ឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប មានប្រសាសន៍ថា គណៈកម្មាធិការពិគ្រោះយោបល់កិច្ចការស្ត្រីនិងកុមារ ដែលហៅកាត់ថា គ.ក.ស.ក នៃរដ្ឋបាលក្រុង.ស្រុក និង គណៈកម្មាធិការទទួលបន្ទុកកិច្ចការនារី និងកុមារ ដែលហៅកាត់ថា គ.ក.ន.ក នៃឃុំសង្កាត់ ជាគណៈកម្មាធិការមួយមានសារៈសំខាន់ ដែលមានតួនាទីភារកិច្ច ចូលរួមសម្របសម្រួល ពិគ្រោះយោបល់ តាមដាន ពិនិត្យ ជំរុញ និងសហការដោះស្រាយ នូវការងារទាំងឡាយ ដែលពាក់ព័ន្ធនឹងស្ថានភាពយេនឌ័រ ស្ត្រី យុវវ័យ កុមារ និងជនងាយរងគ្រោះ សំដៅលើកកម្ពស់ ការអភិវឌ្ឍន៍ស្ថានភាពស្ត្រី និងកុមារក្នុងទូទាំងខេត្ត ដូច្នេះ ដើម្បីធ្វើឲ្យការងារទាំងអស់នេះសម្រេចបានជោគជ័យ សូមគ្រប់ភាគីពាក់ព័ន្ធទាំងអស់ក្នុងខេត្ត បន្តផ្តល់ការគាំទ្រដល់ការពង្រឹងភាពអង់អាចដល់ស្ត្រីជាអ្នកដឹកនាំ និង ជំរុញឲ្យការងារពាក់ព័ន្ធលើកកម្ពស់សមភាពយេនឌ័រ ស្ត្រី យុវជន កុមារ និងជនងាយរងគ្រោះ ឈានឆ្ពោះទៅសម្រេចឲ្យបាននូវចក្ខុវិស័យរបស់រាជរដ្ឋាភិបាលកម្ពុជានីតិកាលទី៧ នៃរដ្ឋសភា ក្រោមការដឹកនាំដ៏ឈ្លាសវៃ ប្រកបដោយគតិបណ្ឌិតរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ។
ឯកឧត្តមមានប្រសាសន៍បែបនេះ ក្នុងឱកាសអញ្ជើញជាអធិបតីក្នុងពិធីបិទសិក្ខាសាលាឆ្លុះបញ្ចាំងលទ្ធផលការងារ នៃការអនុវត្តផែនការសកម្មភាពឆ្នាំ២០២៣ និងទិសដៅអនុវត្តបន្តឆ្នាំ២០២៤ របស់គណៈកម្មាធិការពិគ្រោះយោបល់កិច្ចការស្ត្រី និងកុមារខេត្តសៀមរាប ដែលបានដំណើរការពេញ មួយថ្ងៃ នាថ្ងៃទី២២ ខែ មករា ឆ្នាំ២០២៤នេះ ដោយមានការអញ្ជើញចូលរួមពីសំណាក់លោកជំទាវ ស៊ិន ណម សមាជិកាក្រុមប្រឹក្សាខេត្ត និងជាប្រធាន គ.ក.ស.ក និង លោកស្រី យូ សោភា អភិបាលរងខេត្ត និងជាអនុប្រធាន គ.ក.ស.ក នៃរដ្ឋបាលខេត្ត ព្រមទាំងលោក លោកស្រី ជា គ.ក.ស.ក នៃរដ្ឋបាលក្រុង.ស្រុក និង គ.ក.ន.ក នៃឃុំសង្កាត់ និងអង្គការដៃគូ ចូលរួមប្រមាណ២៥០នាក់ ។
ឯកឧត្តម អ៊ាន ឃុន បន្តថា តាមរយៈនៃអង្គសិក្ខាសាលានេះ បានឆ្លុះបញ្ចាំងឲ្យឃើញនូវកិច្ចខិតខំប្រឹងប្រែងក្នុងការអនុវត្ត សកម្មភាព តួនាទី ភារកិច្ច សិទ្ធិអំណាច និងការទទួលខុសត្រូវខ្ពស់របស់គ.ក.ស.កនៃរដ្ឋបាលខេត្ត នៅក្នុងដែនសមត្ថកិច្ចរបស់ខ្លួនកាន់តែមានប្រសិទ្ធភាពខ្ពស់ និង ទទួលបាននូវបទពិសោធន៍ថ្មីៗ បន្ថែមទៀត នូវចំណុចខ្លាំង ចំណុចខ្វះខាត បញ្ហាប្រឈម និងនីតិវិធីដោះស្រាយបញ្ហាទាំងនោះ ដើម្បីឆ្លើយតប ទៅនឹងតម្រូវការរបស់ស្ត្រី យុវជន កុមារ និងជនងាយរងគ្រោះ ជាពិសេសបានអនុវត្តផែនការ កិច្ចការពារកុមារ ព្រមទាំងបង្កើនភាពអង់អាចដល់ស្ត្រីឲ្យកាន់តែល្អប្រសើរ។
ឯកឧត្តមប្រធានក្រុមប្រឹក្សាខេត្ត បន្តទៀតថា សិក្ខាសាលានាថ្ងៃនេះ បានរកឃើញនូវធាតុចូលសំខាន់ៗមួយចំនួនបន្ថែមទៀត ដើម្បីឆ្លុះបញ្ចាំងឲ្យឃើញនូវចំណុចខ្លាំង ចំណុចខ្វះខាត បទពិសោធន៍ អនុសាសន៍ ដើម្បីយកទៅអនុវត្តបន្ត ក្នុងឆ្នាំ២០២៤នេះ ឲ្យកាន់តែមានប្រសិទ្ធភាព និងសម្រេចបាន ជោគជ័យតាមផែនការដែលបានការគ្រោងទុក ពិសេសបានរកវិធីសាស្រ្តថ្មីៗផ្តល់ការគាំទ្របន្ថែមទៀត សម្រាប់អភិវឌ្ឍន៍សមត្ថភាពដល់ស្រ្តីឲ្យមានភាពអង់អាចក្លាហាន សំដៅលើកកម្ពស់ស្រ្តីសម្រាប់បន្តវេន ក្នុងភាពជាអ្នកដឹកនាំ ៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក លីវ សាន្ត
