ក្រុមការងាកែទម្រង់ការគ្រប់គ្រងហិរញ្ញវត្ថុសាធារណៈនៃក្រសួងកិច្ចការនារីបានរៀបចំសិក្ខាសាលាបណ្តុះបណ្តាលស្តីពី ថវិកាសមិទ្ធកម្ម ដោយមានការសម្របសម្រួលនិងធ្វើបទបង្ហាញពីគ្រូឧទ្ទេស នៃក្រសួងសេដ្ឋកិច្ច និងហិរញ្ញវត្ថុជាពិសេសគណៈកម្មាធិការដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ ក្នុងគោលបំណងអភិវឌ្ឍន៍សមត្ថភាពក្នុងការរៀបចំផែនការថវិកា ឆ្លើយតបនឹងផែនការយុទ្ធសាស្ត្រនារីរតនៈ ជូនដល់លោកជំទាវ ឯកឧត្តម លោកស្រី លោក ដែលជាថ្នាក់ដឹកនាំ និងមន្ត្រីជំនាញ ទាំងថ្នាក់ក្រសួង និងមន្ទីរកិច្ចការនារីរាជធានី-ខេត្តចំនួនជាង១៣០រូប។សិក្ខាសាលានេះមានរយៈពេលពីរថ្ងៃពីទី១៣ដល់ថ្ងៃទី១៤ខែវិច្ឆិកាឆ្នាំ២០២៣ ធ្វើឡើងនៅសណ្ឋាគារអង្គរប៉ារ៉ាឌីខេត្តសៀមរាប និងបានប្រារព្ឋពិធីបិទក្រោមអធិបតីភាព លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្រ្តីក្រសួងកិច្ចការនារី និងលោកស្រី យូ សុភាអភិបាលរងខេត្តតំណាងឯកឧត្តម ប្រាក់ សោភ័ណ អភិបាលនៃគណៈអភិបាលខេត្តសៀមរាប ។
លោកជំទាវកិត្តិបណ្ឌិត អ៊ឹង កន្ថាផាវី មានប្រសាសន៍ថា៖កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ គឺជាកម្មវិធីកែទម្រង់គន្លឹះដ៏សំខាន់មួយ ក្នុងចំណោមកម្មវិធីកែទម្រង់សំខាន់ៗរបស់រាជរដ្ឋាភិបាល ក្នុងគោលដៅ ប្រែក្លាយប្រព័ន្ធថវិកាកម្ពុជា ឆ្ពោះទៅកាន់ប្រព័ន្ធថវិកា ផ្តោតលើលទ្ធផល ឬ សមិទ្ធកម្ម និង វិមជ្ឈការ ស្របតាមស្តង់ដា និងឧត្តមានុវត្តន៍អន្តរជាតិ។
ការកែទម្រង់ការគ្រប់គ្រងហិរញ្ញវត្ថុសាធារណៈ មាន ៤ ដំណាក់កាល និង ចាប់ផ្តើមដំបូងនៅឆ្នាំ ២០០៤ ហើយបច្ចុប្បន្ន បាន ឈានដល់ដំណាក់កាលទី ៤ ក្នុងគោលដៅ ការបង្កើនគណនេយ្យភាពសមិទ្ធកម្ម ដែលជាដំណាក់កាលចុងក្រោយ និងត្រូវបានប្រកាសដាក់ឱ្យអនុវត្តជាផ្លូវការ កាលពីថ្ងៃទី ២០ ខែ មីនា ឆ្នាំ ២០២៣ កន្លងទៅនេះ។លោកជំទាវ រដ្ឋមន្ត្រី បានបញ្ជាក់ផងដែរថា៖ក្រសួងកិច្ចការនារី តែងបានចាត់ទុកថា ការកសាង និងការអភិវឌ្ឍ សមត្ថភាពមន្ត្រីរាជការ លើជំនាញសំខាន់ៗ ជាពិសេសការរៀបចំផែនការថវិកា ឆ្លើយតបនឹងយេនឌ័រ គឺជាកត្តាចាំបាច់ និងមិនអាចខ្វះបានសម្រាប់គាំទ្រ និងអនុវត្តផែនការយុទ្ធសាស្ត្រនារីរតនៈ សំដៅចូលរួមចំណែកលើកកម្ពស់កម្រិតជីវភាព និងបង្កើតប្រសិទ្ធភាពនៃការបម្រើសេវាជូនប្រជាជន។
ក្នុងន័យនេះ, ជាមួយនឹងការទទួលបាននូវសិទ្ធិអំណាចក្នុងការគ្រប់គ្រងធនធានហិរញវត្ថុរបស់ខ្លួន ក្រសួងកិច្ចការនារី នឹងត្រូវមានការទទួលខុសត្រូវខ្ពស់ លើការប្រើប្រាស់ថវិកាប្រកបដោយប្រសិទ្ធភាព និងសក្តិសិទ្ធិភាព ព្រមទាំងចំគោលដៅ ដែលបានកំណត់ ដើម្បីសម្រេចឱ្យបានលទ្ធផលតាមការរំពឹងទុក យើងក៏នឹងពិនិត្យឡើងវិញលើរចនាសម្ព័ន្ធកម្មវិធី ជាពិសេសយកចិត្តទុកដាក់កែលម្អសូចនាករសមិទ្ធកម្ម នៅតាមកម្រិតកម្មវិធី អនុកម្មវិធី និងចង្កោមសកម្មភាព ក្នុងគោលបំណងបង្កើនគុណភាពនៃការរៀបចំផែនការយុទ្ធសាស្ត្រថវិកា (BSP) ក៏ដូចជាប្រសិទ្ធភាពក្នុងការរៀបចំផែនការថវិកាប្រចាំឆ្នាំ។គួរកត់សម្គាល់ផងដែរថា ការកែទម្រង់ការគ្រប់គ្រងហិរញ្ញវត្ថុសាធារណៈ នៅក្នុងដំណាក់កាលទី៤ នេះ រាជរដ្ឋាភិបាល បានផ្ទេរសិទ្ធិអំណាច ភាពជាម្ចាស់ និងការទទួលខុសត្រូវ កាន់តែច្រើនឡើងដល់ក្រសួង ស្ថាប័ន និង មន្ទីរអង្គភាពជំនាញក្រោមឱវាទ រួមទាំងរដ្ឋបាលថ្នាក់ក្រោមជាតិ ក្នុងការរៀបចំ និងការអនុវត្តថវិកាកម្មវិធីពេញលេញ។
ការផ្លាស់ប្តូរនេះ ទាមទារឱ្យគ្រប់ ក្រសួង ស្ថាប័ន ចាំបាច់ត្រូវបង្កើនការយកចិត្តទុកដាក់ខ្ពស់ថែមទៀត លើការពង្រឹងពង្រីកសមត្ថភាព និងជំនាញវិជ្ជាជីវៈ ជូនមន្ត្រីជំនាញហិរញ្ញវត្ថុសាធារណៈ។ លើសពីនេះ ច្បាប់ស្តីពីប្រព័ន្ធហិរញ្ញវត្ថុសាធារណៈថ្មី ក្នុងមាត្រា ១៤ ចែងថា “មន្ត្រីរាជការជំនាញហិរញ្ញវត្ថុសាធារណៈ នៃក្រសួង ស្ថាប័ន អង្គភាពសាធារណៈប្រហាក់ប្រហែល រដ្ឋបាលថ្នាក់ក្រោមជាតិ និង គ្រឹះស្ថានសាធារណៈរដ្ឋបាល ដែលមានភារកិច្ចអនុវត្តការងារហិរញ្ញវត្ថុសាធារណៈ ត្រូវមានគុណវវិជ្ជាជីវៈ តាមប្រភេទមុខតំណែងការងារនីមួយៗ។
ការណ៍នេះ ឆ្លុះឱ្យឃើញពីតម្រូវការចាំបាច់ ក្នុងការកសាង និងការអភិវឌ្ឍសមត្ថភាពមន្ត្រីរាជការ សម្រាប់ចូលរួមចំណែកអនុវត្តការកែទម្រង់ការគ្រប់គ្រងហិរញ្ញវត្ថុសាធារណៈ ឱ្យសម្រេចគោលដៅ ប្រកបដោយប្រសិទ្ធភាព និងចីរភាព៕
អត្ថបទ និង រូបភាព ៖ លោក យូ វង្ស
