កាលពីពេលថ្មីៗនេះ វេជ្ជបណ្ឌិតជំនាញវះកាត់បីនាក់ នៃមន្ទីរពេទ្យជ័យវរ្ម័នទី៧ ឬមន្ទីរពេទ្យគន្ធបុប្ផាសៀមរាប បានធ្វើការវះកាត់ចំពោះទារកដែលមានអវៈយវៈលើសដោយជោគជ័យ និងអមដោយការសាទរយ៉ាងក្រៃលែងពីសំណាក់ពលរដ្ឋកម្ពុជា។
សម្រាប់ភាពជោគជ័យក្នុងបេសកកម្មសង្គ្រោះជីវិតកុមារកម្ពុជានេះ អគ្គនាយកមន្ទីរពេទ្យគន្ឋបុប្ផា លោកវេជ្ជបណ្ឌិត ដេនិស ឡូរ៉ង់ (Dr Denis Laurent ) បានបញ្ជាក់នៅរសៀលថ្ងៃទី១៣ ខែវិច្ឆិកា ឆ្នាំ២០២៣នេះថា ការសម្រេចបានជោគជ័យនូវបេសកកម្មសង្គ្រោះកុមារនេះគឺជាការចង់បានបំផុតរបស់លោកវេជ្ជបណ្ឌិត ប៊ីត រីចន័រ ស្ថាបនិករបស់មន្ទីរពេទ្យគន្ធបុប្ផា។ កាលពីនៅមានជីវិត លោកវេជ្ជបណ្ឌិតរីចន័រ ពិតជាចង់បាននូវវេជ្ជបណ្ឌិតជាជនជាតិខ្មែរ មានជំនាញច្បាស់លាស់អាចព្យាបាលកុមារដោយខ្លួនឯង ដោយមិនចាំបាច់មានវត្តមានគ្រូពេទ្យបរទេស។
លោកវេជ្ជបណ្ឌិតបន្តទៀតថា មកដល់សព្វថ្ងៃនេះ សមត្ថភាពរបស់វេជ្ជបណ្ឌិតខ្មែរកាន់តែមានភាពរីកចម្រើនខ្លាំង មានជំនាញច្បាស់លាស់។ ជាក់ស្តែងដូចជាការវះកាត់អវៈយវៈរបស់ទារកដែលមកពីស្រុកសំពៅលូន ខេត្តបាត់ដំបងនេះជាដើម។ កាលពីថ្ងៃទី១៧ ខែកក្កដា ឆ្នាំ២០២៣ ទារកដែលទើបនឹងកើតបាន២ថ្ងៃម្នាក់ ត្រូវបានក្រុមគ្រូពេទ្យនៃពេទ្យបង្អែកស្រុកបរវេល ខេត្តបាត់ដំបង ធ្វើការបញ្ជូនមកកាន់ផ្នែកសង្គ្រោះកុមារ នៃមន្ទីរពេទ្យជ័យវរ្ម័នទី៧ ខេត្តសៀមរាប។ បន្ទាប់ពីធ្វើការតាមដានយ៉ាងម៉ត់ចត់ ក្រុមគ្រូពេទ្យជំនាញចំនួនបីនាក់ ដែលដឹកនាំវះកាត់ដោយលោកសាស្ត្រាចារ្យ កែវ សុខា, លោកវេជ្ជបណ្ឌិតឯកទេស ប៉ុន ឡាឌីន, លោកវេជ្ជបណ្ឌិតឯកទេស អៀន សារិន បានធ្វើការវះកាត់ជួយសង្រ្គោះទារកដែលមានអវៈយវៈខុសប្រក្រតីទទួលបានជីវិតប្រប្រតីឡើងវិញបន្ទាប់ពីបានធ្វើការវះកាត់ ៤លើកដោយលើកទី១ វះកាត់យកអវៈយវៈលើ១គូរ(ដៃ)ចេញ, លើកទី២ វះកាត់ដោយចោះពោះវៀនធំ ដើម្បីឱ្យទារកបន្ទោបង់លាមកតាមចង្កេះ (colostomy)បណ្តោះអាសន្ន, លើកទី៣ វះកាត់យកអវៈយវៈក្រោម១គូរ(ជើង)ចេញ និង លើកទី៤គឺ វះកាត់យកឆ្អឹង Pubis ដែលខូចទំរង់ពីកំណើតចេញ។ បន្ទាប់ពីវះកាត់ទទួលបានជោគជ័យ ទារករូបនេះ បានចាកចេញពីមន្ទីរពេទ្យទៅផ្ទះវិញជាមួយស្ថានភាពសុខភាប្រក្រតី។
ប្រធានផ្នែកវះកាត់នៃមន្ទីរពេទ្យជ័យវរ្ម័នទី៧ លោកសាស្ត្រាចារ្យ កែវ សុខា បានមានប្រសាសន៍ថា ការសម្រេចបានជោគជ័យនេះ វាក៏អាស្រ័យបានពីការចូលរួមមិនអាចខ្វះបានពីក្រុមការងារគ្រប់ផ្នែករបស់មន្ទីរពេទ្យ។ លោកថាបើគ្មានការចូលរួមយ៉ាងយកចិត្តទុកដាក់ពីគ្រប់ផ្នែកទេ ការជួយសង្គ្រោះទារករូបនោះមិនទទួលបានជោគជ័យនេះឡើយ៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
