នាថ្ងៃទី១៣ ខែវិច្ឆិកា ឆ្នាំ២០២៣នេះ ឯកឧត្តម នួន ដាញិល រដ្ឋលេខាធិការក្រសួងអភិវឌ្ឍន៍ជនបទ បានដឹកនាំមន្ត្រីជំនាញចុះត្រួតពិនិត្យ និងវាយតម្លៃគុណភាពផ្លូវគ្រួសក្រហមមួយខ្សែ ភ្ជាប់ពីស្រុកសូទ្រនិគម ទៅស្រុកជីក្រែង ខេត្ដសៀមរាប បន្ទាប់ពីធ្វើការជួសជុលរួចរាល់មួយរយភាគរយ។
លោក ទូច ម៉ាឡា ប្រធានមន្ទីរអភិវឌ្ឍន៍ជនបទខេត្ដសៀមរាប បានឲ្យដឹងថា ផ្លូវមួយខ្សែនេះមានប្រវែងជាង ១២គីឡូវម៉ែត្រ ទំហំទទឹងខ្នងលើ ៦ម៉ែត្រ ភ្ជាប់ពីឃុំតាយ៉ែក ស្រុកសូទ្រនិគម ទៅឃុំពង្រលើ ស្រុកជីក្រែង ខេត្ដសៀមរាប ប្រើប្រាស់ថវិការាជរដ្ឋាភិបាលជួលជុល ក្រោមគម្រោងថែទាំខួបក្រាលគ្រួសក្រហម ដោយមន្ទីរអភិវឌ្ឍន៍ជនបទខេត្ដសៀមរាប។ ផ្លូវនេះបានជួសជុលឡើងវិញរយៈពេលបីខែ ដោយចាប់ពីខែកក្កដា ដល់ខែតុលាឆ្នាំ២០២៣នេះ ដែលមកដល់ពេលនេះ ជួសជុលរួរាល់ ១០០ភាគរយហើយ។
លោកបន្ថែមថា ផ្លូវគ្រួសក្រហមមួយខ្សែនេះ បានសាងសង់ដោយក្រសួងអភិវឌ្ឍន៍ជនបទចាប់តាំងឆ្នាំ២០១៩មក ប៉ុន្ដែត្រូវបានខូចខាតយ៉ាងធ្ងន់ធ្ងរ ពិធបាកធ្វើដំណើរ ដោយមានគ្រហ៊ុកធំៗ ដោយសារទឹកជំនន់ផង និងដោយសាររថយន្ដដឹកជញ្ជូនលើសទម្ងន់ផង ទើបធ្វើឱ្យពិបាកធ្វើដំណើរ ខណៈដែលនៅតំបន់នោះសំបូរដោយដំណាំកសិកម្មដូចដំឡូង ស្វាយចន្ទីជាដើម។
ក្រោយការចុះពិនិត្យនេះ លោកប្រធានមន្ទិរបានបញ្ជាក់ថា ក្រុមមន្ត្រីជំនាញបានទទួលស្គាល់ពីគុណភាពមួយរយភាគរយ បន្ទាប់ពីបានវាយតម្លៃលទ្ធផលរួចរាល់ ហើយក្រុមការងារក៏បានបន្ដចុះពិនិត្យមើលផ្លូវនៅតាមបណ្ដាស្រុកជាច្រើននៅក្នុងខេត្ដសៀមរាប បន្ទាប់ពីរងការខូចខាតដោយទឹកជំនន់ផងដែរ។
លោកក៏បានឲ្យដឹងដែរថា ក្នុងឆ្នាំ២០២៣នេះ គិតត្រឹមថ្ងៃទី១០ ខែតុលា ទូទាំងខេត្តសៀមរាប មានហេដ្ឋានរចនាសម្ព័ន្ធផ្លូវជនបទ និងសំណង់សិល្បការ្យ ដែលបានទទួលរងការខូចខាតដោយសារជំនន់ទឹកភ្លៀងចំនួន ៦៨ខ្សែ ប្រវែងសរុប ៥៦៥.៧៤៦ម៉ែត្រ ក្នុងនោះមានផ្លូវលិចទឹក ទឹកហូរដាច់តួផ្លូវ ទឹកច្រោះជើងទេរជាដើម៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
