នាសាលាខេត្តសៀមរាប នៅរសៀលថ្ងៃទី១១ ខែមករា ឆ្នាំ២០២៤ ឯកឧត្តម សុខ សូកេន រដ្ឋមន្ត្រីក្រសួងទេសចរណ៍ បានដឹកនាំកិច្ចប្រជុំដើម្បីវាយតម្លៃ ត្រួតពិនិត្យវឌ្ឍនភាពការងារនិងចុះពិនិត្យទីតាំងត្រៀមរៀបចំពិធី ឆ្នាំនៃការផ្លាស់ប្តូរ ប្រជាជន និងប្រជាជន កម្ពុជា ចិន ឆ្នាំ២០២៤ នៅទីលានជល់ដំរីក្នុងតំបន់អង្គរធំខេត្តសៀមរាប ថ្ងៃទី១៣ខាងមុខនេះផងដែរ។
កិច្ចប្រជុំ និងការចុះពិនិត្យនេះ មានការចូលរួមពី លោក យុន លីនណេ អភិបាលរងខេត្តតំណាងដ៏ខ្ពង់ខ្ពស់ឯកឧត្តម ប្រាក់ សោភ័ណ អភិបាលនៃគណៈអភិបាលខេត្តសៀមរាប រួមជាមួយវត្តមាន ឯកឧត្តម និងរដ្ឋលេខាធិការ អនុរដ្ឋលេខាអិការ អគ្គនាយក អគ្គនាយករង អន្តរក្រសួង ស្នងការនៃស្នងការដ្ឋាននគរបាលខេត្តសៀមរាប និងថ្នាក់ដឹកនាំ ស្ថានប័នអង្គភាពមន្ទីរពាក់ព័ន្ធជាច្រើនរូបទៀត។
ឯកឧត្តម សុខ សូកេន រដ្ឋមន្ត្រីក្រសួងទេសចរណ៍ បានមានប្រសាសន៍ថា៖ឆ្នាំនៃការផ្លាស់ប្តូរ ប្រជាជន និងប្រជាជន កម្ពុជា ចិន២០២៤ ជា ព្រឹត្តិការណ៍មួយអាចឲ្យកម្ពុជាផ្សព្វផ្សាយពីសក្តានុពលនិងផលិតផលទេសចរណ៍ដ៏សម្បូរបែបរបស់កម្ពុជាបានកាន់តែច្រើនទៅលើឆាកអន្តរជាតិ ជាពិសេសដល់ប្រជាជនចិន ដើម្បីមកទស្សនាកម្ពុជាឲ្យកាន់តែច្រើន ជាចលករមួយធ្វើឲ្យវិស័យទេសចរណ៍កម្ពុជាមានការរីកចម្រើនកាន់តែខ្លាំងថែមទៀតនៅឆ្នាំ២០២៤នេះ ស្របតាមផែនការយុទ្ធសាស្ត្រគន្លឹះ «ទស្សនាអង្គរ ឆ្នាំ២០២៤» ដែលបានដាក់ចេញដោយ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នាពេលថ្មីៗនេះផងដែរ។
ព្រឹត្តិការណ៍ឆ្នាំនៃការផ្លាស់ប្ដូរប្រជាជន និងប្រជាជន កម្ពុជា-ចិន២០២៤ នេះរៀបចំដោយក្រសួងទេសចរណ៍ និងសហការជាមួយក្រសួងវប្បធម៌ និងវិចិត្រសិល្បៈ និងស្ថាប័នពាក់ព័ន្ធ ព្រមទាំងភាគីចិនក្រោមអធិបតីភាព ឯកឧត្តម លី ស៊ូឡី (Li Shulei) សមាជិកការិយាល័យនយោបាយ និងជារដ្ឋមន្ត្រីឃោសនាការ នៃគណៈកម្មាធិការមជ្ឈិមបក្សកុម្មុយនីស្ដចិន និងសម្តេចពិជ័យសេនា ទៀ បាញ់ ឧត្តមប្រឹក្សាផ្ទាល់ព្រះមហាក្សត្រ តំណាងដ៏ខ្ពង់ខ្ពស់សម្ដេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា។
ក្នុងកិច្ចសម្ភាសន៍ជាមួយ ឯកឧត្តម ប្រាក់ ផាណារ៉ា រដ្ឋលេខាធិការក្រសួងទេសចរណ៍ ថា៖ រាជរដ្ឋាភិបាលកម្ពុជា និងរដ្ឋាភិបាលចិន នឹងប្រារព្ធព្រឹត្តិការណ៍ដ៏ធំមួយ ដែលមានឈ្មោះថា “ឆ្នាំនៃការផ្លាស់ប្តូរប្រជាជន និងប្រជាជន កម្ពុជា-ចិន ២០២៤” នៅទីលានជល់ដំរី នៃរមណីយដ្ឋានអង្គរធំ នាល្ងាចថ្ងៃទី១៣ ខែមករា ឆ្នាំ២០២៤។ព្រឹត្តិការណ៍នេះក៏នឹងមានវត្តមានថ្នាក់ដឹកនាំ និងគណៈប្រតិភូនៃប្រទេសចិន និង សិល្បករ សិល្បការិនី អ្នកទេសចរចិនប្រមាណជា៥០០នាក់ចូលរួម ព្រមទាំងមានការសម្តែងសិល្បៈ របាំ និងតន្ត្រីផ្សេងៗ បង្ហាញនូវការផ្លាស់ប្ដូរវប្បធម៌រវាងគ្នា ដែលជាការបញ្ជាក់នូវសាមគ្គីភាពល្អ ចំណងមិត្តភាពដ៏ប្រសើរ និងការរួមបញ្ចូលគ្នារវាង ទស្សនីយភាពសិល្បៈដ៏អស្ចារ្យ ដើម្បីផ្តិតយករូបភាពដ៏ប្រណិតៗ ទៅផ្សព្វផ្សាយដល់ប្រជាជនចិន ក៏ដូចជាប្រទេសក្នុងតំបន់ និងទៅកាន់ពិភពលោកផងដែរ។ សម្ភាសន៍
សូមបញ្ជាក់ពីសាវតា៖ ឆ្នាំនៃការផ្លាស់ប្ដូរប្រជាជន និងប្រជាជន កម្ពុជា-ចិន២០២៤ ជាគំនិតផ្តួចផ្តើមរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងជំនួបទ្វេរភាគីរវាងសម្តេចធិបតីជាមួយ ឯកឧត្តម លី ឈាង នាយករដ្ឋមន្ត្រីនៃសាធារណរដ្ឋប្រជាមានិតចិន កាលពីថ្ងៃទី១៧ខែតុលាឆ្នាំ២០២៣នៅរដ្ឋធានីប៉េកាំង ដើម្បីលើកកម្ពស់វិស័យទេសចរណ៍និងការតភ្ជាប់ប្រទេសទាំងពីរក្រោយវិបត្តិកូវីដ-១៩៕
អត្ថបទនិងរូបភាព ៖ លោ យូ វង្ស
