ឯកឧត្តមនាយឧត្តមសេនីយ៍ ឃឹម ប៊ុនសុង រដ្ឋលលេខាធិការក្រសួងការពារជាតិ តំណាងដ៏ខ្ពង់ខ្ពស់ឯកឧត្តមនាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ កាលពីថ្ងៃទី០៥ ខែតុលា ឆ្នាំ២០២៣នេះ បានដឹកនាំប្រតិភូនៃក្រសួងការពារជាតិ ចុះសាកសួរសុខទុក្ខបងប្អូននាយទាហាន នាយទាហានរង និង ពលទាហានក្នុងនៅមជ្ឈមណ្ឌលអភិវឌ្ឍយោធិនពិការ សម្ដេចតេជោ ហ៊ុន សែន គូលែន៣១៧ ខេត្តសៀមរាប ។
មានប្រសាសន៍ក្នុងឱកាសនោះឯកឧត្តមនាយឧត្តមសេនីយ៍ ឃឹម ប៊ុនសុង ក៏បានពាំនាំនូវការផ្តាំផ្ញើរសាកសួរសុខទុក្ខ ពីសំណាក់សម្តេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងសម្ដេចកិត្តិព្រឹទ្ធបណ្ឌិត , សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ,សម្តេចពិជ័យសេនា ទៀ បាញ់ សមាជិកឧត្ដមប្រឹក្សាផ្ទាល់ព្រះមហាក្សត្រ និង ឯកឧត្តមនាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និង លោកជំទាវ ដែលជានិច្ចកាលតែងតែគិតគូរពីសុខទុក្ខ និង ជីវភាពរស់នៅរបស់យោធិន នាយទាហាន នាយទាហានរង និងពលទាហាននៃកងយោធពលខេមរភូមិន្ទក្នុងទូទាំងប្រទេស រួមទាំងមជ្ឈមណ្ឌលអភិវឌ្ឍយោធិនពិការ សម្ដេចតេជោ ហ៊ុន សែន គូលែន៣១៧ ខេត្តសៀមរាបផងដែរ ដែលនៅក្នុងរដូវបុណ្យទានប្រពៃណីជាតិ ក៏ដូចពិធីបុណ្យជាតិ រាជរដ្ឋាភិបាលកម្ពុជា ក៏ដូចជាគណៈប្រតិភូក្រសួងការពារជាតិ និង អាជ្ញាធរគ្រប់លំដាប់ថ្នាក់តែងតែចុះមកសាកសួរសុខទុក្ខដល់បងប្អូនយោធិនពិការ បាត់បង់សុពលភាពការងារ និង យោធិននិវត្តន៍នៅតាមមជ្ឈមណ្ឌលអភិវឌ្ឍន៍យោធិនពិការក៏ដូចនៅតាមបណ្តាកងពល និង អង្គភាពផងដែរ ។
ឯកឧត្តមបន្តថា ថ្នាក់ដឹកនាំរាជរដ្ឋាភិបាលថ្មី អាណត្តិទី៧នេះ ដែលដឹកនាំដោយ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា តែងតែដឹងគុណជានិច្ចចំពោះវីរៈភាព អង់អាចក្លាហាន របស់បងប្អូនជនពិការ ដើម្បីបុព្វហេតុជាតិ និងមាតុភូមិ ក្នុងអំឡុងសម័យសង្គ្រាម ដោយត្រូវដឹងគុណស្ថាបនិក មគ្គុទេសក៍ឯក និងប្រតិបតិ្តករ នយោបាយ ឈ្នះ ឈ្នះ ដែលបាននាំមកនូវសន្តិភាព និង ការឯកភាពជាតិពេញលេញ បានធ្វើឲ្យប្រទេសកម្ពុជាយើងបានប្រែមុខមាត់ថ្មី និងមានសន្តិភាពពេញលេញ ដែលមានការចូលរួមពីអតីតយោធិន ហើយមិនតែប៉ុណ្ណោះយុទ្ធមិត្ត រួមអាវុធក៏បានលះបង់ឈាមស្រស់ សាច់ស្រស់ រហូតមកដល់ពេលនេះ យោធិនខ្លះ បានបាត់បង់សមត្ថភាពការងារ ខ្លះទៀតដល់អាយុកាលចូលនិវត្តន៍ និង ខ្លះក្លាយជាពិការដោយសារសង្គ្រាម ។
ព័ត៌មានជាតិ ថ្មីៗ
ក្នុងឱកាសនោះដែរឯកឧត្តមនាយឧត្តមសេនីយ៍ ឃឹម ប៊ុនសុង បានសម្ដែងនូវការកោតសរសើរ ចំពោះវីរភាពបងប្អូនយោធិនពិការទាំងអស់ ដែលបានចូលរួមចំណែកយ៉ាងសកម្ម ក្នុងការកសាងស្នាដៃ និងគុណបំណាច់ជូនជាតិមាតុភូមិ ប្រកបដោយទឹកចិត្តស្នេហាជាតិ, ការលះបង់ និងពលិកម្មគ្រប់បែបយ៉ាង ក្នុងការប្រយុទ្ធការពារជាតិ និងប្រជាជនកម្ពុជា ប្តូរយកសន្តិភាពធ្វើឲ្យប្រជាជនរស់ ក្នុងសេចក្តីសុខសាន្ត និងការអភិវឌ្ឍរីកចម្រើនដូចសព្វថ្ងៃ ព្រមទាំងបានសំណូមពរដល់បងប្អូនក្រុមគ្រួសារ យោធិនពិការយើងទាំងអស់ ត្រូវយកចិត្តទុកដាក់លើសុខសុវត្ថិភាព សុខភាព អនាម័យ សំខាន់ចំពោះកូនចៅ ក្មេងតូចៗ ព្រោះរដូវភ្លៀងធ្លាក់នេះ សម្បូរទៅដោយមូសខ្លា ដែលជាភ្នាក់ងារចម្លង ជម្ងឺគ្រុនឈាម គ្រុនឈិក គ្រុនចាញ់ ។ ម៉្យាងទៀតពេលនេះគឺ ពោពេញទៅដោយទឹក នៅតាមអូរ ប្រឡាយ ស្ទឹង បឹងបួរ ដែល ងាយបង្កឲ្យក្មេងៗជួបនូវឧប្បទ្វហេតុផ្សេងៗកើតឡើង ។
ជាមួយគ្នានេះដែរឯកឧត្តមនាយឧត្តមសេនីយ៍ ឃឹម ប៊ុនសុង បាននាំយកអំណោយរបស់ឯកឧត្តមនាយឧត្តមសេនីយ៍ ទៀ សីហា និង លោកជំទាវ នូវថវិកាចំនួន៣លានរៀល ប្រគល់ជូន មជ្ឈមណ្ឌលអភិវឌ្ឍយោធិនពិការ សម្ដេចតេជោ ហ៊ុន សែន គូលែន៣១៧សៀមរាប សម្រាប់ប្រើប្រាស់ក្នុងអង្គភាព និង គ្រួសារយោធិនពិការ និង ព្រះសង្ឃ សរុប៣០៦អង្គ/នាក់ ក្នុងមួយអង្គ/នាក់ ប្រគេននិងទទួលបាន ត្រីខ,មី, ស្ករស ,ទឹកដោះគោ និង ថវិកា៣ម៉ីនរៀល ៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក លីវ សាន្ត
