នៅព្រឹកថ្ងៃទី២០ ខែវិច្ឆិកា ឆ្នាំ២០២៣នេះ សាលាសណ្ឋាគារ និងទេសចរណ៍ ប៉ូលឌុយប៊្រូល ជាសាលាបណ្តុះបណ្តាលជំនាញវិជ្ជាជីវៈដំបូងគេបង្អស់នៅក្នុងពិភពលោក ដែលទទួលជ័យលាភីអាជ្ញាបណ្ណទង់បៃតង វិញ្ញាបនបត្រ បរិវេណអេកូឡូស៊ី ពីស្ថាប័នមូលនិធិអប់រំបរិស្ថាន (FEE) ដែលជាសណ្ឋាគារ និងសាលាដែលមិនមានការប្រើប្រាស់សម្ភារៈប្លាស្ទីក។
លោក Pramod Kumar Sharma នាយកជាន់ខ្ពស់ផ្នែកអប់រំ នៃស្ថាប័នមូលនិធិអប់រំបរិស្ថាន បានឲ្យដឹងថា ស្ថាប័នមូលនិធិអប់រំបរិស្ថាន (FEE) គឺជាអង្គការអន្តរជាតិ ដែលបង្កើតឡើងដើម្បីឧទ្ទិសដល់ការអប់រំសម្រាប់ការអភិវឌ្ឍន៍ប្រកបដោយចីរភាព (ESD) មានសមាជិកជាង១០០ នឹងកំពុងធ្វើការនៅក្នុង៨១ប្រទេស ហើយមូលនិធិនេះ បានផ្តល់នូវសិទ្ធសេរីភាពដល់មនុស្សឲ្យធ្វើសកម្មភាពប្រកបដោយអត្ថន័យ និងមានគោលបំណងដើម្បីបង្កើតនិរន្តរភាពពិភពលោក ដែលឲ្យមានលក្ខណៈប្រសើរជាងមុន។
ថ្លែងក្នុងពិធីប្រគល់ជ័យលាភី អភិបាលរងខេត្តសៀមរាប លោកស្រី ម៉ននី រងី្ស បានគូសបញ្ជាក់ថា ក្រោមកិច្ចដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្រ្តី បានដាក់ចេញនូវយុទ្ធសាស្រ្តបញ្ចកោណដំណាក់កាលទី១ នីតិកាលទី៧ ដូចជាផែនការយុទ្ធសាស្រ្តជាគន្លឹះជាច្រើន ដើម្បីឆ្លើយតបនិងដោះស្រាយបញ្ហាប្រឈមផ្សេងៗ ជាពិសេសគឺជម្រុញដល់ការរីកចម្រើននូវសេដ្ឋកិច្ចរបស់ប្រទេសជាតិ។ ក្នុងនោះវិស័យដែលលេចធ្លោជាងគេនោះ គឺវិស័យទេសចរណ៍ ដោយហេតុថាខេត្តសៀមរាប គឺជាទឹកដីនៃសម្បត្តិបេតិកភណ្ឌវប្បធម៌ពិភពលោកដ៏អស្ចារ្យ ដែលជាស្នាដៃដ៏ល្អឯកបន្សល់ទុកពីបុព្វបុរសខ្មែរយើង និងជាទឹកដីពោរពេញទៅដោយរមណីយដ្ឋានទេសចរណ៍វប្បធម៌ និងប្រវត្តិសាស្រ្តធម្មជាតិដ៏ច្រើនសន្ធឹកសន្ធាប់ ដែលជម្រុញឲ្យតំបន់សៀមរាប-អង្គរនេះ ក្លាយជាទិសដៅទេសចរណ៍ដ៏ទាក់ទាញ សម្រាប់ភ្ញៀវទេសចរជាតិ-អន្តរជាតិ គ្រប់មជ្ឈដ្ឋានជុំវិញពិភពលោក ចូលមកទស្សនាកម្សាន្ត។
ព័ត៌មានជាតិ ថ្មីៗ
ឯកឧត្តមបណ្ឌិត ពេជ សោភ័ន ទេសរដ្ឋមន្រ្តីទទួលបន្ទុកបេសកកម្មពិសេស មានប្រសាសន៍ថា ការទទួលបានរង្វាន់ទង់បៃតង វិញ្ញាបនបត្រ បរិវេណអេកូឡូស៊ី របស់សាលាសណ្ឋាគារ និ ទេសចរណ៍ ប៉ូលឌុលប៊្រូល នាពេលនេះ គឺត្រូវពឹងផ្អែកលើការវាយតម្លៃរបស់មូលនិធិសម្រាប់ការអប់រំបរិស្ថាន ដែលបានកំណត់ទៅលើការចូលរួមជាមួយសិស្សនៅក្នុងសកម្មភាពរួមគ្នាដើម្បីលើកកម្ពស់ជីវចម្រុះ ការអភិរក្សនិងនិរន្តរភាពនៅក្នុងសាលារៀន និងសហគមន៍។ ការអប់រំអំពីបញ្ហាសម្រាម និងកាកសំណល់ ដែលផ្តល់សិទ្ធិអំណាចដល់ពួកគេក្នុងការជំរុញការផ្លាស់ប្តូរ អាកប្បកិរិយាជាវិជ្ជមាន លើកកម្ពស់ការអប់រំ និងការអភិរក្សព្រៃឈើ និងលើកកម្ពស់ការអនុវត្តប្រកបដោយនិរន្តរភាព នៅក្នុងឧស្សាហកម្មបដិសណ្ឋារកិច្ច។ ក្នុងនោះដែរ រាជរដ្ឋាភិបាលកម្ពុជា នីតិកាលទី៧ បានផ្តោតសំខាន់ឆ្ពោះទៅការកសាងបណ្តុះបណ្តាលនូវធនធានមនុស្សនៅកម្ពុជា សំដៅក្នុងកិច្ចអភិវឌ្ឍប្រទេសឲ្យមានភាពជឿលឿន ដូចបណ្តាប្រទេសលើពិភពលោក ព្រមទាំងផ្តល់នូវយន្តការមួយដ៏មានសារៈសំខាន់ក្នុងចំណោមយន្តការ និងវិធានការជាច្រើនទៀតដែលអ្នកពាក់ព័ន្ធទាំងអស់បានខិតខំជម្រុញអនុវត្តន៍ជាបន្តបន្ទាប់ សំដៅធ្វើឲ្យប្រសើរឡើងនូវកិច្ចគាំពារបរិស្ថាន ការការពារធនធានធម្មជាតិ ការអភិរក្សជីវៈចម្រុះ និងការរស់នៅដោយចីរភាព តាមរយៈការបញ្រ្ជាបចំណេះដឹង និងចំណេះធ្វើ និងមានលក្ខណៈងាយស្រួលក្នុងការផ្លាស់ប្តូរទម្លាប់ ផ្នត់គំនិត និងឥរិយាបថទាំងស្ថាប័នរដ្ឋ វិស័យឯកជន ចំពោះអនាម័យ និងបរិស្ថាន។
ឯកឧត្តមបណ្ឌិត គូសបញ្ជាក់ថា តាមរយៈកម្មវិធីមូលនិធិសម្រាប់ការអប់រំបរិស្ថាន សាលាសណ្ឋាគារ និងទេសចរណ៍ ប៉ូលឌុលប្រ៊ូល ត្រូវបានលែងមានការប្រើប្រាស់សម្ភារៈប្លាស្ទីក ដែលធ្វើឲ្យសាលាមួយនេះ បានទទួលរង្វាន់ទង់បៃតង វិញ្ញាបនបត្រ បរិវេណអេកូឡូស៊ី ឯកឧត្តមបណ្ឌិត ក៏បានអំពាវនាវដល់សិស្ស ក៏ដូចថ្នាក់ដឹកនាំទាំងអស់ ចូលរួមលើការផ្សព្វផ្សាយអំពីបញ្ហាបរិស្ថាន អនាម័យ សុខភាព ដល់ប្រជាពលរដ្ឋ ពីផលប៉ពាល់នៃការប្រើប្រាស់ប្លាស្ទីក ក៏ដូចជាឧបករណ៍ផ្សេងៗ ដែលធ្វើ ឲ្យប៉ះពាល់ដល់បរិស្ថានភពផែនដីទៀតផង៕
អត្ថបទ និងរូបភាព៖ លោក ម៉ី សុខារិទ្ធ , បូ សាវី
កែសម្រួល៖ លោក អ៊ុន ណារាជ្យ
