ប្រជាកសិករសរុបចំនួន ១៦៣នាក់ មកពីភូមិចំនួន ៩ ក្នុងឃុំលាងដៃ ស្រុកអង្គរធំ ខេត្តសៀមរាប បានទទួលការបណ្ដុះបណ្ដាលស្តីពី ការអនុវត្តកសិកម្មល្អកម្ពុជា លើបច្ចេកទេសដាំដុះគ្រឿងទេស ក្រោមគម្រោងហិរញ្ញប្បទានរបស់គម្រោង Harvest 3 នៃទីភ្នាក់ងារសហរដ្ឋអាមេរិក សម្រាប់កិច្ចអភិវឌ្ឍអន្តរជាតិ ហៅកាត់ថា USAID និងរៀបចំដោយក្រុមហ៊ុន សាបារា បេសហ្វូដ គ្រឿងហ្លួង (Sabara Best Food Co., Ltd) ។
លោក ហាស់ សុផល អ្នកចាត់ការទូទៅ ក្រុមហ៊ុនសាបារា បេសហ្វូដ បង្ហាញថា វគ្គបណ្ដុះបណ្ដាល ដែលមានរយៈពេល ២ថ្ងៃ ចាប់ថ្ងៃទី១០ដល់១១ ខែមករា ឆ្នាំ ២០២៤នេះ មានគោលបំណងចម្បង ចូលរួមលើកកម្ពស់វិស័យកសិកម្ម ដែលនៅក្នុងមូលដ្ឋានផ្ទាល់របស់ប្រជាពលរដ្ឋ ជាពិសេសលើកកម្ពស់សមត្ថភាព និងតួនាទីរបស់ស្ត្រីក្នុងសង្គម ក៏ដូចជាបង្កើនប្រាក់ចំណូលសម្រាប់សេដ្ឋកិច្ចគ្រួសារប្រចាំ។
លោក ហាស់ សុផល បន្តថា វគ្គបណ្តុះបណ្ដាលនេះដែរ ក៏ជាការជំរុញ និងបង្កើនចំណេះដឹងទៅដល់ប្រជាពលរដ្ឋនៅតាមមូលដ្ឋានជនបទ ឱ្យចេះបង្កបង្កើនផលតាមបែបបច្ចេកទេស ទៅលើដំណាំគ្រឿងទេសផ្សេងៗ ដូចជា ដំណាំស្លឹកគ្រៃ រមៀត រំដេង ខ្ចាយ ស្លឹកក្រូចសើចជាដើម។
អ្នកចាត់ការទូទៅរូបនេះ ក៏បានបញ្ជាក់ផងដែរថា គម្រោងលើកកម្ពស់សមត្ថភាពកសិករនេះ ជាគម្រោងរយៈពេលវែង ជាពិសេស ផលិតផលកសិកម្ម ដែលកសិករផលិតបាន ទៅតាមបច្ចេកទេសរបស់គម្រោង ក្រុមហ៊ុននឹងប្រមូលទិញពីកសិករផ្ទាល់ដល់មូលដ្ឋាន ដែលជាកាត់បន្ថយការចំណាយក្នុងការដឹកជញ្ជូន និងកាត់បន្ថយបញ្ហាប្រឈម ក្នុងការស្វែងរកទីផ្សារដោយខ្លួនឯង។
ក្នុងឳកាសនោះលោក កឿន កើប មេឃុំលាងដៃ ស្រុកអង្គរធំ បានថ្លែងអំណរគុណដល់ក្រុមហ៊ុន ដែលបានរៀបចំកម្មវិធីបណ្តុះបណ្តាលនេះឡើង ជូនដល់បងប្អូនកសិករយើង។ លោករំពឹងថា បងប្អូនប្រជាកសិករទាំងអស់ នឹងយកចំណេះដឹង និងបច្ចេកទេសនៃការដាំដុះគ្រឿងទេសទាំងនេះ ដើម្បីយកទៅអនុវត្តសម្រាប់ជីវភាពថ្ងៃក្រោយទៀត៕
អត្ថបទ និងរូបភាព៖ លោក ស៊ុន គីន
កែសម្រួល៖ លោក សេង ផល្លី