មន្ត្រីជាន់ខ្ពស់ក្រសួងអប់រំបានបង្ហាញថា បច្ចុប្បន្នវិស័យអប់រំឯកជននៅកម្ពុជា កំពុងដើរតួនាទីយ៉ាងសំខានក្នុងការចូលរួមចំណែកក្នុងការអភិវឌ្ឍសមត្ថភាពយុវជនកម្ពុជាឲ្យមានការរីកចម្រើនគួរឲ្យកត់សម្គាល់ ជាពិសេសការពង្រឹងការអប់រំបន្ថែមដល់កុមារឲ្យកាន់តែមានប្រសិទ្ធិភាព ទាំងទ្រឹស្ដី និងការអនុវត្តន៍ ស្របទៅតាមគោលនយោបាយថ្មីរបស់រាជរដ្ឋាភិបាលកម្ពុជា ក្នុងការបង្កើតធនធានមនុស្សដែលពោលពេញដោយសមត្ថភាព ដើម្បីប្រគួតប្រជែងទីផ្សាអប់រំ និងការងារអាស៊ាន។
នេះបើតាមការលើកឡើងរបស់ ឯកឧត្តម ពឹង គិមឆេន អនុរដ្ឋលេខាធិការក្រសួងអបរំ យុវជន និងកីឡា នាព្រឹកថ្ងៃទី៣០ ខែកញ្ញា ឆ្នាំ២០២៣នេះ ក្នុងពិធីប្រគល់វិញ្ញាបនបត្រភាសាអង់គ្លេសទូទៅកម្រិតមធ្យម និងកម្រិតខ្ពស់ វិញ្ញាបនបត្របញ្ចប់ការសិក្សាកម្រិតមធ្យមសិក្សាទុតិយភូមិ បឋមភូមិ និងប្រគល់ប័ណ្ឌសរសើរ និងរង្វាន់លើកទឹកចិត្តលោកសិស្សានុសិស្ស នៃសាលាអន្តរជាតិ យូ អេស អេ ខេត្តសៀមរាប សម្រាប់ឆ្នាំសិក្សា២០២២-២០២៣ នាសណ្ឋាគារប៉ាស៊ីហ្វិក ក្រុងសៀមរាប។
ឯកឧត្តម ពឹង គិមឆេន ក៏បានបង្ហាញការអបអរចំពោះប្អូនទាំងអស់ដែលជាជ័យលាភីនាពេលនេះ ដែលវាជាការបង្ហាញឲ្យឃើញពីភាពរីកចម្រើនទៅលើវិស័យអប់រំកម្ពុជាយើង តាមរយៈការអបរ់រំរបស់វិស័យឯកជន ដែលជាការចូលរួមចំណែកយ៉ាងសំខាន់ក្នុងការពង្រឹងសមត្ថភាពរបស់យុវជនយើងដែលបាននឹងកំពុងសិក្សាភាសាអង់គ្លេស និងបានបញ្ចប់ការសិក្សា ខណៈដែលភាសាមួយនេះ កំពុងមានតម្រូវការខ្ពស់នៅក្នុងពិភពលោក ប្រទេសកម្ពុជាយើង ជាពិសេសខេត្តសៀមរាបតែម្ដង។ ក្នុងនោះខេត្តសៀមរាប ជាខេត្តទេសចរណ៍ ដូចនេះលំហូរភ្ញៀវទេសចរបរទេសក៏កំពុងមានការកើនឡើងជាបន្តបន្ទាប់ ដូចនេះភាសាអង់គ្លេសក៏កំពុងមានតម្រូវការខ្លាំងផងដែរ។ ជាក់ស្ដែងសាលាអន្តរជាតិ យូ អេស អេ ខេត្តសៀមរាប គឺជាសាលាមួយដែលមានគុណភាព ដែលសិស្សានុសិស្សដែលបានបញ្ចប់ការសិក្សា និងកំពុងបន្តការសិក្សា អាចទទួលបានចំណេះដឹងចំនួន៣ ក្នុងពេលតែមួយនោះមានទាំងភាសាខ្មែរ អង់គ្លេស និងកុំព្យូទ័រ ដែលនេះជាគុណសម្បត្តិមួយដ៏សំខាន់សម្រាប់ប្អូនៗទៀតផង។
ឯកឧត្តមបានសង្កត់ធ្ងន់ថា ជាមួយនឹងការអប់រំ វិន័យ សុជីវធម៌ និងសីលធម៌ ក៏ជារឿងចំបាច់សម្រាប់សិស្សានុសិស្សគ្រប់រូប ដែលចាំបាច់ត្រូវតែមាន ព្រោះចំនុចទាំងនេះនឹងអាចជួយពួកគាត់បាននៅគ្រប់ទីកន្លែង ដែលជាតម្រូវការមួយដែលមនុស្សម្នាក់ចាំបាច់ត្រូវតែមាន។ ក្នុងនោះដែរ ឯកឧត្តមក៏បានជម្រុញបន្ថែមដល់គណៈគ្រប់គ្រងសាលា លោកគ្រូអ្នកគ្រូ ត្រូវបន្តពង្រឹងបន្ថែមទៅលើគុណភាពបង្រៀន និងរៀន តាមរយៈការស្វែងរកអ្វីដែលថ្មីៗមកបង្រៀន បង្កើនការលើកទឹកចិត្ត និងផ្ដល់ភាពក្លាហានដល់សិស្ស។ បង្រៀនដោយការយកចិត្តទុកដាក់ខ្ពស់ ក្ដីស្រឡាញ់ និងសុចរិតភាព ពង្រឹងការសិក្សាតាមរយៈគ្រូផ្ទាល់ និងការស្រាវជ្រាវ ជាពិសេសត្រូវមានទំនាក់ទំនងល្អជាមួយសហគមន៍ ស្ថាប័នពាក់ព័ន្ធ និងអាណាព្យាបាលសិស្សទាំងអស់ ដើម្បីឲ្យការសិក្សារបស់ពួកគាត់កាន់តែមានគុណភាព និងប្រសិទ្ធភាព។
លោក លី ប៊ុនណា ប្រធានមន្ទីរអប់រំយុវជន និងកីឡាខេត្តសៀមរាប មានប្រសាសន៍ថា រាជរដ្ឋាភិបាល បានចាត់ទុកថា វិស័យឯកជន គឺជាដៃគូអភិវឌ្ឍន៍ មិនអាចខ្វះបាន ហើយវិស័យអប់រំ គឺជាកត្តាគន្លឹះ សម្រាប់ការអភិវឌ្ឍសង្គម សេដ្ឋកិច្ច និងមូលធនមនុស្ស ដោយផ្អែកលើគោលនយោបាយរបស់រាជរដ្ឋាភិបាល ក៏ដូចជាគោលការណ៍ក្រសួងអប់រំ វិស័យឯកជនមានការរីកចម្រើនខ្លាំង តាមរយៈនៃការបង្កើតសាលាឯកជនថ្មីៗជាច្រើន លើគ្រប់កម្រឹត តាំងពីថ្នាក់ទារកដ្ឋាន មត្តេយ្យសិក្សា បឋមសិក្សា មធ្យមសិក្សា រហូតដល់ដ្នាក់ឧត្តមសិក្សា ហើយគ្រឹះស្ថានសិក្សាឯកជនទាំងនោះ កំពុងបានបំពេញតួនាទីរបស់ខ្លួន ជាដៃគូ ជាមួយភាគីរដ្ឋ ហើយក៏កំពុងស្ថិតក្នុងចលនាប្រឡងប្រណាំង ដើម្បីគុណភាពអប់រំផងដែរ។ ជាមួយគ្នានោះគោលនយោបាយរបស់ក្រសួងអប់រំ គឺផ្តោតជាសំខាន់ទៅលើការធានាសមធម៌ នៃសិស្សទទួលបានការចូលរៀន ការធានាគុណភាពអប់រំ ប្រសិទ្ធភាព និងការឆ្លើយតប ហើយក្រសួងអប់រំ បានធ្វើកំណែទម្រង់ ពីមួយអាណត្តិទៅមួយអាណត្តិ ដើម្បីកសាងគោលគ្រឹះសម្រេចជោគជ័យ តាមតំណាក់កាលនៃការអភិវឌ្ឍន៍ ដើរឲ្យទាន់បណ្តាប្រទេសក្នុងតំបន់ និង បណ្តាប្រទេសអភិវឌ្ឍនានាលើសាកលលោក។
បើតាមលោក សរ សារ៉េត នាយកសាលាអន្តរជាតិ យូ អេស អេ បានឲ្យដឹងថា គិតមកទល់ពេលនេះ សាលាបានដំណើរការយៈពេលជាង ២៣ឆ្នាំមកហើយ ជានឹងទីតាំងចំនួន១៦ មាននៅរាជធានីភ្នំពេញ ខេត្តសៀមរាប បន្ទាយមានជ័យ និងបាត់ដំបង។ ដោយឡែកសម្រាប់ខេត្តសៀមរាប សម្រាប់ឆ្នាំសិក្សា ២០២២-២០២៣នេះ សិស្សដែលបានទទួល់វិញ្ញាបនបត្រ ប័ណ្ឌសរសើរ និងរង្វាន់លើកទឹកចិត្តនាពេលនេះមានចំនួន ១៦៤នាក់ ក្នុងនោះស្រីចំនួន ៨៥នាក់ផងដែរ៕
អត្ថបទ និងរូបភាព៖ លោក អ៊ុន ណារាជ្យ
