បណ្តាក្រុមអង្គការសង្គមស៊ីវិល និងអាជ្ញាធរពាក់ព័ន្ធ បានសហការបើកយុទ្ធនាការជិះកង់ ដើម្បីលើកកម្ពស់កាអប់រំ និងចុះឈ្មោះចូលរៀន នៅតាមសាលាបឋមសិក្សាមួយចំនួនក្នុងស្រុកពួក ខេត្តសៀមរាប នាថ្ងៃទី១៩ ខែវិច្ឆិកា ឆ្នាំ២០២៣ ដើម្បីធ្វើការជំរុញដល់ឪពុកម្តាយ អាណាព្យាបាល ត្រូវប្រញាប់យកកូនៗ ជាពិសេសកុមារដែលមានពិការភាព ហើយគ្រប់អាយុដើម្បីចុះឈ្មោះឲ្យពួកគាត់បានចូលរៀន នៅក្នុងឆ្នាំសិក្សាថ្មីនេះ។
លោក សួរ ម៉ាឡៃ នាយកប្រតិបត្តិសមាគមអភិវឌ្ឍន៍បច្ចេកទេសយុវវ័យខ្មែរ តំណាងឱ្យក្រុមជិះកង់ បានឲ្យដឹងថា ក្រុមការងាររបស់កម្មវិធីជិះកង់ បានចាប់ផ្តើមបេសកម្មរបស់ខ្លួន ដោយចាកចេញពីសាលាទន្សាយ ដែលមានទីតាំងនៅសាលាបឋមសិក្សាទួលគោក កាលពីថ្ងៃទី១៣ ខែវិច្ឆិកា ហើយនឹងត្រូវបញ្ចប់នៅថ្ងៃទី២០ ខែវិច្ឆិកា ឆ្នាំ២០២២៣។ ក្រុមអ្នកជិះកង់នឹងត្រូវធ្វើដំណើរក្នុងចម្ងាយផ្លូវ ៤២៥គីឡូម៉ែត្រ ដោយឆ្លងកាត់ខេត្តកំពង់ឆ្នាំង កំពង់ធំ សៀមរាប និងបញ្ចប់នៅខេត្តបន្ទាយមានជ័យ។ កម្មវិធីជិះកង់ គឺជាយុទ្ធនាការផ្សព្វផ្សាយជាសាធារណៈ ដើម្បីបង្កើនការយល់ដឹងអំពីការការពារកុមារ និងការអប់រំរបស់អង្គការដៃគូពាក់ព័ន្ធ ក្នុងគោលបំណងអំពាវនាវ ដល់សិស្សានុសិស្សនៅទូទាំងតំបន់គោលដៅ ត្រៀមខ្លួនសម្រាប់ឆ្នាំសិក្សាថ្មី នាខែធ្នូ។
ប្រធានការិយាល័យសង្គមកិច្ច និងសុខុមាលភាពសង្គម ស្រុកពួក ខេត្តសៀមរាប លោក កឺក ពិនណារិទ្ធ បានបញ្ជាក់ថា ការជំរុញឲ្យមាតាបិតាយកកូន ជាពិសេសកូនៗដែលមានពិការភាព ដូចជាអូទីហ្សឹមជាដើម មកចុះឈ្មោះចូលរៀន គឺជាការចាំបាច់ និងមានសារសំខាន់ណាស់ ព្រោះនេះក៏ជាផ្នែកមួយនៃការពង្រីកវិស័យអប់រំរបស់កម្ពុជា។ សម្រាប់យុទ្ធនាការជិះកង់នេះ ជាយុទ្ធនាការរួមគ្នារវាងអង្គការ អេដ អេ អាកស្យុង,Foyer Lataste និងដៃគូនៅក្នុងសម្ព័ន្ធកុមារក្រៅសាលា។
លោកបន្តថា កម្មវិធីជិះកង់ គឺជាយុទ្ធនាការផ្សព្វផ្សាយជាសាធារណៈ ដើម្បីបង្កើនការយល់ដឹងអំពីការការពារកុមារ និងការអប់រំរបស់អង្គការដៃគូពាក់ព័ន្ធ ក្នុងគោលបំណងអំពាវនាវ ដល់សិស្សានុសិស្សនៅទូទាំងតំបន់គោលដៅ ត្រៀមខ្លួនសម្រាប់ឆ្នាំសិក្សាថ្មី នាខែធ្នូ។ នៅក្នុងយុទ្ធនាការនេះ អង្គការ អេដ អេ អាកស្យុង នឹងបរិច្ចាគសៀវភៅជាងមួយពាន់ក្បាលដល់សាលាគោលដៅទាំងអស់ នៅខេត្តកំពង់ឆ្នាំង កំពង់ធំ សៀមរាប និងផ្ទះសំណាញ់មួយខ្នង ដល់សាលាបឋមសិក្សាសំព័រ ដែលស្ថិតនៅស្រុកស្ទោង ខេត្តកំពង់ធំផងដែរ៕
អត្ថបទ និងរូបភាព៖លោក ជា ស្រស់
កែសម្រួល៖ លោក អ៊ុន ណារាជ្យ
