ដើម្បីចូលរួមចំណែកជាមួយការងារសង្គម និងជួយដល់កុមារគ្មានទីពឹង នាព្រឹកថ្ងៃទី០៣ ខែមករា ឆ្នាំ២០២៤នេះ ក្រុមហ៊ុនដឹកជញ្ចូនអ្នកដំណើរ Larryta Express សាខាខេត្តសៀមរាប បាននាំយកអំណោយជាសម្ភារៈប្រើប្រាស់ និងសិក្សាមួយចំនួន ចែកជូនដល់ប្អូនកុមារកំព្រាគ្មានទីពឹងចំនួន ៨៥នាក់ ដែលកំពុងស្នាក់នៅ និងសិក្សារៀនសូត្រក្នុងមជ្ឈមណ្ឌលកុមារកំព្រាខេត្ត, មណ្ឌលអង្គការខ្យូសេ ហ្វ័ររឹម និងមណ្ឌលសំចតសង្គមកិច្ច ស្ថិតក្នុងសង្កាត់ទឹកវិល ក្រុងសៀមរាប។
អ្នកគ្រប់គ្រងក្រុមហ៊ុនឡារីតាខេត្តសៀមរាប លោក ឌុច សាមឌី បានឲ្យដឹងថា ក្រៅពីការដឹកជញ្ចូនអ្នកដំណើរ ក្រុមហ៊ុនឡារីតា តែងបានចូលរួមជាប្រចាំជាមួយរាជរដ្ឋាភិបាលកម្ពុជា តាមរយៈការងារសង្គម និងការងារជាច្រើនទៀត។ ចំពោះអំណោយដែលក្រុមការងារនាំយកមកចែកជូនប្អូនៗកុមារកំព្រានាពេលនេះ ក៏ជាការចូលរួមជាមួយអាជ្ញាធរ និងអ្នកពាក់ព័ន្ធ ដើម្បីឲ្យពួកគេមានទំនុបបំរុង ការអប់រំ និងចិញ្ចឹមបីបាច់ពួកគេឲ្យក្លាយជាទំពាំងស្នងឬស្សី ក្លាយទៅជាយុវជនល្អ ពលរដ្ឋល្អរបស់សង្គមជាតិនាពេលអនាគត។
ជាមួយគ្នានោះដែរ លោកក៏បានជម្រុញលើកទឹកចិត្តដល់ក្មួយៗទាំងអស់ ត្រូវខិតខំសិក្សារៀនសូត្រ ស្តាប់លោកគ្រូអ្នកគ្រូ គោរពវិន័យសាលា កុំឱ្យសប្បុរសជនទាំងអស់ដែលបានជួយទំនុបបំរុងដល់ប្អូនៗខកបំណង ហើយខិតខំប្រឹងប្រែងអប់រំ ណែនាំ និងចិញ្ចឹមបីបាច់ក្មួយៗទាំងអស់គ្នាកន្លងមក។
តាមការលោក មឿន សុគុណ ប្រធានការិយាល័យសេវាសង្គមកិច្ច នៃមន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តសៀមរាប បានឲ្យដឹងថា នៅទូទាំងខេត្តសៀមរាប មានមណ្ឌលថែទាំកុមារចំនួន ២៩កន្លែង ដោយមានកុមាររស់នៅ និងទទួលការអបរំនៅទីនោះសរុបមានចំនួន ៥៣៧នាក់។
សូមជម្រាបថា ចំពោះអំណោយដែលបានផ្ដល់ជូនដល់ប្អូនៗទាំង ៨៥នាក់នាពេលនេះ ដោយក្នុងម្នាក់ៗទទួលបាន៖ សម្ភារៈសិក្សា ១ឃីត ភួយ១ ថវិការមួយចំនួន ហើយក្រុមការងារក៏បានប្រគល់ជូននូវទឹកសុទ្ធចំនួន ១៥០យួរ និងថវិកាមួយចំនួនទៀត ជូនដល់មណ្ឌលទាំងបីផងដែរ៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
