ដើម្បីរក្សាបាននូវសណ្ដាប់ធ្នាប់ និងបញ្ចៀសនូវបញ្ហានានានៅតាមដងផ្លូវ ក្នុងតំបន់រមណីយដ្ឋានអង្គរ នាពេលកន្លងមក អាជ្ញាធរជាតិអប្សរាបានរៀបចំចំណត សម្រាប់យានយន្តគ្រប់ប្រភេទ ប៉ុន្តែអ្នកប្រកបរបរដឹកភ្ញៀវទេសចរ ភ្ញៀវទេសចរជាតិ និងអន្តរជាតិមួយចំនួន នៅពុំទាន់ចូលរួមប្រើប្រាស់ចំណតឱ្យបានត្រឹមត្រូវនៅឡើយ នេះបើតាមការលើកឡើង កញ្ញា នៅ ចិន្តា អនុប្រធានក្រុមសណ្ដាប់ធ្នាប់ប្រចាំតំបន់អង្គរ នៅរសៀលថ្ងៃទី១៦ ខែមករានេះ។
កញ្ញា នៅ ចិន្តា បញ្ជាក់ថា កន្លងមកបុគ្គលិកនៃអាជ្ញាធរជាតិអប្សរា តែងធ្វើការណែនាំដល់អ្នកបើកបររថយន្ត តូច ធំ និងរ៉ឺម៉កដឹកភ្ញៀវទេសចរ ពីការប្រើប្រាស់ចំណតនៅតាមប្រាសាទនេះជារឿយៗ ពួកគាត់មួយចំនួន បានចូលរួមជាមួយអាជ្ញាធរ ប៉ុន្តែមួយចំនួនទៀត នៅតាមចតនៅតាមផ្លូវសាធារណៈ និងមួយចំនួនទៀតចតនៅក្បែរច្រកចេញ-ចូលតែម្ដង។ សកម្មភាពទាំងអស់នេះ បានធ្វើឱ្យចរាចរណ៍មានការកកស្ទះ និងបន្តធ្វើតាមគ្នា ដែលនាំឱ្យបាត់សណ្ដាប់ធ្នាប់ និងបង្ហាញគំរូមិនល្អសម្រាប់ភ្ញៀវទេសចរផងដែរ។
បុគ្គលិករក្សាសណ្ដាប់ធ្នាប់រូបនេះ ក៏សូមអំពាវនាវដល់ អ្នកប្រកបរបរដឹកភ្ញៀវទេសចរ និងប្រជាពលរដ្ឋទាំងអស់ សូមចូលរួមប្រើប្រាស់ចំណត ដែលរៀបចំដោយអាជ្ញាធរ ក៏ដូចជាផ្សព្វផ្សាយបន្ត ដើម្បីចូលរួមរក្សាសណ្ដាប់ធ្នាប់ និងលើកសោភណ្ឌភាពនៃតំបន់បេតិកភណ្ឌរបស់យើង និងសាកសមជារមណីយដ្ឋានដ៏អស្ចារ្យលើកពិភពលោក សម្រាប់ទទួលភ្ញៀវទេសចរជាតិ និងអន្តរជាតិ។
អត្ថបទ និងរូបភាព៖ លោក បូ សាវី
កែសម្រួល៖ លោក សេង ផល្លី
