នៅព្រឹកថ្ងៃទី១៥ ខែតុលា ឆ្នាំ២០២៣នេះ រដ្ឋបាលខេត្តសៀមរាប ដឹកនាំដោយ ឯកឧត្តម ប្រាក់ សោភ័ណ អភិបាល នៃគណៈអភិបាលខេត្ត និង ឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប បានដឹកនាំ និងអញ្ជើញថ្វាយកម្រងផ្កា អុជទៀនធូប និងនិមន្តព្រះមន្ត្រីសង្ឃខេត្ត បង្សុកូល នៅព្រះរាជបូជនីយដ្ឋាន (ព្រះរាជដំណាក់)ខេត្តសៀមរាប ដើម្បីឧទ្ទិស ថ្វាយព្រះរាជមហាកុសល ដល់ដួងព្រះវិញ្ញាណក្ខន្ធ ព្រះករុណាព្រះបាទសម្តេច ព្រះនរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យជាតិ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋគម្រប់ខួប ១១វស្សា នៃការយាងចូលព្រះទិវង្គត (១៥ តុលា ២០១២-១៥ តុលា ២០២៣) ។
ឯកឧត្តម អ៊ាន ឃុន និង ឯកឧត្តម ប្រាក់ សោភ័ណ ព្រមទាំង ឯកឧត្តម លោកជំទាវ ជាសមាជិកក្រុមប្រឹក្សា ខេត្ត លោក លោកស្រី គណៈអភិបាលខេត្ត និងជាថ្នាក់ដឹកនាំអង្គភាព មន្ទីរ ស្ថាប័ន សមាគមនានា បានអញ្ជើញ ថ្វាយកម្រងផ្កាធ្វើអភិវន្ទនកិច្ច គោរពឧទ្ទិសបួងសួងដល់វត្ថុសាកសិទ្ធ ថ្វាយចំពោះដួងព្រះវិញ្ញាណក្ខន្ធព្រះបរមរតនកោដ្ឋ ព្រះករុណាព្រះបាទសម្តេចព្រះនរោត្តមសីហនុក្នុងព្រះរាជពិធីគម្រប់ខួប ១១វស្សា នៃការយាងចូលទិវង្គតរបស់ព្រះអង្គ ដែលនេះជាកាយវិការបង្ហាញនូវ កត្តញ្ញូតាធម៌ និងសូមឧទ្ទិសដល់ដួងវិញ្ញាណក្ខន្ធ ព្រះអង្គគង់ប្រថាប់ដោយសុខក្សេមក្សាន្តនាទីឋានបរមសុខកុំបីឃ្លាងឃ្លាតឡើយ។ ព្រះគុណូបការៈដ៏ថ្លៃថ្លា វិសេសវិសាលឧត្តុង្គឧត្តម របស់ព្រះអង្គ បានបន្សល់ទុកនូវសមទ្ធិផលជាច្រើន សម្រាប់ជាតិ មាតុភូមិ សម្រាប់កូនចៅប្រជារាស្រ្តកម្ពុជាទូទាំងប្រទេស ដែលក្នុងមួយព្រះជន្មរបស់ព្រះអង្គ បានលះបង់ទាំងព្រះកាយពល និង ព្រះបញ្ញាញាណ ក្នុងបុព្វហេតុជាតិ ដើម្បីទាមទារនូវឯករាជ្យជាតិ បូរណភាពទឹកដីពីអាណានិគមបារាំងសេស រួមជាមួយសមិទ្ធផលជាច្រើន ដែលមិនអាចកាត់ថ្លៃបាន។
ព័ត៌មានជាតិ ថ្មីៗ
អត្ថបទ និងរូបភាព៖ លោក យូ វង្ស
