នៅព្រឹកថ្ងៃទី១៣ ខែមករា ឆ្នាំ២០២៤នេះ ឯកឧត្តម ប្រាក់ សោភ័ណ អភិបាលខេត្តសៀមរាប បានអញ្ជើញទទួលស្វាគមន៍ ឯកឧត្តម លី ស៊ូឡី សមាជិកការិយាល័យនយោបាយ និងជារដ្ឋមន្ត្រីក្រសួងឃោសនាការ នៃគណៈកម្មាធិការមជ្ឈិមបក្សកុម្មុយនីស្តចិន ព្រមទាំងជួបពិភាក្សាការងារមួយចំនួន ក្នុងឱកាសឯកឧត្តមបានដឹកនាំគណៈប្រតិភូជាន់ខ្ពស់បក្សកុម្មុយនីស្តចិន ធ្វើទស្សនកិច្ចផ្លូវការនៅខេត្តសៀមរាប ចាប់ពីថ្ងៃទី១៣-១៤ ខែមករា ឆ្នាំ២០២៤។
ក្រោមការដឹកនាំប្រកបដោយគតិបណ្ឌិតរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ទំនាក់ទំនង និងកិច្ចសហប្រតិបត្តិការរវាងកម្ពុជា-ចិន ត្រូវបានលើកកម្ពស់ ក្នុងនាម “ភាពជាដៃគូយុទ្ធសាស្ត្រគ្រប់ជ្រុងជ្រោយ” ជាមិត្តដែកថែប និងប្រកាន់ជំហរគាំទ្រគោលនយោបាយការបរទេសចិន ជាពិសេសគោលនយោបាយចិនតែមួយ និងគំនិតផ្តួចផ្តើមស្ដីពី “BRI ឬ គំនិតផ្ដួចផ្ដើម ខ្សែក្រវាត់មួយ និងផ្លូវមួយ។ ដោយឡែក ចាប់តាំងពីឆ្នាំ១៩៩៣-២០២៣ រដ្ឋបាលខេត្តសៀមរាប បានចងសម្ព័ន្ធមេត្រីភាព និងមានកិច្ចសហប្រតិបត្តិការ ជាមួយ ខេត្ត-ក្រុង ចំនួន៣០ នៃសាធារណរដ្ឋប្រជាមានិតចិន។
ជាមួយគ្នានេះដែរ ព្រឹត្តិការណ៍ជាប្រវត្តិសាស្ត្រ នៃការផ្សារភ្ជាប់ទំនាក់ទំនងកាន់តែជិតស្និតរវាងប្រជាជន និងប្រជាជន នៃប្រទេសទាំងពីរ ក្នុងឆ្នាំ២០២៤ និងបន្តពេលខាងមុខ បានស្ដែងចេញពីការធ្វើជាម្ចាស់ផ្ទះ ក្នុងការរៀបចំកម្មវិធី “ឆ្នាំផ្លាស់ប្តូររវាងប្រជាជន និងប្រជាជន កម្ពុជា-ចិន” នៅក្នុងតំបន់រមណីយដ្ឋានអង្គរ ដែលមានទស្សនីយភាពដ៏អស្ចារ្យ និងមិនអាចកាត់ថ្លៃបាន។
ទំនាក់ទំនង រហូតឈានដល់ជាមិត្តដែកថែប រវាងប្រទេសទាំងពីរ គឺជាចលករយ៉ាងសំខាន់ក្នុងការបង្កើននូវទំនាក់ទំនង និងការតភ្ជាប់វិស័យទេសចរណ៍ វប្បធម៌ និងទំនាក់ទំនងរវាងប្រជាជននៃប្រជាជាតិទាំងពីរ ព្រមទាំងជាមូលដ្ឋានមិនអាចខ្វះបានក្នុងការសម្រេចឱ្យបាន នូវការកសាងសហគមន៍ជោគវាសនារួមគ្នា នៃប្រជាជាតិទាំងពីរ កម្ពុជា-ចិន៕
អត្ថបទ និងរូបភាព៖ លោក ឃុត សៅ
កែសម្រួល៖ លោក សេង ផល្លី
