នៅថ្ងៃទី១២ ខែវិច្ឆិកា ឆ្នាំ២០២២៣នេះ ប្រជាពលរដ្ឋមានជីវភាពខ្វះខាតចំនួន ២៥០គ្រួសារ រស់នៅក្នុងឃុំខ្នងភ្នំ ស្រុកស្វាយលើ និងក្នុងសង្កាត់សៀមរាប ក្រុងសៀមរាប ខេត្តសៀមរាប បានទទួលអំណោយជាគ្រឿងឧបភោគបរិភោគផ្សេងៗ ពីសប្បុរសជនបរទេសមកពីប្រទសអូស្ត្រាលី និងអង្គការមនុស្សធម៌កម្ពុជាខេត្តសៀមរាប Pod Projects ។
លោកស្រី Gail Isedale តំណាងសប្បុរសជនមកពីប្រទេសអូស្ត្រាលី មានប្រសាសន៍ថា សប្បុរសជនបរទេសមកពីប្រទសអូស្ត្រាលី មិនមែនជាអ្នកសម្បូរធនធានអ្វីទេ តែដោយក្តីអាណិតស្រឡាញ់ និងដឹងពីភាពខ្វះខាតរបស់បងប្អូន តាមរយៈអង្គការមនុស្សធម៌កម្ពុជាខេត្តសៀមរាប Pod Projects ក៏បានរៃអង្គាសពីសប្បុរសជនតាមសហគមន៍នៅប្រទេសអូស្ត្រាលី ដើម្បីយកមកជួយរំលែកការខ្វះខាតទៅតាមលទ្ឋភាពដែលអាចធ្វើបាន។ ហើយចំពោះស្បៀងអាហារផ្តល់ជូននេះ ថ្វីត្បិតតែតិចតួច តែក៏អាចជួយដោះស្រាយជីវភាពបងប្អូនបានមួយគ្រាៗ និងបង្ហាញពីការជួយគ្នាទៅវិញទៅមកក្នុងនាមជាមនុស្សជាតិផងគ្នា។
តំណាងអង្គការមនុស្សធម៌កម្ពុជាខេត្តសៀមរាប Pod Projects លោក ទូច ដារិទ្ធ មានប្រសាសន៍ដែរថា សប្បុរជនបរទេសមកពីអូស្ត្រាលីនេះ តែងតែជួយឧបត្ថម្ភគាំទ្រផ្តល់ជំនួយតាមរយៈអង្គការជាច្រើនដងមកហើយ ដោយអង្គការតែងតែសហការជាមួយអាជ្ញាធរមូលដ្ឋាន ដើម្បីឱ្យគាត់ផ្តល់ទិន្នន័យ និងភាពច្បាស់លាស់អំពីគ្រួសារមានភាពខ្វះខាតជាក់ស្តែង។ ជារឿយៗអង្គការផ្តោត និងផ្តល់ជូនគ្រួសារខ្វះខាតដោយសារបាត់បង់ការងារ ជនចាស់ជរា និងគ្រួសារមានកូនច្រើន។
ព័ត៌មានជាតិ ថ្មីៗ
ក្នុងឱកាសនោះដែរ ព្រះគ្រូ ភ្លឿន រដ្ឋ គ្រូសូធ្យស្តាំវត្តអធ្វា បានអំពាវនាវដល់បងប្អូនប្រជាពលរដ្ឋទាំងអស់ បន្តខិតខំដាំដំណាំរួមផ្សំ និងស្វែងរកការងារការងារដោយភាពត្រឹមត្រូវ និងត្រូវយកចិត្តទុកដាក់ថែទាំសុខភាព ដូចជាការបរិភោគស្អាត រក្សាអនាម័យ ដើម្បីចៀសវាងជំងឺរាគរុសផ្សេងៗ បណ្តាលឱ្យខាតបង់ថវិកាគ្រួសារ។
សូមជម្រាបថា អំណោយជាគ្រឿងឧបភោគបរិភោគដែលបានចែកជូនពលរដ្ឋទាំង ២៥០គ្រួសារនាពេលនេះ ក្នុងមួយគ្រួសារទទួលបាន អង្ករ ១០គីឡូក្រាម មី១០កញ្ចប់ ត្រីខ ៣កំប៉ុង និងទឹកស៊ីអ៊ីវ ១ដបផងដែរ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
