ការដេញថ្លៃគម្រោងសាងសង់ផ្លូវបេតុងអាមេចំនួន ២ខ្សែ នៅក្នុងឃុំគោធ្លកក្រោម និងឃុំខ្វាវ ស្រុកជីក្រែង ខេត្តសៀមរាប ត្រូវបានប្រកាសបញ្ចប់ការដេញថ្លៃដោយជោគជ័យ នៅថ្ងៃទី១១ ខែតុលា ឆ្នាំ២០២៣នេះ ដោយការដេញថ្លៃនេះ មានការចូលរួមពីអាជ្ញាធរស្រុក មន្រ្តីបច្ចេកទេសសាលាខេត្ត គណៈកម្មការលទ្ធកម្មឃុំទាំងពីរ និងអ្នកសារព័ត៌មាន រួមនឹងតំណាងក្រុមហ៊ុនដេញថ្លៃផ្សេងៗផងដែរ។
ប្រធានគណៈកម្មការលទ្ធកម្មឃុំគោកធ្លកក្រោម បានឲ្យដឹងថា សម្រាប់ឃុំគោកធ្លកក្រោម គឺបានដាក់ដេញថ្លៃគម្រោងសាងសង់ផ្លូវបេតុងអាមេចំនួន១ខ្សែប្រវែង០,១៨២គ.ម មានទទឹង៥ម៉ែត្រ កម្រាស់០,១៥ម៉ែត្រ និងដាក់លូរការពារផ្លូវចំនួន ០៤កង់ ដែលមានមុខកាត់ ០,៨ម៉ែត្រ និងស្លាកសញ្ញាគម្រោងចំនួន០១ ។ គម្រោងនេះស្ថិតក្នុងតំលៃ ប៉ាន់ស្មាន១១៩.៨៣៦.០៣៣ រៀល មានក្រុមហ៊ុនម៉ៅការដាក់សំណើរចំនួន ១២ក្រុមហ៊ុន។ ជាលទ្ធផលបានទៅលើ ក្រុមហ៊ុន ធីធី អេសបៀល ក្នុងតម្លៃ ៦១.៨០០.០០០រៀល។
ដោយឡែកប្រធានគណៈកម្មការលទ្ធកម្ម ឃុំខ្វាវ បានឲ្យដឹងផងដែលថា ឃុំគឺបានដាក់ដេញថ្លៃគម្រោងគម្រោងសាងសង់ផ្លូវបេតុងអាមេ ប្រវែង ០,១៥២គ.ម ទទឹង ៦ម៉ែត្រ កម្រាស់០,១៥ម៉ែត្រ និងស្លាកសញ្ញាគម្រោង១ និងលូការពារផ្លូវចំនួន៤ មុខកាត់៤ម៉ែត្រ ក្នុងតំលៃ ប៉ាន់ ស្មាន១១៩.៩៣៣.៦៤១ រៀល មានក្រុមហ៊ុនម៉ៅការ ដាក់សំណើរចំនួន ១០ក្រុមហ៊ុន ។ជាលទ្ធផលបានទៅលើ ក្រុមហ៊ុន ម៉ូវ សៀកផៃ ក្នុងតម្លៃ ៥៧.៤៥៦.០០០រៀល។
ក្រោយពីបញ្ចប់គម្រោងនៃការដេញថ្លៃ ក្រុមហ៊ុនទាំងពីរដែលទទួលបានការម៉ៅការគម្រោងសាងសង់ផ្លូវខាងលើ បានធ្វើការប្ដេជ្ញាចិត្តដោយសន្យាថា នឹងធ្វើឲ្យបានត្រឹមត្រូវស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដូចមាន ចែងនៅក្នុងកិច្ចសន្យា៕
អត្ថបទ និងរូបភាព៖ លោក ស៊ន គីន
កែសម្រួល៖ លោក អ៊ុន ណារាជ្យ
