នៅរសៀលថ្ងៃទី២២ ខែវិច្ឆិកា ឆ្នាំ២០២៣នេះ នៅខេត្តសៀមរាប អង្គការ អាដដា(ADDA ) បានរៀបចំ សន្និសីទស្តីពី“ការផ្សារភ្ជាប់ទីផ្សារកសិកម្មឆ្លាតវៃ និងទីផ្សារផលិតផលកសិកម្ម” ក្រោមកិច្ចសហការពីក្រសួងកសិកម្ម រុក្ខាប្រមាញ់ និងនេសាទ និងរដ្ឋបាលខេត្តសៀមរាប។ សន្និសីទនេះ មានគោលបំណងចែករំលែកលទ្ធផលការអនុវត្តកសិកម្មឆ្លាតវៃ និងផ្សារភ្ចាប់បណ្ដាញទំនាក់ទំនងជាមួយស្ថាប័នរដ្ឋ វិស័យឯកជន ដៃគូអភិវឌ្ឍន៍ ដើម្បីជួយលើកកម្ពស់ជីវភាពកសិករក្រីក្រ ដែលបច្ចុប្បន្នកសិករដែលកំពុងចូលរួមជាមួយគម្រោងមានជាង ១១ ០០០គ្រួសារ។
តំណាងឯកឧត្តម អភិបាលខេត្តសៀមរាប លោក អ៊ឹង គឹមលាង អភិបាលរងខេត្ត លើកឡើងថា សន្និសីទនេះ ពិតជាមានសារៈសំខាន់ស្របនឹងគោលដៅអភិវឌ្ឍន៍ប្រកបដោយចីរភាពរបស់អង្គការសហប្រជាជាតិ(SDGs) ដែលបាននឹងកំពុងដឹកនាំសកម្មភាពសំខាន់ៗជុំវិញពិភពលោក រួមទាំងនៅកម្ពុជាផងដែរ។ ក្រោមការដឹកនាំ របស់សម្តេចអធិបតី ហ៊ុន ម៉ាណែត នាយករដ្ឋមន្ត្រី យុទ្ធសាស្ត្រសំខាន់មួយក្នុងបញ្ចកោណទី៤ នៃ«យុទ្ធសាស្ត្របញ្ចកោណ»ដំណាក់កាលទី១ គឺ “ ការអភិវឌ្ឍប្រកបដោយភាពធន់ ចីរភាព និង បរិយាប័ន្ន ” ដែលមានបំណងលើកកម្ពស់ការគ្រប់គ្រងប្រកបដោយនិរន្តរភាពនៃធនធានធម្មជាតិ ការអភិវឌ្ឍន៍កសិកម្ម និងជនបទ និរន្តរភាពបរិស្ថាន និងការត្រៀមខ្លួនសម្រាប់ការឆ្លើយតបទៅនឹងការប្រែប្រួលអាកាសធាតុ សេដ្ឋកិច្ចបៃតង ក្នុងចំណោមប្រទេសដទៃទៀត។
ព័ត៌មានជាតិ ថ្មីៗ
លោក អភិបាលរងខេត្ត បញ្ជាក់ថា ការអនុវត្តគម្រោងអភិវឌ្ឍន៍សហគមន៍របស់អង្គការ ADDA និងដៃគូសហការកន្លងមក សុទ្ធតែជាការងារចំាបាច់ និងបន្ទាន់ដែលរាជរដ្ឋាភិបាលកំពុងយកចិត្ត លើកកម្ពស់ក្នុងការអភិវឌ្ឍន៍ ដោយឡែក“ក្រុមប្រឹក្សាគោលនយោបាយអភិវឌ្ឍន៍សហគមន៍កសិកម្ម” ដែលរាជរដ្ឋាភិបាលបានបង្កើតឡើង មានការចូលរួមពី ក្រសួងជំនាញពាក់ព័ន្ធជាច្រើន និង ឯកឧត្តមអភិបាលខេត្តនីមួយៗ ជាប្រធានដឹកនាំក្រុមគោលនយោបាយនេះ។
លោកស្រី បូឌីល ផាលេសសិន (Bodil Pallesen) នាយិកាអង្គការ អាដដា(ADDA ) បង្ហាញថា ដើម្បីជំរុញ បណ្ដាញទំនាក់ទំនងសម្រាប់កសិករ អង្គការអាដដា បានសហការរៀបចំជាមួយ អង្គការក្រេត (GRET) អង្គការអាគ្រីស៊ុត (Agrisud) អង្គការបន្ទាយស្រី គណៈកម្មការប្រតិបត្តិការ ដើម្បីកម្ពុជា (CCC) អង្គការនើឆ័រ (Nurture) ធនាគារវីង (Wing) និងមីក្រូហិរញ្ញវត្ថុចម្រើន។ ការចូលរួមរបស់អ្នកពាក់ព័ន្ធទាំងនេះ បានលើកទឹកចិត្តទៅដល់ កសិករ ក៏ដូចជាចូលរួមជាមួយអាជ្ញាធរ ក្នុងការពង្រីកបណ្ដាញជួយដល់កសិករផងដែរ ខណៈកសិករសមាជិកដែលកំពុងទទួលផលមានជាង ១១ ០០០គ្រួសារ។
លោកស្រីនាយិកា បញ្ជាក់ថា អង្គការអាដដា មានកិច្ចសហការយ៉ាងល្អ ជាមួយរាជរដ្ឋាភិបាលកម្ពុជា និងអាជ្ញាធរមូលដ្ឋាន ក្នុងនោះអង្គការទទួលបានជោគជ័យលើការ ផ្ទេរចំណេះដឹងអំពីការអនុវត្តកសិកម្មល្អបំផុតដល់ជនក្រីក្រនៅជនបទ ផ្តល់ជំនួយផ្នែកទីផ្សារ កែលម្អឱកាសអាជីវកម្ម បង្កើតក្រុមជួយខ្លួនឯង (SHGs) សហគមកសិកម្ម (ACs) និងសហភាពកសិកម្មខេត្ត (PACUs)។ លោកស្រី ក៏បានសំណូមពរដល់ រាជរដ្ឋាភិបាលកម្ពុជា និងស្ថាប័ន្ធពាក់ព័ន្ធ ផ្ដល់ការគាំទ្របន្ថែមទៀតដល់អង្គការ អាដដា និងដៃគូ ដើម្បីធ្វើឱ្យប្រជាជនក្រីក្រកាន់តែមានជីវភាពល្អប្រសើរ និងដោះស្រាយបបញ្ហាប្រឈមនៃការប្រែប្រួលអាកាសធាតុ។
គួរជម្រាបថា អាដដា (ADDA) ជាអង្គការអន្តរជាតិ មិនរកប្រាក់ចំណេញ បង្កើតឡើងក្នុងឆ្នាំ១៩៩៤។ អង្គការនេះ បានចូលរួមការអភិវឌ្ឍន៍កសិកម្មនៅក្នុងប្រទេសកម្ពុជាចាប់តាំងពីឆ្នាំ១៩៩៦។ ចាប់តាំងពីឆ្នាំ ២០០៥ មក អង្គការអាដដា (ADDA) និងដៃគូ កំពុងដំណើរគម្រោងអភិវឌ្ឍន៍ចំនួន២ គឺគម្រោងអនុវត្តកសិកម្មឆ្លាតវៃ (CSA) និង គម្រោងពង្រឹងសមត្ថភាពសហគមន៍កសិកម្ម និងលើកកម្ពស់ជីវភាពប្រជាជនក្រីក្រនៅទីជនបទ (EDRO) ដែលអនុត្តន៍ក្នុងខេត្តសៀមរាប និងឧត្តរមានជ័យ។
រូបភាព៖ លោក ធន់ ពូថេ
អត្ថបទ៖ លោក សេង ផល្លី
