ការដាក់ដេញថ្លៃគម្រោងសាងសង់ និងជុសជុលផ្លូវដីសក្រាលក្រួសក្រហមចំនួន ៥ខ្សែ ដែលជាគម្រោងមូលនិធិឃុំជ្រោយនាងងួន និងឃុំមោង ស្រុកស្រីស្នំ ខេត្តសៀមរាប ត្រូវបានប្រកាសបញ្ចប់ការដេញថ្លៃដោយជោគជ័យ នៅថ្ងៃទី៣០ ខែតុលា ឆ្នាំ២០២៣នេះ មានការចូលរួមពី មន្រ្តីបច្ចេកទេសសាលាខេត្ត អាជ្ញាធរស្រុក គណៈកម្មការលទ្ធកម្មឃុំទាំងពីរ និងអ្នកសារព័ត៌មាន រួមទាំងតំណាងក្រុមហ៊ុនដែលបានចូលរួមដេញថ្លៃ។
បើតាមលោក កែវ កី ប្រធានគណៈកម្មការលទ្ធកម្មឃុំជ្រោយនាងងួង បានឲ្យដឹងថា សម្រាប់គម្រោងមូលនិធិឃុំឆ្នាំ២០២៣ ឃុំជ្រោយនាងងួន បានដាក់ដេញថ្លៃគម្រោងសាងសង់ផ្លូវដីសក្រាលក្រួសក្រហមចំនួន ៣ខ្សែ មានប្រវែង១.៤០០ម៉ែត្រ ទទឹងផ្លូវ៥ម៉ែត្រ កម្រាស់០,១៥ម៉ែត្រ មានស្លាកសញ្ញាគម្រោងចំនួន៣ ។ គម្រោងនេះមានតម្លៃប៉ាន់ស្មាន ១០៧.៣០២.៧៨៦រៀល ដោយមានក្រុមហ៊ុនម៉ៅការដាក់សំណើរចំនួន ៧ក្រុមហ៊ុន។ ជាលទ្ធផលបានទៅលើក្រុម ឯក គង់ ក្នុងតម្លៃ ៤៩.០០០.០០០រៀល។
ដោយឡែកបើតាមលោក ទិន ទី ប្រធានគណៈកម្មការលទ្ធកម្មឃុំមោងបានឲ្យដឹងថា សម្រាប់គម្រោងមូលនិធិឃុំឆ្នាំ២០២៣ ឃុំមោង បានដាក់ដេញថ្លៃគម្រោងជុសជុលផ្លូវដីសក្រាលក្រួសក្រហមចំនួន ២ខ្សែ មានប្រវែង ១.០៩០ម៉ែត្រ ទទឹងផ្លូវ៥ម៉ែត្រ កម្រាស់០,១៥ម៉ែត្រ មានស្លាកសញ្ញាគម្រោងចំនួន២ ។ គម្រោងនេះមានតម្លៃប៉ាន់ស្មាន ៨៨.៤៩៦.៥៦៤រៀល ដោយមានក្រុមហ៊ុនម៉ៅការដាក់សំណើរចំនួន ៧ក្រុមហ៊ុន។ ជាលទ្ធផលបានទៅលើក្រុម ឯក គង់ ក្នុងតម្លៃ ៤៣.០០០.០០០រៀល។
ក្រោយពីបញ្ចប់ការដេញថ្លៃ តំណាងក្រុមហ៊ុនដែលទទួលបានការម៉ៅការទាបជាងគេចំពោះគម្រោងសាងសង់ផ្លូវខាងលើ បានធ្វើការប្ដេជ្ញាចិត្តដោយសន្យាថា នឹងធ្វើឲ្យបានទាន់ពេលវេលា ត្រឹមត្រូវ ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ ពិសេសគោរពទៅតាមលក្ខណ្ឌដូចមានចែងនៅក្នុងកិច្ចសន្យាផងដែរ៕
អត្ថបទ និងរូបភាព៖ លោក ស៊ុន គីន
កែសម្រួល៖ លោក អ៊ុន ណារាជ្យ
