ក្រុមអាជីវករ និងអ្នកផលិត ជាច្រើនបានអះអាងថា ការដាក់បង្ហាញផលិតផលនៅក្នុងការតាំងពិព័រណ៍ភូមិមួយផលិតផលមួយ ជាការផ្តល់ឱកាសដ៏ល្អមួយដល់ពួកគាត់បង្ហាញផលិតផលរបស់ខ្លួនទៅមហាជន និងអាចទាក់ទាញអ្នកប្រើប្រាស់នៅលើទីផ្សារកាន់តែច្រើន។
ក្រុមអាជីវករ បានឲ្យដឹងថា កន្លងមកពួកគាត់ធ្លាប់បានយកផលិតផលរបស់គាត់មកចូលរូមការតាំងពិព័រណ៍របស់គណៈកម្មាធិការជាតិភូមិមួយផលិតផលមួយដែរ ហើយការដាក់តាំងបង្ហាញនេះបានផ្តល់ឱកាសឲ្យប្រជាពលរដ្ឋខ្មែរ ក៏ដូចជាអ្នកទេសចរបរទេស បានស្គាល់កាន់តែច្បាស់អំពីផលិតផលសិល្បៈវប្បធម៌ខ្មែរ ។ វាបានផ្តល់ឱកាសឲ្យពលរដ្ឋបានឃើញថា យើងមានផលិតផលជាច្រើនដែលមានគុណភាពល្អ មិនចាញ់របស់បរទេស។ ពយកគាំត់ថា ផលិតផលចំណីអាហារខ្មែរភាគច្រើនមានគុណភាពខ្ពស់ និងមិនប៉ះពាល់ដល់សុខភាពអ្នកទទួលទាន ។ ដូច្នេះការរៀបចំឲ្យមានការតាំងពិព័រណ៍នេះ ក៏ផ្នែកមួយនៃការបង្ហាញផលិតផលខ្មែរ និងផ្សព្វផ្សាយឲ្យពួកគាត់បានដឹងនិងងាកមកប្រើប្រាស់ផលិតផលក្នុងស្រុក។
គួររំលឹកថា ពិព័រណ៍ផលិតផលក្នុងស្រុក ភូមិមួយ ផលិតផលមួយ បានប្រារព្ធធ្វើឡើងនៅសួនច្បារព្រះរាជដំណាក់ដងស្ទឹងសៀមរាប រយៈពេល៥ថ្ងៃ ដោយចាប់ផ្តើមកាលពីថ្ងៃទី២៦ ហើយនឹងបញ្ចប់នៅថ្ងៃទី៣០ ខែកញ្ញា ឆ្នាំ២០២៣នេះ ។
ព័ត៌មានជាតិ ថ្មីៗ
បើតាមឯកឧត្តម ផល សុជាតិ អគ្គលេខាធិការ នៃគណៈកម្មាធិការជាតិជំរុញចលនាភូមិមួយផលិតផលមួយ មានប្រសាសន៍ក្នុងពិធីបើកកម្មវិធីសម្ភោធពិព័រណ៍ផលិតផលក្នុងស្រុក ភូមិមួយ ផលិតផលមួយ ខេត្តសៀមរាប កាលពីល្ងាចថ្ងៃទី២៦ ខែកញ្ញា ឆ្នាំ២០២៣ ពិព័រណ៍ផលិតផលក្នុងស្រុក ភូមិមួយផលិតផលមួយ ខេត្តសៀមរាប ត្រូវបានរៀបចំឡើងក្នុងគោលបំណង ដើម្បីឱ្យ ទីផ្សារផលិតផលក្នុងស្រុក ព្រមទាំងការចងក្រងផលិតករ សេវាករ និងសិប្បករ នៅតាមមូលដ្ឋានឱ្យចូលជាសមាជិកចលនាភូមិមួយផលិតផលមួយ និងអង្គភាព-ស្ថាប័នពាក់ព័ន្ធ ដែលជាសមាជិកគណៈកម្មាធិការជាតិជំរុញចលនាភូមិមួយផលិតផលមួយ។ ឯកឧត្តមថា រហូតមកដល់ពេលនេះ គណៈកម្មាធិការជាតិជំរុញចលនាភូមិមួយផលិតផលមួយ ដោយមានការសហការជ្រោមជ្រែងពីសំណាក់គណៈកម្មាការជំរុញចលនាភូមិមួយផលិតផលមួយរាជធានីខេត្តទាំងអស់ បានដំណើរការចងក្រងសមាជិកភូមិមួយផលិតផលមួយបានចំនួនជិត៦០០ផលិតផលហើយ។ ក្នុងចំណោម៦០០ផលិតផលនេះ មានផលិតផលប្រភេទទំនិញ(រូបិយ)ប្រហែល៤៨០ផលិតផល និងផលិតផលប្រភេទសេវាកម្ម មានប្រហែលជាង១០០ផលិតផល ដែលបានធ្វើរួចចំនួនពីរដំណាក់កាលសម្រាប់ឆ្នាំ២០២១ និងឆ្នាំ២០២២កន្លងទៅ។
ចំណែកលោក យុន លីនណេ អភិបាលរង ខេត្តសៀមរាប ក៏បានមានប្រសាន៍ក្នុងឱកាសនោះដែរថា រដ្ឋបាលខេត្ត ក៏ដូចជាគណៈកម្មាធិការជំរុញចលនាភូមិ១ ផលិតផល១ ខេត្តសៀមរាប និងក្រុមលេខាធិការដ្ឋាន ដែលជាជំនួយការឱ្យគណៈកម្មាធិការ សូមគាំទ្រ ចូលរួមផ្សព្វផ្សាយ និងជំរុញការអនុវត្តចលនាភូមិមួយផលិតផលមួយ ឱ្យបានជោគជ័យ ដើម្បីរួមចំណែកអនុវត្តគោលនយោបាយរបស់រាជរដ្ឋាភិបាលឱ្យទទួលបាន ជោគជ័យ។ លោកបន្តថា ដើម្បីសម្រេចផែនការសកម្មភាពនេះ រដ្ឋបាលខេត្ត និងគណៈកម្មាធិការជំរុញចលនាភូមិមួយផលិតផលមួយ ថ្នាក់ខេត្ត នឹងខិតខំប្រឹងប្រែងសហការជាមួយរដ្ឋបាលក្រុង-ស្រុក និងមន្ទីរ-អង្គភាពពាក់ព័ន្ធ និងវិស័យឯកជនទាំងអស់ ដើម្បីអនុវត្តការងារឱ្យទទួលបានលទ្ធផលល្អប្រសើរ ក្នុងន័យចូលរួមផ្សព្វផ្សាយ ជំរុញ និងចងក្រងផលិតករ សេវាករ និងសិប្បករ នៅតាមមូលដ្ឋានឱ្យចូលជាសមាជិកចលនាភូមិ១ផលិតផល១ ព្រមទាំងអភិវឌ្ឍន៍ធនធានមនុស្សទាក់ទងនឹងការជំរុញចលនាភូមិ១ផលិតផល១ នៅថ្នាក់ខេត្ត ដើម្បីទទួលបានចំណេះដឹង បទពិសោធន៍ និងចូលរួមចំណែកកាត់បន្ថយភាពក្រីក្រ កាត់បន្ថយចំណាកស្រុក លើកកម្ពស់ជីវភាពរស់នៅ និងគុណភាពជីវិតរបស់ប្រជាជនតាមសហគមន៍៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
