នៅព្រឹកថ្ងៃទី១២ ខែមករា ឆ្នាំ២០២៤ រដ្ឋបាលខេត្តសៀមរាប បានបើកវគ្គបណ្តុះបណ្តាលស្តីពីយន្តការអនុវត្តការបើកផ្តល់ប្រាក់ឧបត្ថម្ភសម្រាប់កម្មវិធីជាតិជំនួយសង្គម ផ្នែកបណ្តុះបណ្តាលជំនាញវិជ្ជាជីវៈ និង បច្ចេកទេសសម្រាប់យុវជនមកពីគ្រួសារក្រីក្រ និងងាយរងហានីភ័យ ក្នុងគោលបំណងផ្តល់ការតម្រង់ទិសដល់ថ្នាក់ក្រោមជាតិ ក្នុងការអនុវត្តការផ្សព្វផ្សាយ ការតាមដានការផ្សព្វផ្សាយ និងការបើកផ្តល់សម្រាប់យុវជនក្នុងគ្រួសារមានប័ណ្ណសមធម៌ និងគ្រួសារ មានបណ្ណសម្គាល់គ្រួសារមានហានីភ័យ ដោយមានការចូលរួមពីអ្នកពាក់ព័ន្ធជាច្រើនរូប។
លោក នាក់ ណេរ៉ុន អភិបាលរងខេត្ត មានប្រសាសន៍ថា វគ្គបណ្តុះបណ្តាលដែលរៀបចំនាពេលនេះ ជាឱកាសសម្រាប់អាជ្ញាធរគ្រប់ជាន់ថ្នាក់ និងមន្ត្រីបង្គោល ក្នុងការធ្វើវឌ្ឍនភាព បញ្ហាប្រឈម ដំណោះស្រាយ និងផែនការបន្តរបស់ខ្លួន ដើម្បីជាមូលដ្ឋានក្នុងការពង្រឹងការអនុវត្តការងារការងារបណ្តុះបណ្តាលវិជ្ជាជីវៈ និងបច្ចេកទេសដល់យុវជននៃគ្រួសារក្រីក្រ និងងាយរងហានីភ័យ តាមរយៈការផ្សព្វផ្សាយ និងជួយគាំទ្រដល់ផ្នែកតម្រូវការប្រជាពលរដ្ឋឲ្យយល់ច្បាស់ និងចូលរួមក្នុងកិច្ចការងារនេះ។
លោក នាក់ ណេរ៉ុន អភិបាលរងខេត្ត មានប្រសាសន៍ទៀតថា គោលនយោបាយយុទ្ធសាស្ត្របញ្ចកោណរបស់រាជរដ្ឋាភិបាល ក្រោមកិច្ចដឹកនាំដ៏ខ្ពង់ខ្ពស់របស់សម្តេចធិបតី ហ៊ុន ម៉ាណែត នាយករដ្ឋមន្ត្រី បានផ្តោតខ្ពស់លើកមូលធនមនុស្ស ដែលជាអាទិភាពគន្លឹះទីមួយសម្រាប់រាជរដ្ឋាភិបាលកម្ពុជា នីតិកាលទី៧ ក្នុងការជម្រុញសេដ្ឋកិច្ចឲ្យសម្រេចបាន នូវគោលដៅរបស់កម្ពុជានៅឆ្នាំ២០៣០ និងធ្វើឲ្យកម្ពុជាក្លាយជាប្រទេសមានចំណូលខ្ពស់នៅឆ្នាំ២០៥០។ រាជរដ្ឋាភិបាលក៏បានផ្តោតលើចក្ខុវិស័យដ៏សំខាន់នេះ ដោយសម្តេចមហាបវរធិបតី បានប្រកាសដាក់ឲ្យអនុវត្តកម្មវិធីបណ្តុះ បណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានីភ័យ នាថ្ងៃទី១៤ ខែវិច្ឆិកា ឆ្នាំ២០២៣កន្លងទៅ សម្រាប់យុវជនចំនួន ១លាន ៥សែននាក់ មកពីគ្រួសារក្រីក្រ គ្រួសារងាយរងហានីភ័យ ដើមី្បទទួលបាននូវចំណេះជំនាញច្បាស់លាស់ និងក្លាយជាផ្នែកមួយ ក្នុងការជម្រុញសេដ្ឋកិច្ចជាតិ ដោយមានក្រសួងការងារ និងបណ្តុះបណ្តាលវិជ្ជាជីវៈជាសេនាធិការ ក្នុងការបណ្តុះបណ្តាលលើមុខជំនាញចំនួន១០ ក្នុងការសិក្សា។
លោកអភិបាលរងខេត្ត ក៏បានលើកនូវអនុសាសន៍ល្អៗមួយចំនួនជាមូលដ្ឋានគ្រឹះសម្រាប់មន្ត្រីបង្គោល និងថ្នាក់មូលដ្ឋាន សម្រាប់យកទៅអនុវត្តចំគោលដៅ ក្នុងការបង្កើននូវមុខរបរ ចំណេះវិជ្ជាជីវៈដល់យុវជនគ្រួសារក្រីក្រ និងងាយរងហានីភ័យ ក្នុងការបន្តនូវចំណេះដឹងរបស់ខ្លួនឲ្យក្លាយជាធនធានមនុស្សនៅក្នុងសង្គម។ លោកក៏បានជម្រុញដល់អាជ្ញាធរក្រុងស្រុកឃុំសង្កាត់ បង្កើនក្នុងការផ្សព្វផ្សាយឲ្យបានចូលជ្រៅដល់ប្រជាពលរដ្ឋគ្រួសារក្រីក្រ បានមកចុះឈ្មោះសិក្សានូវមុខជំនាញដែលខ្លួនចងរៀន។ ម៉្យាងទៀតនៅតាមបណ្តាក្រុងស្រុក បើមានលទ្ធភាពក្នុងការបង្កើតសាលាបណ្តុះបណ្តាលបាននោះ មន្ទីរនឹងបញ្ជូនគ្រូបបណ្តុះបណ្តាល បច្ចេកទេសដល់ពួកគាត់ ដើមី្បបង្កភាពងាយស្រួលមិនទៅឆ្ងាយផ្ទះរបស់ខ្លួន ដែលកត្តាទាំងនេះជាគោលដៅក្នុងការអនុវត្តនូវយុទ្ធសាស្ត្រ បញ្ចកោណ របស់រាជរដ្ឋាភិបាលឲ្យសម្រេចបានជោគជ័យ៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
