នៅខេត្តសៀមរាប ថ្ងៃទី១៤ ខែធ្នូ ឆ្នាំ២០២៣ ក្រសួងប្រៃសណីយ៍និងទូរគមនាគមន៍ ក្រោមកិច្ចសហការគាំទ្រមូលនិធិពីអង្គការដែនដីមនុស្សហូរឡង់ដ៍ប្រចាំនៅកម្ពុជា (TDH) បានរៀបចំសិក្ខាសាលាផ្សព្វផ្សាយអំពីសុវត្ថិភាពតាមប្រព័ន្ធអនឡាញ និងគោលការណ៍ណែនាំស្តីពីកិច្ចការពារកុមារលើប្រព័ន្ធអនឡាញសម្រាប់ក្រុមហ៊ុនបច្ចេកវិទ្យាឌីជីថលនៅកម្ពុជា សម្រាប់មន្រ្តីថ្នាក់ក្រោមជាតិ ដែលមានសិក្ខាកាម ជាថ្នាក់ដឹកនាំ និងមន្ត្រីនៃមន្ទីរប្រៃសណីយ៍និងទូរគមនាគមន៍មកពីខេត្តចំនួន១២ សរុបចំនួន ៦០នាក់។
សិក្ខាសាលានេះ រៀបចំឡើងមានគោលបំណង ពង្រឹងសមត្ថភាពបន្ថែម ដល់ថ្នាក់ដឹកនាំ និងមន្ត្រីក្នុងការទំនាក់ទំនង សហការ និងស្វែងយល់ពីបញ្ហាសុវត្ថិភាពលើប្រព័ន្ធអ៊ីនធឺណិត និន្នាការថ្មីៗ អំពីរបៀបការពារខ្លួន តួនាទី និងរបៀបសហការជាមួយក្រុមហ៊ុនបច្ចេកវិទ្យាឌីជីថល នៅក្នុងទីតាំងនៃដែនសមត្ថកិច្ចរបស់ខ្លួន ក៏ដូចជាផ្តល់នូវព័ត៌មានឆ្លើយតបចាំបាច់នៅពេលមានបញ្ហាកើតឡើង។
ព័ត៌មានជាតិ ថ្មីៗ
លោកស្រី យូ សុភា អភិបាលរងខេត្តសៀមរាប លើកឡើងថា៖ បច្ចុប្បន្នប្រព័ន្ឋបច្ចេកវិទ្យាឌីជីថល រួមទាំងអ៊ីនធឺណិត បានផ្លាស់ប្ដូរទៅលើរបៀបរបបរស់នៅប្រចាំថ្ងៃរបស់មនុស្សទូទាំងពិភពលោក។ ទោះបីជា ប្រជាពលរដ្ឋមួយចំនួនមិនមានលទ្ធភាពប្រើប្រាស់អ៊ីនធឺណិតដោយផ្ទាល់ខ្លួនក៏ដោយ ក៏ពួកគេអាចទទួលឥទ្ធិពល និងផលប្រយោជន៍ពីការវិវត្តន៍របស់បច្ចេកវិទ្យាឌីជីថលតាមបែបខុសគ្នាៗ។ ក្នុងនោះ កុមារជាផ្នែកដែលទទួលរងឥទ្ធិពលខ្លាំងពីការផ្លាស់ប្ដូរប្រព័ន្ឋបច្ចេកវិទ្យាឌីជីថល ពិសេសអំឡុងពេលរីករាលដាលនៃជំងឺកូវីដ-១៩ ជាពេលដែលកុមារបានបញ្ចូលនូវបច្ចេកវិទ្យាទៅក្នុងជីវិតរស់នៅរបស់ពួកគេ ក្នុងអត្រាមួយដែលមិនធ្លាប់មានពីមុនមក។ ដំណើរការនេះបង្ហាញឱ្យឃើញ យ៉ាងច្បាស់ពីអត្ថប្រយោជន៍ និងឱកាសដែលនាំយកបច្ចេកវិទ្យាចូលមកក្នុងជីវិតរបស់កុមារ។
លោកស្រី អភិបាលរង ក៏បានលើកឡើងផងដែរ ទន្ទឹមនឹងផលវិជ្ជមានពីបច្ចេកវិទ្យាឌីជីថល យើងក៏បានទទួលរងផលជាអវិជ្ជមានមួយចំនួនផងដែរ ពីបច្ចេកវិទ្យាឌីជីថល រួមទាំងអ៊ីនធើណិត ដោយមានជនទុច្ចរិតមួយចំនួន បានឆក់ឱកាសប្រព្រឹត្តបទល្មើស រំលោភបំពាន ការកេងប្រវ័ញ្ចផ្លូវភេទទៅលើកុមារតាមរូបភាពផ្សេងៗ ។
លោកស្រី Zoe de Melo ប្រធានគ្រប់គ្រងកម្មវិធីប្រចាំតំបន់ នៃអង្គការដែនដីមនុស្សហូរឡង់ដ៍ប្រចាំនៅកម្ពុជា ( Terre Des Hommes)ទទួលស្គាល់ពីបញ្ហាដែលកើតឡើងលើកុមារ មិនថាតែកម្ពុជានោះទេ កុមារនៅលើពិភពលោកក៏រងនូវការបោកបញ្ឆោតតាមប្រព័ន្ឋអនឡាញផងដែរ។ ពាក់ព័ន្ឋទៅនឹងបញ្ហានេះ អង្គការដែនដីមនុស្សហូរឡង់ដ៍ ប្រចាំនៅកម្ពុជា បានរួមចំណែកក្នុងការងារ ការការពារកុមារកម្ពុជាពីការឆបោកតាមប្រព័ន្ឋអនឡាញនៅឆ្នាំ២០១៧ ដោយបានសហការជាមួយក្រុមប្រឹក្សាជាតិដើម្បីកុមារ និងបានជួយគាំទ្រជាមួយអង្គការដៃគូផ្សេងៗទៀត តាមរយៈការផ្សព្វផ្សាយកម្មវិធី និងចំណេះដឹងផ្សេងៗពាក់ព័ន្ឋនឹងកិច្ចគាំពារ និងការពារកុមារពីការឆបោកតាមប្រព័ន្ឋអនឡាញ។
លោកស្រី Zoe de Melo បានស្នើដល់ ក្រុមហ៊ុនបច្ចេកវិទ្យាឌីជីថលនៅកម្ពុជា និងក្រុមហ៊ុនឯកជនពាក់ព័ន្ធឯទៀត សូមចូលរួមសហការឱ្យបានជិតស្និទ្ឋជាមួយ ក្រសួងប្រៃសនីយ៍ និងទូរគមនាគមន៍ ដើម្បីជួយជនរងគ្រោះដោយសារការបោកបញ្ឆោតតាមប្រព័ន្ឋបច្ចេកវិទ្យាឌីជីថល។
ថ្លែងក្នងឱកាសនោះ ឯកឧត្ដម ជុន វ៉ាត រដ្ឋលេខាធិការក្រសួងប្រៃសណីយ៍ និងទូរគមនាគមន៍ បញ្ជាក់ថា៖ ថ្មីៗនេះក្រសួង បានអនុម័តនូវគោលការណ៍ណែនាំ ចំពោះក្រុមហ៊ុនបច្ចេកវិទ្យាឌីជីថលទាំងអស់ ត្រូវចូលរួមអនុវត្តន៍នូវកិច្ចការមួយចំនួន ដើម្បីរក្សាសុវត្ថិភាពកុមារលើប្រព័ន្ធអនឡាញ។ ជាមួយគ្នានេះ ក្រសួង ក៏បានធ្វើអន្តរាគមន៍ជាច្រើន ក្រៅតែពីការណែនាំឲ្យក្រុមហ៊ុនបច្ចេកវិទ្យាឌីជីថលចូលរួម យើងបានរៀបចំកម្មវិធីលើកកម្ពស់ការយល់ដឹង ដោយបានកិច្ចសហការណ៍ជាមួយក្រសួងស្ថាប័នពាក់ព័ន្ធ អង្គការក្រៅរដ្ឋាភិបាល និងបានកំពុងសិក្សាពីការរៀបចំប្រព័ន្ធរាយការណ៍ និងប្រព័ន្ធស្វែងរកជំនួយបន្ទាន់រួមមួយ។
ឯកឧត្តម មានប្រសាសន៍ បន្ថែមថា៖បច្ចុប្បន្ន កម្ពុជាកំពុងរៀបចំប្រែខ្លួន ទៅជាសង្គម និងសេដ្ឋកិច្ចឌីជីថលដ៏រស់រវើកមួយ។ ចក្ខុវិស័យនេះ អាចសម្រេចទៅបាន គឺអាស្រ័យនៃការចាប់យក ការប្រើប្រាស់បច្ចេកវិទ្យាឌីជីថលក្នុងចំណោមក្រសួងស្ថាប័នរាជរដ្ឋាភិបាល វិស័យឯកជន និងប្រជាពលរដ្ឋ។ ប៉ុន្តែបច្ចេកវិទ្យា ក៏ជាកាំបិតមុខ២ នាំមកនូវប្រយោជន៍ និងហានិភ័យ។ អាស្រ័យហេតុនេះ ដើម្បីអាចទទួលបានផលប្រយោជន៍ពិតប្រាកដ ទាមទារឲ្យយើងត្រូវដោះស្រាយបញ្ហាអសុវត្ថិភាពលើប្រព័ន្ធអនឡាញ ដែលនេះគឺជាតួនាទី និងការទទួលខុសត្រូវដ៏ធំរបស់យើងទាំងអស់គ្នា៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
