នៅព្រឹកថ្ងៃទី០៦ ខែតុលា ឆ្នាំ២០២៣នេះ ឯកឧត្តម តោ គឹមស៊ាន សមាជិកក្រុមប្រឹក្សាខេត្ត និងលោកស្រី ម៉ននី រស្សី អភិបាលរងខេត្ដ ព្រមទាំងមន្ដ្រីរាជការ នៃខេត្តសៀមរាប បានបន្តនាំយកទេយ្យវត្ថុ គ្រឿងឧបភោគបរិភោគ និងបច្ច័យមួយចំនួន ចូលរួមកាន់បិណ្ឌវេនទី៧ នៅវត្តព្រះរាជបូណ៍ ក្រុងសៀមរាប ដើមី្បឧទ្ទិសកុសលផលបុណ្យជូនដល់ដូនតាញ្ញាតិកាទាំងប្រាំពីរសណ្តាន និង បុព្វការីជនដែលពលីជីវិត ដែលបានបាត់បង់ជីវិត។
ក្នុងឱកាសនោះ លោកស្រី ម៉ននី រង្សី អភិបាលរងខេត្ត បានមានប្រសាសន៍ថា បច្ចុប្បន្នប្រទេសជាតិមានសុខសន្តិភាពទើបមានការអភិវឌ្ឍ ប្រជាពុទ្ឋបរិស័ទមានឱកាសប្រកបកិច្ចការរកស៊ីជួញដូរដោយមិនមានការភ័យខ្លាច ដែលញ៉ាំងឱ្យកំរិតនៃសេដ្ឋកិច្ច និងជីវភាពក្នុងគ្រួសារចេះតែរីកលូតលាស់ ហើយពួកគាត់រីករាយ និងជ្រះថ្លាក្នុងការមកធ្វើបុណ្យទានផ្សេងៗ ជួបជុំគ្នាទៅតាមទំលៀមទំលាប់ប្រពៃណីពីបូរុមបូរាណ។ ជាក់ស្ដែងពិធីបុណ្យភ្ជុំបិណ្ឌ ជាបុណ្យប្រពៃណីខ្មែរ ដែលប្រជាពុទ្ធបរិស័ទខ្មែរគ្រប់រូបតែងតែធ្វើជារៀងរាល់ឆ្នាំ ដើម្បីឧទ្ទិសកុសលផលបុណ្យជូនជីដូនជីតា ញាតិការទាំង ៧សណ្តាន ដែលលោកបានចែកឋានទៅកាន់លោកខាងមុខហើយនោះ សូមឲ្យលោកបានទៅកាន់សុគតិភព នឹងសូមឲ្យកូនចៅដែលនៅមានជីវិតរស់រានឲ្យជួបប្រទះតែសេចក្តីសុខចំរើន។ ហេតុនេះសូមពុកម៉ែបងប្អូននាំគ្នា រក្សាសុខសន្តិភាពនេះ ឱ្យនៅស្ថិតស្ថេរគង់វង្ស សម្រាប់ជាគ្រឺះក្នុងកិច្ចការអភិវឌ្ឍជាតិមាតុភូមិយើងជាបន្តទៅទៀត ដើម្បីទុកជាកេរដំណែលដល់កូនចៅ ជំនាន់ក្រោយរបស់យើង។
លោកស្រីអភិបាលរងខេត្ត មានប្រសាសន៍ទៀតថា ការចូលរួមកាន់បិណ្ឌ នាំយកទេយ្យវត្ថុ គ្រឿងឧបភោគបរិភោគ និងបច្ច័យមួយចំនួន មកប្រគេនដល់ព្រះសង្ឃនាពេលនេះដែរ ក៏ជាការឧទ្ទិសជូនដល់ដួងវិញ្ញាណក្ខ័ន្ត កម្មាភិបាល យុទ្ធជន យុទ្ធនារី ដែលបានពលីក្នុងបុព្វហេតុរំដោះជាតិ កសាងការពារមាតុភូមិ ព្រមទាំងបងប្អូនរងគ្រោះដែលបានស្លាប់ទៅដោយភាពអយុត្តិធម៌ និងជួយរំដោះឲ្យរួចចាកផុតពីទុក្ខទោសទាំងឡាយដែលជាឧបាយភូមិណាមួយ និងឲ្យបានទៅកាន់សុគតិភពថ្មី។ ក្រោមការដឹកនាំប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានដាក់ចេញនៅយុទ្ធសាស្ត្របញ្ចកោណដើម្បីឱ្យមានការអភិវឌ្ឍន៍ប្រទេសជាតិបន្ថែមទៀត។ ពិសេសព្រះពុទ្ធសាសនាត្រូវបានកំណត់ក្នុងរដ្ឋធម្មនុញ្ញថា ជា«សាសនារបស់រដ្ឋ» ហើយបច្ចុប្បន្នវិស័យពុទ្ធិកសិក្សា ក៏មានការរីកចម្រើនជាបន្តបន្ទាប់។
សូមជំរាបថា ទេយ្យវត្ថុមានគ្រឿងឧបភោគបរិភោគដែលបានប្រគេនដល់ព្រះសង្ឃនាពេលនោះ រួមមាន៖ បច្ច័យ ២.០០០.០០០រៀល អង្ករត្រីខកំប៉ុង មី ទឹកស៊ីអ៊ីវ និងទឹកត្រី ទឹកបរិសុទ្ធ និងទឹកក្រូច រួមនិងទេយ្យវត្ថុមួយចំនួនទៀត៕
អត្ថបទ និងរូបភាព៖ លោក បូ សាវី ,ទ្រា ពន្លឺ
កែសម្រួល៖ លោក អ៊ុន ណារាជ្យ