការប្ដេជ្ញាចិត្តដោយសន្យាថា ធ្វើឲ្យបានត្រឹមត្រូវស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដូចមាន ចែងនៅក្នុងកិច្ចសន្យា ជាពិសេសសហការជាមួយអាជ្ញាធរមូលដ្ឋាន៕
ព័ត៌មានជាតិ ថ្មីៗ
អត្ថបទ និងរូបភាព៖ លោក ធន់ ពូថេ
កែសម្រួល៖ លោក សេង ផល្លី
