ពលរដ្ឋក្នុងខេត្តសៀមរាប បានបង្ហាញភាពជឿជាក់ថា ក្នុងពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក នាពេលខាងមុខនេះ ខេត្តសៀមរាប នឹងទទួលបាននូវវត្តមានអ្នកទេសចរជាច្រើនចូលមកលេងកំសាន្ត ខណៈអាជ្ញាធរខេត្តបានរៀបចំកម្មវិធីកំសាន្តជាច្រើន។
ពលរដ្ឋបានលើកឡើងថា ពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក មិនត្រឹមតែធ្វើឱ្យប្រជាពលរដ្ឋសប្បាយរីករាយ ទាក់ទាញអ្នកទេសចរប៉ុណ្ណោះទេ ថែមទាំងអាចជួយឱ្យប្រជាពលរដ្ឋទទួឡបានចំណូលក្នុងការប្រកបរបរអាជីវកម្មរបស់ខ្លួន ព្រោះពិធីបុណ្យជាតិនេះ មានលក្ខណៈបុណ្យទ្រង់ទ្រាយធំដូចថ្នាក់ជាតិដែរ និងមានការរៀបចំកន្លែងកំសាន្ដច្រើនកន្លែង ស្ដង់លក់ដូរ ការប្រគុំតន្ដ្រី និងការលេងកីឡាជាដើម។
ពលរដ្ឋបន្ដថា ការបង្កើតកម្មវិធីសប្បាយៗនេះ បង្ហាញថាប្រទេសកម្ពុជាមានការអភិវឌ្ឍន៍ពីមួយឆ្នាំទៅមួយឆ្នាំ ហើយពួកគាត់ក៏បានអំពាវដល់ប្រជាពលរដ្ឋនៅគ្រប់ទិសទីទៅកំសាន្ដនៅខេត្ដសៀមរាប ខណៈដែលទីនោះមានកន្លែងកំសាន្ដច្រើនជាពិសេសប្រាសាទអង្គរវត្ដ។
ព័ត៌មានជាតិ ថ្មីៗ
សូមជម្រាបថា អាជ្ញាធរខេត្ដសៀមរាបនេះ នឹងរៀបចំពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ព្រមទាំងបង្កើតកន្លែងកំសាន្ដសប្បាយ មានរយៈពេល៤ថ្ងៃ ចាប់ពីថ្ងៃទី២៥-២៨ ខែវិច្ឆិកា ឆ្នាំ២០២៣ នៅតាមបណ្តោយដងស្ទឹងសៀមរាប ចាប់ពីស្ពានអតីតមន្ទីរទេសចរណ៍ចាស់ រហូតដល់ស្ពានវត្តដំណាក់ ព្រមទាំងនៅតំបន់ជាច្រើនទៀតជាច្រើនទៀតក្នុងក្រុងសៀមរាប។ ចំនែកពិធីប្រណាំងទូកង នៅក្នុងសៀមរាបនេះ មានទូកចំនួន ៣២គូរ ក្នុងនោះទូកង នារីមានចំនួន៣គូរផងដែរ៕
អត្ថបទ និងរូបភាព៖ លោក បូ សាវី
កែសម្រួល៖ លោក លីវ សាន្ត
