សួនកុមារចំណាយទឹកប្រាក់អស់ ១ម៉ឺន ៥ពាន់ដុល្លារអាមេរិក ជាអំណោយរបស់អង្គការ Playground For Children Dongpohang Rotary នៃប្រទេសកូរ៉េខាងត្បុង ត្រូវបានសម្ភោធដាក់ឲ្យប្រើប្រាស់ជាផ្លូវការហើយ នៅព្រឹកថ្ងៃទី២២ ខែមករា ឆ្នាំ២០២៤ ជូនដល់ប្អូនៗសិស្សានុសិស្សក្នុងសាលាបឋមសិក្សាអធិបតី ស្ថិតនៅក្នុងភូមិអធិបតី ឃុំត្រីញ័រ ស្រុកពួក ខេត្តសៀមរាប។
តំណាងឲ្យប្រជាពលរដ្ឋ ក៏ដូចសិស្សានុសិស្សនៃសាលាបឋមសក្សាអធិបតី លោក ថាន់ ហឹក អភិបាលរងស្រុកពួក សូមថ្លែងអំណរគុណចំពោះសប្បុរសជន ដែលបានជួយឧបត្ថម្ភនូវសូនកុមារនេះ សម្រាប់សិស្សានុសិស្សលេងកំសាន្តបន្ទាប់ពីសម្រាកពីការសិក្សារៀនសូត្រ ដើម្បីធ្វើឲ្យសុខភាពផ្លូវចិត្ត និងផ្លូវកាយរឹងមាំ រៀនសូត្រឆាប់ចេះ ព្រោះក្មួយៗនេះហើយជាសសរស្តម្ភដ៏រឹងមាំនៃធនធានមនុស្ស ក្នុងការអភិវឌ្ឍសង្គមជាតិទៅអនាគតជាដើម។ លោកក៏បានផ្តាំផ្ញើដល់លោកគ្រូ អ្នកគ្រូ សិស្សានុសិស្ស ក៏ដូចជាមាតាបិតា អាណាព្យាបាល គណៈកម្មការគ្រប់គ្រងសាលា ចូលរួមថែរក្សានូវទ្រព្យសម្បត្តិក្នុងសាលា ដើមី្បប្រើប្រាស់បានយូរអង្វែង និងដើមី្បបង្កើននូវចំណេះដឹងតកូនតចៅរបស់ខ្លួនថែមទៀត។
ប្រធានដឹកនាំក្រុមរ៉ូតារីរបស់អង្គការ លោក គិម ហ្យូសង់ បានលើកឡើងថា អំណោយជាសួនកុមារជូនដល់សិស្សានុសិស្សនៅកម្ពុជា គឺមិនខុសពីបំណងរបស់អង្គការ ដែលធ្វើឲ្យមានសង្ឃឹមជឿជាក់ថា បានចូលរួមជាមួយរាជរដ្ឋាភិបាលកម្ពុជា ក្នុងការបណ្តុះបណ្តាលធនធានមនុស្សនៅតាមមូលដ្ឋានដាច់ស្រយ៉ាល។ ដើមី្បឲ្យក្លាយជាសិស្សពូកែ ចូលសិស្សានុសិស្សគ្រប់ៗគ្នា មានការអំណត់អត់ធន ឧស្សាហ៍ព្យាយាមសិក្សាស្វែងយល់រាល់កិច្ចការទៅតាមកម្មវិធីសិក្សា និងស្តាប់ការពន្យល់របស់គ្រូ និងមានភាពក្លាហានក្នុងការសិក្សាផងដែរ។
ព័ត៌មានជាតិ ថ្មីៗ
លោកបន្តថា អង្គការលោកនៅតែបន្តជួយដល់សិស្សានុសិស្សក្រីក្រនៅកម្ពុជា ទៅតាមលទ្ធភាពដែលអង្គការអាចធ្វើទៅបាន ហើយពួកយើងបានប្រឹងប្រែងកន្លងមកដើម្បីជួយក្នុងការសាងសង់សួនកុម៉ាបានប្រមាណជា ៥០កន្លែងហើយទូទាំងប្រទេសកម្ពុជា និងប្រទេសមីយ៉ាន់ម៉ា គឺក្នុងរយៈពេលបីឆ្នាំមកនេះ គម្រោងនេះត្រូវបានផ្អាកជាបណ្តោះអាសន្ន ដោយសារការរាតត្បាតនៃជម្ងឺកូវិត-១៩ តែឥឡូវយើងបានចាប់ផ្ដើមការងារនេះឡើងវិញហើយ គឺជាការងារស្ម័គ្រចិត្តក្រៅប្រទេសមានច្រើនប្រភេទនៅក្នុងប្រទេសកំពុងអភិវឌ្ឍន៍។ យើងក៏សង្ឃឹមជឿជាក់ថា ឧបករណ៍ និងសួនកុមារនេះ វាមានប្រយោជន៍ខ្លាំងណាស់សម្រាប់រាងកាយរបស់កុមារក៏ដូចជាការរអភិវឌ្ឍផ្លូវចិត្តជាដើម ជាពិសេសសួនកម្សាន្តនេះ ចូលរួមចំណែកយ៉ាងច្រើនក្នុងការបង្កើនចំណង់ ធ្វើអោយសិស្សចង់មករៀនកាន់តែខ្លាំង៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
