បណ្ណាល័យសិក្សាមួយខ្នង ដែលជាអំណោយរបស់សប្បុរសជនប្រទេសកូរ៉េ ត្រូវបានដាក់ឲ្យប្រើប្រាស់ជាផ្លូវការ នៅថ្ងៃទី២៣ ខែវិច្ឆិកា ឆ្នាំ២០២៣នេះ ក្នុងវិទ្យាល័យ ហ៊ុន សែន រុនតាឯក ស្រុកបន្ទាយស្រី ខេត្តសៀមរាប ដើម្បីជាការចូលរួមក្នុងការអភិវឌ្ឍន៍វិស័យអប់រំនៅកម្ពុជា និងខេត្តសៀមរាប ជាពីសេសប្អូនៗសិស្សានុសិស្សដែលបានផ្លាស់ប្ដូរទីលំនៅពីតំបន់រមណីយដ្ឋានអង្គរ ទៅរស់នៅភូមិធម្មជាតិរុនតាឯក។
លោកស្រី ផាក មិនជូ តំណាងសប្បុរសជនកូរ៉េ មានប្រសាសន៍ថា គម្រោងបណ្ណាល័យកុមារ ផារ៉ុត ផារ៉ុត នៃប្រទេសកូរ៉េខាងត្បូង បានបើកសម្ភោធបណ្ណាល័យនៅក្នុងវិទ្យាល័យ ហ៊ុន សែន រុនតាឯក មានគោលបំណងអភិវឌ្ឍវប្បធម៌អប់រំ ពិសេសឱ្យកុមារធ្វើអំណានឱ្យបានច្រើន។ គម្រោងបណ្ណាល័យនេះ និងបន្ដធ្វើនៅខេត្តសៀមរាប ដើម្បីជួយដល់កុមារនៅជនបទដែលមានជីវភាពខ្វះខាត មិនមានសៀវភៅអាន។ នៅក្នុងបណ្ណាល័យមានសៀវភៅជាច្រើនភាសារ រួមមាន ភាសារខ្មែរ ភាសារអង់គ្លេស ភាសារកូរ៉េ និងមានរូបភាពជាច្រើនទៀត ខណៈដែលក្រុមការងារធ្វើការនៅបណ្ណាល័យសុទ្ធសឹងជាអ្នកនិពន្ធ។ ជាមួយនោះលោកស្រី និងក្រុមការងារបានសម្ដែងការសប្បាយចិត្ដខ្លាំង បន្ទាប់បានពីបើកបណ្ណាល័យសម្រាប់កុមារនៅក្នុងប្រទេសកម្ពុជា ដែលសរុបមកដល់ពេលនេះមានចំនួនជាង២០បណ្ណាល័យហើយនៅក្នុងខេត្ដសៀមរាប ដែលបណ្ណាល័យនេះភាគច្រើននៅតាមជនបទ។
លោក ហួត ម៉េងហួង គណៈគ្រប់គ្រងវិទ្យាល័យហ៊ុន សែន រុនតាឯក បានលើកឡើងថា ការផ្ដល់បណ្ដាល័យនេះ មានសារៈសំខាន់ណាស់សម្រាប់សិស្សានុសិស្សប្រមាណជាង ៥០០នាក់ ដែលបានផ្លាស់ប្ដូរទីសាលារៀនពីតំបន់រណីយដ្ឋានអង្គរ ទៅរៀននៅវិទ្យាល័យនោះ ខណៈដែលអាណាព្យាបាលពួកគាត់បានដូរទីលំនៅទៅរស់នៅទីនោះដែរ។ លោកថា បណ្ណាល័យមួយនេះ បង្កើតឡើងនៅក្នុងសាលារៀនដែលមានបន្ទប់នៅអាគារសិក្សា ហើយមានសៀវភៅអានច្រើនភាសារ ដូចជាភាសាខ្មែរ ភាសាកូរ៉េ និងភាសារអង់គ្លេស ជាដើម ដោយលោកនឹងបើកឱ្យចូលអានពីព្រឹកដល់ល្ងាច លើកលែងតែថ្ងៃសៅរិ៍និងថ្ងៃអាទិត្យ។
លោកបន្ដថា ក្រោយរាជរដ្ឋាភិបាលបានអភិវឌ្ឍន៍សាលារៀននៅទីនោះ គឺកំណើនសិស្សច្រើនឡើងនាឆ្នាំសិក្សា២០២៣នេះ ហើយលោកក៏សូមអំពាវដល់សប្បុរសជនទាំងក្នុងនិងក្រៅប្រទេសផ្ដល់ជាសៀវភៅអានសម្រាប់ដាក់នៅបណ្ដាល័យនោះបន្ថែមទៀត ដើម្បីឱ្យកុមាររៀនស្រាវជ្រាវដូចកុមារនៅទីក្រុងដែរ។
បើតាមលោកបណ្ឌិត ស៊ាន ផល្លា នាយកមជ្ឈមណ្ឌលយុវជនកម្ពុជា បានបញ្ជាក់ថា បណ្ណាល័យនេះ នឹងជួយពង្រឹងសមត្ថភាពលើផ្នែកអំណាន និងបណ្ដុះវប្បធម៌រៀនសូត្រដល់កុមារកម្ពុជា ខណៈដែលកុមារជាច្រើនរយនាក់បានផ្លាស់ប្ដូរសាលារៀន ទីលំនៅចេញពីតំបន់អង្គរទៅរស់ភូមិធម្មជាតិរុនតាឯក។ លោកថា មានតែការអប់រំទេ ដែលធ្វើឱ្យកុមារមានអនាគតល្អ សម្រាប់បំរើឱ្យសង្គមជាតិ ដែលជាកាបង្ហាញ ពីការចូលរួមចំណែកការអភិវឌ្ឍធនធានមនុស្សនៅកម្ពុជាពីសប្បុរសជន។លោកបន្ដថា ការយកចិត្តទុកដាក់លើកុមារ ជាការពង្រឹងមូលដ្ឋានគ្រឹះដល់ពួកគាត់ ដែលលោកជឿជាក់ថាកុមារកម្ពុជានឹងទទួលបានឱកាសអភិវឌ្ឍបន្ថែមទៀតយ៉ាងពិតប្រាកដ ដែលនេះនឹងគាំទ្រដល់ចុក្ខុវិស័យអប់រំរបស់កម្ពុជា៕
អត្ថបទ និងរូបភាព៖ លោក បូ សាវី
កែសម្រួល៖ លោក លីវ សាន្ត
