ថ្លែងក្នុងកិច្ចប្រជុំផ្សព្វផ្សាយ និងណែនាំដល់អាជ្ញាធរក្រុងស្រុកទាំង៥ ដើម្បីចូលរួមទប់ស្កាត់ការកើតមានឡើងនូវសំណង់ថ្មីជាយថាហេតុ ក្នុងតំបន់រមណីយដ្ឋានអង្គរ និងតំបន់ដទៃទៀត ស្ថិតក្រោមការគ្រប់គ្រងដោយអាជ្ញាធរជាតិអប្សរា នៅព្រឹកថ្ងៃទី១៦ ខែមករា ឆ្នាំ២០២៤នេះ ឯកឧត្តម ប្រាក់ សោភ័ណ អភិបាលខេត្ត បានណែនាំដល់អាជ្ញាធរមូលដ្ឋានគ្រប់ជាន់ថ្នាក់ ត្រូវចូលរួមសហការគ្នាឲ្យបានល្អលើការទប់ស្កាត់កុំឲ្យមានការសាងសង់សំណង់ថ្មីឡើងវិញ នៅក្នុងតំបន់រមណីយដ្ឋានអង្គរ និងត្រូវធ្វើសេចក្តីរាយការណ៍អំពីវឌ្ឍនភាព និងបញ្ហាប្រឈមរបស់មូលដ្ឋានក្នុងពេលយុទ្ធនាការតម្រង់ទិសរបស់រាជរដ្ឋាភិបាល។
ឯកឧត្តម ប្រាក់ សោភ័ណ មានប្រសាសន៍ថា តាមចំណារលិខិតរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី បានបញ្ជាក់ថា រាជរដ្ឋាភិបាលបានផ្តល់ភារកិច្ចជូនអាជ្ញាធរខេត្តសៀមរាប ក្រុងសៀមរាប ស្រុកប្រាសាទបាគង ស្រុកពួក ស្រុកបន្ទាយស្រី និងស្រុកអង្គរធំ ត្រូវធ្វើការហាមឃាត់ដាច់ខាត គឺមិនអនុញ្ញាតឲ្យប្រជាពលរដ្ឋ ចូលទៅតាំងទីលំនៅ សាងសង់ផ្ទះ ទីជម្រក នៅក្នុងតំបន់ការពារបេតិកភណ្ឌទៀតឡើយ។ ឯកឧត្តមក៏បានក្រើនរំលឹកដល់អាជ្ញាធរមូលដ្ឋានស្ថិតនៅក្នុងតំបន់រមណីយដ្ឋានអង្គរ ត្រូវផ្តោតដោយប្រុងប្រយ័ត្នខ្ពស់ ក្នុងការការពារនៅតំបន់ដែលប្រជាពលរដ្ឋបានស្ម័ត្រចិត្តរុះរើទៅរស់នៅតំបន់រុនតាឯក ដើមី្បកុំឲ្យមានការចូលមករស់នៅបន្តទៀត។
ឯកឧត្តមអភិបាលខេត្ត ក៏បានណែនាំដល់អាជ្ញាធរមូលដ្ឋាន ត្រូវឲ្យចូលរួមទប់ស្កាត់ និងបំពេញតួនាទីឲ្យបានត្រឹមត្រូវ ស្របតាមការណែនាំ និងលិខិតបទដ្ឋានគតិយុត្តជាធរមាន ហើយសំណូមពរដល់អាជ្ញាធរមូលដ្ឋាន ដែលមានតួនាទីភារកិច្ចក្នុងការគ្រប់គ្រង ត្រូវចូលរួមក្នុងការទប់ស្កាត់ និងការពារនៅតំបន់ទាំងនោះ កុំឲ្យកើតមានសាជាថ្មីបន្ត ព្រមទាំងសំណូមពរដល់បងប្អូនប្រជាពលរដ្ឋកុំឲ្យមានការសាងសង់សំណង់ថ្មី ឬសាងសង់បន្ថែមលើសំណង់ដែលមានស្រាប់ផង។
ក្នុងឱកាសនោះ ឯកឧត្តមក៏បានគូសបញ្ជាក់ថា រាល់ការងារដែលកំពុងអនុវត្តក្នុងយុទ្ធនាការតម្រង់ទិសនេះ គឺដើមី្បជួយដល់រាជរដ្ឋាភិបាល ចូលយើងជាអាជ្ញាធរមូលដ្ឋានចូលរួមក្នុងការថែទាំអភិរក្សនៅក្នុងតំបន់រមណីយដ្ឋានអង្គរ ដែលជាមរតកកេរ្តិ៍ដូនតា ជាអត្តសញ្ញាណ និងដួងព្រលឹងរបស់ជាតិ ក៏ដូចជាតម្លៃជាសកល នៃសម្បត្តិបេតិកភណ្ឌពិភពលោក សម្រាប់មនុស្សជាតិទាំងមូល និងដើមី្បឲ្យជៀសផុតពីការព្រមានពីសំណាក់មជ្ឈមណ្ឌលបេតិកភណ្ឌពិភពលោក៕
អត្ថបទ និងរូបភាព៖ លោក ជា ស្រស់ ,ម៉ី សុខារិទ្ធ
កែសម្រួល៖ លោក អ៊ុន ណារាជ្យ
