តាមការវាយតម្លៃក្នុងសន្និបាត បូកសរុបលទ្ធផលការងារកសិកម្ម រុក្ខាប្រមាញ់ និងនេសាទ ឆ្នាំ២០២៣ និងទិសដៅការងារឆ្នាំ២០២៤ របស់មន្ទីរកសិកម្ម រុក្ខាប្រមាញ់ និងនេសាទខេត្តសៀមរាប នៅថ្ងៃទី១២ខែមករាឆ្នាំ២០២២៤ ការប្រមូលផលស្រូវប្រាំង និងវស្សាក្នុង២០២៣កន្លងទៅ ទទួលបានលទ្ធផលល្អប្រសើរ គឺសរុបចំនួន ៦២៧ ៨៧២តោន កើនឡើងជាង ១៧ភាគរយ បើធៀបនឹងឆ្នាំ២០២២ ទទួលបានផល ៥៣៤ ១៩២តោន។
របាយការណ៍បូកសរុបលទ្ធផលការងារនេះ បានបញ្ជាក់ថា សម្រាប់រដូវវស្សាក្នុងឆ្នាំ២០២៣ ផ្ទៃដីដាំដុះដំណាំស្រូវ មានចំនួនសរុប ២១៥ ៨០០ហិកតា កើនឡើងប្រមាណ ១០ ៥០០ហិកតា បើធៀបនឹងឆ្នាំ២០២២។ រីឯស្ថានភាពទឹកភ្លៀងមានធ្លាក់មកជាបន្តបន្ទាប់ ដែលធ្វើឲ្យការងារបង្កបង្កើនផលប្រព្រឹត្តទៅបានលទ្ធផលល្អ ទោះបីជាមានការរអាក់រអួលដោយកន្លែងមួយចំនួនតូច និងធ្វើឲ្យប៉ះពាល់ដល់ដំណាំស្រូវដោយគ្រោះរាំងស្ងួត និងទឹកជំនន់ដោយអន្លើយ៉ាងណាក្តី។
បរិមាណផលស្រូវ ដែលប្រមូលបាននេះ អាចផ្គត់ផ្គង់ប្រជាជនក្នុងខេត្តបានជិត ១ ២០០ ០០០ នាក់ រួមទាំងភ្ញៀវទេសចរ ប្រមាណ ៣លាននាក់ផងដែរ។ ក្រៅពីការផ្គត់ផ្គង់ និងទុកធ្វើពូជ ចំណែកស្រូវនៅសល់មានជិត ២៨០ ពាន់តោនផងដែរ។
ថ្លែងក្នុងឱកាសនោះ លោក អ៊ឹង គឹមលាង អភិបាលរងខេត្ត តំណាងឯកឧត្តម ប្រាក់ សោភ័ណ អភិបាលខេត្តសៀមរាប លើកឡើងថា លទ្ធផល ដែលសម្រេចបានល្អប្រសើរក្នុងឆ្នាំ២០២៣ កន្លងមកនេះ បានបង្ហាញពីការខិតខំប្រឹងប្រែងរបស់ថ្នាក់ដឹកនាំ និងមន្រ្តីរាជការទាំងអស់ នៃមន្ទីរកសិកម្ម រុក្ខាប្រមាញ់ និងនេសាទខេត្ត បំពេញការងារ តាមគោលនយោបាយរបស់រាជរដ្ឋាភិបាល និងកិច្ចសហការសម្របសម្រួលល្អ ជាមួយអង្គការ សមាគម និងដៃគូអភិវឌ្ឍនានា។
លោក អភិបាលរងខេត្ត បន្ថែមថា ក្នុងដំណើរឆ្ពោះទៅកាន់គោលដៅ នៃយុទ្ធសាស្រ្តបញ្ចកោណដំណាក់កាលទី១ នៃរាជរដ្ឋាភិបាលកម្ពុជានីតិកាលទី៧ នៃរដ្ឋសភា នេះ រដ្ឋបាលខេត្តសៀមរាប បានគ្រប់គ្រង ដឹកនាំ ចាត់ចែង និងសម្របសម្រួលយន្តការ ដែលមានលក្ខណៈជាពហុវិស័យឲ្យប្រព្រឹត្តទៅស៊ីសង្វាក់ ប្រទាក់ក្រឡា ដើម្បីសម្រេចបាននូវសមិទ្ធផលនានា លើវិស័យកំណែទម្រង់ និងធ្វើឲ្យប្រជាពលរដ្ឋទទួលបាននូវអត្ថប្រយោជន៍ប្រកបដោយសមធម៌លើការអភិវឌ្ឍ និងកំណើនសេដ្ឋកិច្ចសង្គម មានជាអាទិ៍ សន្តិសុខ សណ្តាប់ធ្នាប់ ការលើកកម្ពស់អនាម័យ បរិស្ថាន ការកែលម្អសោភណ្ឌភាពក្រុង ហេដ្ឋារចនាសម្ព័ន្ធផ្សេងៗជាច្រើនទៀត។
គួរជម្រាបថា ក្នុងសន្និបាត បូកសរុបលទ្ធផលការងាឆ្នាំ២០២៣ និងទិសដៅអនុវត្តឆ្នាំ២០២៤ មានការអញ្ជើញជា អធិបតីពីសំណាក ឯកឧត្តម ឃុន សាវឿន រដ្ឋលេខាធិការ តំណាងឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ឯកឧត្តម កុយ សង សមាជិកក្រុមប្រឹក្សាខេត្ត និងលោក អ៊ឹង គឹមលាង អភិបាលរងខេត្តសៀមរាប ដែលប្រារព្ធនៅស្ថានីយស្រាវជ្រាវកសិកម្មទឹកវិល ក្រុងសៀមរាប។
អត្ថបទ និងរូបភាព៖ លោក យូ វង្ស
កែសម្រួល៖ លោក សេង ផល្លី
