នៅព្រឹកថ្ងៃទី១២ ខែតុលា ឆ្នាំ២០២៣នេះ ឯកឧត្ដម ស ថាវី អនុប្រធានក្រុមការងារចុះមូលដ្ឋានឃុំពាក់ស្នែង ស្រុកអង្គរធំ បានដឹកនាំក្រុមការងារ និងពុទ្ធបរិស័ទ្ធ ចូលកាន់បិណ្ឌវេនទី១៣ នៅវត្ដខ្នាចត្រាច ឃុំពាក់ស្នែង ស្រុកអង្គរធំ ខេត្ដសៀមរាប។
ឯកឧត្ដម ស ថាវី មានប្រសាសន៍ថា បងប្អូនប្រជាពលរដ្ឋអាចចូលរួមធ្វើបុណ្យតាមប្រពៃណីទំនៀមទំលាប់យ៉ាងច្រើនកុះករនាពេលនេះបាន គឺដោយសារតែកត្តាប្រទេសជាតិយើងទាំងមូល មានសុខសន្តិភាពពេញលេញ មានហេដ្ឋារចនាសម្ព័ន្ធផ្លូវថ្នល់ខ្វាត់ខ្វែង ងាយស្រួលធ្វើដំណើរទៅកាន់ទីវត្ដអារាម។ជាពិសេសតំបន់ពាក់ស្នែង ដែលជាតំបន់កំពុងអភិវឌ្ឍន៍ល្អប្រសើរនាពេលប្ចុប្បន្ន។ ហើយការមានការអភិវឌ្ឍន៍ មានផ្លូវងាយស្រួលធ្វើដំណើរនេះហើយ ទើបបងប្អូនបានចូលរួមកាន់បិណ្ឌនាពេលនេះ ហើយបាននាំចង្ហាប់ប្រគេនព្រះសង្ឃគ្រប់វត្ដអារាមទៀតផង។
ពលរដ្ឋរស់នៅឃុំពាក់ស្នែង បានលើកឡើងថា ការមានលទ្ធភាពធ្វើបុណ្យច្រើនជាងឆ្នាំមុនៗនេះ ដោយសារនៅតំបន់នេះបច្ចុប្បន្នមានការអភិឌ្ឍន៍ផ្លូវថ្នល់បានល្អ មានទឹកមានភ្លើងគ្រប់គ្រាន់។ ជាពិសេសប្រទេសជាតិមានសុខសន្ដិភាព ទើបប្រជាពលរដ្ឋមានលទ្ធភាពធ្វើបុណ្យ។ ទន្ទឹមនឹងនេះដែរ ចំពោះការការពារ សន្តិសុខ និងរៀបចំសណ្តាប់ធ្នាប់ល្អក្នុងវត្ត។ ប្រជាពលរដ្ឋក៍បានបង្ហាញអារម្មណ៍សប្បាយរីករាយ ព្រោះពួកគេអាចមកមានលទ្ធភាពធ្វើបុណ្យមិនដូចជា២ឆ្នាំមុន ដែលប្រទេសជាតិជួបបញ្ហាជំងឺកូវីដ-១៩។
សូមបញ្ជាក់ថា បុណ្យកាន់បិណ្ឌ ភ្ជុំបិណ្ឌ គឺដើម្បីឲ្យពុទ្ធបរិស័ទ ប្រជាពលរដ្ឋ យុវជនជំនាន់ក្រោយ ស្រឡាញ់ យោគយល់គ្នា សាមគ្គីគ្នា ចេះពិចារណាថា តើអ្វីខ្លះត្រូវធ្វើ អ្វីខ្លះត្រូវលះបង់ និងរួមចំណែកក្នុងការថែរក្សាប្រពៃណីទម្លាប់ទម្លាប់សាសនាផង គឺដើម្បីឧទ្ទិសកុសលផលបុណ្យជូនដល់បុព្វការីជនដែលបានចែកឋានទៅកាន់លោកខាងមុខ។ នៅក្នុងខេត្តខេត្ដសៀមរាប បានប្រព្រឹត្តិទៅដោយបរិយាកាសសប្បាយរីករាយ និងមានការចូលរួមជំរុញ និងលើកទឹកចិត្តពីថ្នាក់ដឹកនាំជុំវិញខេត្ត ការការពារសន្តិសុខសណ្តាប់ធ្នាប់៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
