ក្រោយការបើកសម្ពោធអាកាសយានដ្ឋានអន្តរជាតិសៀមរាបអង្គរ និងស្របពេលកំណើននៃរដូវកាលទេសចរណ៍ ឬ High Season នេះ ស្ថានភាពភ្ញៀវទេសចរណ៍អន្តរជាតិ ទិញសំបុត្រចូលទស្សនាប្រាសាទអង្គរ និងប្រាសាទកោះកេរ មានការកើនឡើងក្នុងចន្លោះប្រមាណជាង១ ៨០០នាក់ ទៅជាង ២ ២០០នាក់ ក្នុងមួយថ្ងៃ នេះបើតាមការឱ្យដឹងពីឯកឧត្ដម លី សែ អគ្គនាយកគ្រឹះស្ថានអង្គរ តាមប្រព័ន្ធតេឡេក្រាម នៅថ្ងៃទី២៥ ខែតុលា ឆ្នាំ២០២៣។
ឯកឧត្ដម លី សែ រំពឹងថាចំនួននេះ នឹងបន្តមានការកើនឡើងបន្ថែមទៀត ប៉ុន្តែក៏នៅមិនទាន់ឡើងខ្លាំង នៅឡើយនោះទេ ជាពិសេសភ្ញៀវទេសចរចិន ដែលកំពុងស្ថិតនៅកម្រិតទាប ដោយសារតែយន្តការរឹតត្បិតក្នុងប្រទេសរបស់គាត់។
គួរជម្រាបថា រយៈពេល៨ខែឆ្នាំ២០២៣ កម្ពុជាទទួលបានភ្ញៀវទេសចរអន្តរជាតិប្រមាណ៣.៥លាននាក់។ តាមការរំពឹងទុក កម្ពុជានឹងទទួលបានទេសចរអន្តរជាតិក្នុងរង្វង់ប្រមាណ៤.៥លានទៅ៥លាននាក់ សម្រាប់ពេញមួយឆ្នាំ២០២៣នេះ។ ទន្ទឹមនោះ គោលដៅជើងហោះហើរ ដែលតភ្ជាប់ជាមួយអាកាសយានដ្ឋានអន្តរជាតិរបស់កម្ពុជា ភាគច្រើនមានតែក្នុងតំបន់អាស៊ាន ដូចជា ថៃ វៀតណាម សិង្ហបុរី និងម៉ាឡេស៊ីជាដើម។ ដោយឡែកសម្រាប់ជើងហោះហើរមកពីប្រទេសចិន គឺមិនសូវទៀងទាត់នោះទេ។ ជាការរំពឹងទុក រដ្ឋលេខាធិការដ្ឋានអាកាសចរស៊ីវិល នៅតែមានសុទិដ្ឋិនិយមថា រាជរដ្ឋាភិបាលកម្ពុជា និងរដ្ឋាភិបាលឥណ្ឌា នឹងចាប់ផ្ដើមភ្ជាប់ជើងហោះហើរជាមួយគ្នាក្នុងពេលឆាប់ៗ ដើម្បីជំរុញការទាក់ទាញភ្ញៀវទេសចរពីប្រទេសមហាយក្សឥណ្ឌា និងប្រទេសទី៣ មកកាន់គោលដៅទេសចរណ៍កម្ពុជាបន្ថែមទៀត៕
អត្ថបទ និងរូបភាព៖ លោក បូ សាវី
កែសម្រួល៖ លោក សេង ផល្លី
