នៅព្រឹកថ្ងៃទី២៣ ខែវិច្ឆិកា ឆ្នាំ២០២៣នេះ ក្រសួងបរិស្ថាន បានសហការជាមួយរដ្ឋបាលខេត្តសៀមរាប ប្រារព្ឋទិវាអនាម័យបរិស្ថានជាតិ ២៣ វិច្ឆិកា ក្រោមប្រធានបទ “ ភូមិឋានស្អាត បរិស្ថានស្អាត សង្គមសន្តិភាព សេដ្ឋកិច្ចរីកចម្រើន ”នាបរិវេណសួនច្បារមុខព្រះរាជដំណាក់ក្រុងសៀមរាប ក្រោមអធិបតីភាពលោកជំទាវ មាស ច័ន្ទធីតា អនុរដ្ឋលេខាធិការ ក្រសួងបរិស្ថាន រួមនឹងវត្តមានលោក អ៊ឹង គឹមលាង អភិបាលរងខេត្តសៀមរាប ដោយមានការចូលរួមពីថ្នាក់ដឹកនាំ មន្ត្រីរាជការក្នុងខេត្ត កងកម្លាំងប្រដាប់អាវុធគ្រប់ប្រភេទ អាជ្ញាធរមូលដ្ឋាន លោកគ្រូ-អ្នកគ្រូ និស្សិត សិស្សានុសិស្សជាច្រើនរូប។
លោក អ៊ឹង គឹមលាង មានប្រសាសន៍ថា ទិវាអនាម័យបរិស្ថានជាតិ ពិតជាមានសារៈសំខាន់និងក៏ជាសារបំផុសស្មារតីរបស់បងប្អូនប្រជាពលរដ្ឋទាំងអស់ ដើម្បីចូលរួមចំណែក្នុងការអនុវត្តសម្រេចឱ្យបាននូវកម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល និងយុទ្ធសាស្ត្រចក្រាវិស័យបរិស្ថានរបស់ក្រសួងបរិស្ថាន ខណៈដែលរដ្ឋបាលខេត្តសៀមរាបបាននឹងកំពុងចូលរួមអនុវត្ត និងសម្របសម្រួលដៃគូអភិវឌ្ឍន៍ រដ្ឋបាលក្រុងស្រុក មន្ទីរ-អង្គភាព អង្គការសង្គមស៊ីវិល និងវិស័យឯកជន ក្នុងការអនុវត្តសកម្មភាពការងារយ៉ាងសកម្ម និងទទួលខុសត្រូវខ្ពស់លើកិច្ចគាំពារបរិស្ថាន ការអភិរក្សជីវចម្រុះ និងការរស់នៅដោយចីរភាព។
ព័ត៌មានជាតិ ថ្មីៗ
លោកអភិបាលរងខេត្តជឿជាក់យ៉ាងមុតមាំថា តាមរយៈការប្រារព្វទិវាអនាម័យបរិស្ថានជាតិ ២៣ វិច្ឆិកា នេះ នឹងប្រែក្លាយទៅជាសកម្មភាពមួយឱ្យយើងទាំងអស់គ្នាបានយល់ពីករណីកិច្ច របស់ខ្លួនចំពោះបរិស្ថាន ចាត់ទុកបញ្ហាបរិស្ថានជាបញ្ហារួមរបស់យើងទាំងអស់គ្នា និងជាសកម្មភាពមួយលើកទឹកចិត្ត និងជម្រុញឱ្យយើងទាំងអស់គ្នាបង្កើនឆន្ទៈរបស់ខ្លួន ដើម្បីបុព្វហេតុចូលរួមធ្វើអនាម័យបរិស្ថានជាតិ។
លោកជំទាវ មាស ច័ន្ទធីតា មានប្រសាសន៍ថា ការរៀបចំទិវានេះ គឺជាការឆ្លុះបញ្ចាំងពីការបំពេញតួនាទីភារកិច្ចនិងបេសកកម្មរៀងៗខ្លួនក្នុងស្មារតីរួមចំណែកដើម្បីបុព្វហេតុគាំពារបរិស្ថាន ការគ្រប់គ្រងធនធានធម្មជាតិ ការអភិរក្សជីវចម្រុះនិងការអភិវឌ្ឃដោយចេរភាព ដើម្បីឈានទៅសម្រេចបានលើក្របខ័ណ្ឌការងារវិស័យបរិស្ថានក្រសួងបរិស្ថាន បានដាក់ចេញនូវយុទ្ធសាស្ត្រចក្រាវិស័យបរិស្ថាន ឆ្នាំ២០២៣-២០២៨ ដោយផ្អែកតាមកម្មវិធីនយោបាយរបស់រាជរដ្ឋាភិបាលកម្ពុជា នីតិកាលទី៧ និងស្របតាមយុទ្ឋសាស្ត្របញ្ចកោណដំណាក់កាលទី១ផងដែរ។
លោកជំទាវ អនុរដ្ឋលេខាធិការ មានប្រសាសន៍ទៀតថា យុទ្ឋសាស្ត្រចក្រាត្រូវបានរៀបចំឡើងក្នុងគោលបំណងតម្រង់ទិសនិងចង្អុលបង្ហាញការងារអាទិភាព លើកកម្ពស់កិច្ចគាំពារបរិស្ថាន ការការពារធនធានធម្មជាតិ និងការអភិវឌ្ឃប្រកបដោយចេរភាពក្នុងមុំសំខាន់ៗចំនួន៣ គឺភាពស្អាត ភាពបៃតង និងចេរភាព សំដៅសម្រេចឱ្យបាននូវគោលដៅយុទ្ធសាស្ត្របញ្ចកោណ គឺជាប្រទេសអព្យាក្រឹតកាបូន នៅឆ្នាំ២០៥០ ដែលយុទ្ឋសាស្ត្រនេះត្រូវបានប្រើប្រាស់សម្រាប់ជាផែនទីបង្ហាញផ្លូវក្នុងការអនុវត្តឱ្យចំគោលដៅអាទិភាព ផ្តល់សេវាសាធារណៈឱ្យចំតម្រូវការរបស់សាធារណជន និងប្រែក្លាយសក្តានុពលវិស័យបរិស្ថានឱ្យទៅជាឧត្តមប្រយោជន៍បំរើដល់ប្រជាពលរដ្ឋកម្ពុជាគ្រប់ៗជំនាន់៕
អត្ថបទ និងរូបភាព៖ លោក យូ វង្ស
កែសម្រួល៖ លោក លីវ សាន្ត
