អគាសិក្សាថ្មី១ខ្នង ស្មើ៥បន្ទប់ រួមនឹងអាងស្តុកទឹក១ បង្គន់២ ក្លោងទ្វារ និងរបងព័ទ្ធជុំវិញ នៅក្នុងនៅសាលាបឋមសិក្សា សៀង ណាំ ស្ថិតនៅភូមិប្ញស្សី ឃុំរោងគោ ស្រុកក្រឡាញ់ ខេត្តសៀមរាប ចំណាយថវិកាចំនួន ៨៥.០០០ដុល្លារ ដែលជាអំណោយរបស់ឯកឧត្តម អ្នកឧកញ៉ា បណ្ឌិត សៀង ណាំ អ្នកតំណាងរាស្ត្រមណ្ឌលសៀមរាប ,លោកស្រី ស៊ីប៊ូយ៉ា ហ៊ីសាយ៉ូ និងសប្បុរសជនជប៉ុន រួមជាមួយពលរដ្ឋរស់នៅក្នុងមូលដ្ឋានផ្ទាល់ ត្រូវបានសម្ពោធដាក់ឱ្យប្រើប្រាស់ជាផ្លូវការ នៅព្រឹកថ្ងៃទី២០ ខែវិច្ឆិកា ឆ្នាំ២០២៣នេះ។
លោក អូនីស៊ិ តូស៊ីអុ តំណាងម្ចាស់ជំនួយ មានប្រសាសន៍ថា លោកស្រី ស៊ីប៊ូយ៉ា ហ៊ីសាយ៉ូ បានទទួលមរណៈភាពហើយ តែគាត់បានបរិច្ចាគធនធានថវិកាមកដល់សមាគមសិក ព្រោះចង់ឱ្យកុមារនៅប្រទេសកម្ពុជា បានសិក្សារៀនសូត្រ មានចំណេះដឹង និងមានសមត្ថភាពដើម្បីរួមចំណែកបន្តកិច្ចអភិវឌ្ឍប្រទេសកម្ពុជាឱ្យកាន់តែរីកចម្រើនថែមទៀត ព្រោះថា ១០ឬ២០ឆ្នាំខាងមុខទៀត កុមារៗនៅទីនេះនឹងក្លាយជាអ្នកបន្តវេន ជាសសរទ្រូងដ៏រឹងមាំ និងរួមគ្នាអភិវឌ្ឍប្រទេសជាតិតពីរៀមច្បងយើង។
ក្នុងឱកាសនោះ ឯកឧត្តម អ្នកឧកញ៉ា បណ្ឌិត សៀង ណាំ មានប្រសាសន៍ថា ភូមិចំនួន៣ នៅមូលដ្ឋាននេះ រួមមានភូមិឬស្សី ភូមិល្បើក និងភូមិបុស្សធំ កន្លងមកគឺគ្មានសាលារៀនទេ ដោយក្មួយៗ ចៅៗត្រូវធ្វើដំណើរឆ្ងាយដើម្បីទៅសាលា បើក្នុងស្ថានភាពរដូវវស្សាវិញ គឺកាន់តែលំបាកក្នុងការធ្វើដំណើរទៅមក។ ដោយឃើញស្ថានភាពនេះ និងទទួលបានការស្នើសុំពីអាជ្ញាធរមូលដ្ឋាន ឯកឧត្តម ក៏បាននាំតំណាងសមាគមមកពិនិត្យទីតាំង ដើម្បីជួយសាងសង់អគារសិក្សាថ្មីនេះឡើង។
ព័ត៌មានជាតិ ថ្មីៗ
ឯកឧត្តមតំណាងរាស្ត្រ បន្តថា ទោះបីលោកស្រី ស៊ីប៊ូយ៉ា ហ៊ីសាយ៉ូ បានទទួលមរណៈភាពច្រើនឆ្នាំមកហើយ ប៉ុន្តែគាត់មានទឹកចិត្តស្រឡាញ់ប្រជាជនកម្ពុជា និងបានផ្តាំទុកពេលគាត់មរណៈភាពទៅទ្រព្យសម្បត្តិដែលមាននៅសេសសល់របស់លោកស្រី គឺឱ្យយកមកជួយប្រជាជនកម្ពុជា ជាពិសេសជួយកសាងអគារសិក្សាសម្រាប់កុមារដើម្បីគាត់បានរៀនសូត្រក្លាយជាធនធានមនុស្សប្រកបដោយសីលធម៌ មានចំណេះដឹងមានសត្ថភាពក្នុងការរួមចំណែកកសាង និងអភិវឌ្ឍសង្គមជាតិកម្ពុជា ឱ្យមានការរីចម្រើនតទៅអនាគត។
ឯកឧត្តម ក៏បានរម្លឹកផងដែរថា រយៈពេល២៣ឆ្នាំកន្លងមកនេះ មាគមសិក បានជួយឧបត្ថម្ភដល់ខេត្តសៀមរាប នៅតាមបណ្តាឃុំស្រុកមួយចំនួន មានអគារ៣៧ខ្នង សម្ភារៈសិក្សា សម្ភារៈកីឡា ជីកអណ្តូងស្នប់ចំនួន ៣.៦៤៦អណ្តូង កសាងអាង និងបណ្តាញចែកចាយទឹកស្អាត២កន្លែង នៅស្រុកជីក្រែង និងស្រុកសូទ្រនិគម។ ហើយក្នុងនោះ លោកស្រី ស៊ីប៊ូយ៉ា ហ៊ីសាយ៉ូ ក៏បានជួយកសាងអគារសិក្សាចំនួន ១១ខ្នង ក្នុងឃុំមួយចំនួននៃស្រុកក្រឡាញ់ ទៀតផង៕
អត្ថបទ និងរូបភាព៖លោក យូ វង្ស
កែសម្រួល៖ លោក អ៊ុន ណារាជ្យ
