ដោយមានការគាំទ្រនិងឧបត្ថម្ភពីគម្រោង ARISE Plus Cambodia ក្រោមសហហិរញ្ញប្បទានពី សហភាពអ៊ឺរ៉ុប(EU) និង និងរដ្ឋាភិបាលអាល្លឺម៉ង់(BMZ) នៅព្រឹកថ្ងៃទី២៣ ខែ មករា ឆ្នាំ ២០២៤នេះ សភាពាណិជ្ជកម្មមណ្ឌលសៀមរាប-ឧត្តរមានជ័យ បានបើកសិក្ខាសាលាស្តីពីការដោះស្រាយជំលោះដៃគូរអាជីវកម្ម និងយុទ្ធសាស្ត្រគ្រប់គ្រងហិរញ្ញវត្ថុ នៅសណ្ឋាគារសុខាល័យអង្គររីហ្សតនិងស្ប៉ា គឺ ដោយមានការចូលរួមពីសំណាក់អស់លោក លោកស្រី ប្រធាន អនុប្រធាន សមាគម អាជីវកម្ម.ម្ចាស់ក្រុមហ៊ុន សហគ្រាស អាជីវករ ក្នុងខេត្តសៀមរាប ប្រមាណជាង១០០នាក់ ។
លោកឧកញ៉ា បណ្ឌិត ហ៊ុយ ភៀវ អនុប្រធានសភាពាណិជ្ជកម្មកម្ពុជា និងជាប្រធានសភាពាណិជ្ជកម្មបណ្ឌលខេត្តសៀមរាប-ឧត្តរមានជ័យ បានមានប្រសាសន៍ថា គោលបំណងសំខាន់នៃការរៀបចំកម្មវិធីសិក្ខាសាលានេះ គឺផ្តល់នូវការយល់ដឹងជាក់ស្តែងនិងយុទ្ធសាស្ត្រប្រកបដោយប្រសិទ្ធភាព ដើម្បីរុករកទិដ្ឋភាពដ៏ស្មុគស្មាញនៃវិវាទពាណិជ្ជកម្ម និងការគ្រប់គ្រងបំណុលអាជីវកម្ម ព្រមទាំងការចែករំលែកនូវព័ត៌មាន និងចំណេះដឹងបន្ថែមទៀតដែលយើងគិតថា ជាចំនុច សំខាន់សម្រាប់ផ្តល់ជាទស្សនទានថ្មី ទៅដល់ម្ចាស់អាជីវកម្ម ពាណិជ្ជកម្ម សមាជិក សមាជិកាសភាពាណិជ្ជកម្ម ពាក់ព័ន្ធនឹងការដោះស្រាយវិវាទពាណិជ្ជកម្ម ព្រមទាំងការគ្រប់គ្រងហិរញ្ញវត្ថុឲ្យមានប្រសិទ្ធភាព។
លោកឧកញ៉ា បណ្ឌិត ហ៊ុយ ភៀវ បានបន្តថា សិក្ខាសាលានេះ មានវាគ្មិននិងអ្នកជំនាញដ៏ឆ្នើមជាច្រើនរូបនៅក្នុងវិស័យពាណិជ្ជកម្ម និងច្បាប់ មកធ្វើការចែករំលែកបទពិសោធន៍ផ្ទាល់របស់ពួកគាត់ ស្តីពីការអនុវត្តល្អៗដ៏មានប្រសិទ្ធភាពបំផុត និងវិធីសាស្ត្រប្រកបដោយភាពច្នៃប្រឌិត ជាពិសេស បទបង្ហាញ និងបកស្រាយពីប្រធានបទដ៏មានសារៈសំខាន់ ដើម្បីចែករំលែកពីច្បាប់លិខិតគតិយុត្តិ របៀបដោះ ស្រាយវិវាទពាណិជ្ជកម្ម ព្រមទាំងចំណេះដឹងសំខាន់ៗពាក់ព័ន្ធនឹងការគ្រប់គ្រង ប្រើប្រាស់ហិរញ្ញវត្ថុ របស់ខ្លួននៅតាមស្ថាប័ននីមួយៗ អនុវត្តល្អៗដ៏មានប្រសិទ្ធភាពបំផុត និងវិធីសាស្ត្រប្រកបដោយភាពច្នៃប្រឌិត ដែលអ្នកទាំងអស់គ្នា អាចយកទៅអនុវត្តនៅក្នុងស្ថាប័នរៀងៗខ្លួនបានផងដែរ។
លោកឧកញ៉ាបណ្ឌិត ជឿជាក់ថា សិក្ខាសាលាស្តីពី “ការដោះស្រាយវិវាទពាណិជ្ជកម្ម និងយុទ្ធសាស្ត្រគ្រប់គ្រងបំណុលអាជីវកម្មនេះ មិនត្រឹមតែផ្តល់ឱ្យអ្នកនូវវិធីសាស្ត្រចាំបាច់ក្នុងការគ្រប់គ្រង និងដោះស្រាយវិវាទពាណិជ្ជកម្ម និងគ្រប់គ្រងបំណុលអាជីវកម្មប្រកបដោយប្រសិទ្ធភាពប៉ុណ្ណោះទេ ប៉ុន្តែថែមទាំងផ្តល់នូវវេទិកាមួយសម្រាប់អ្នកទាំងអស់គ្នាដើម្បីទំនាក់ទំនង និងស្វែងយល់ពីគ្នាទៅវិញទៅមក ព្រមទាំងផ្តល់សារៈប្រយោជន៍ដល់ម្ចាស់ក្រុមហ៊ុន សហគ្រាស អ្នកប្រកបអាជីវកម្ម បានស្វែងយល់ពីនីតិវិធី ភាពចាំបាច់អ្វីខ្លះនៅពេលមានជំលោះ អាជីវកម្ម និងបញ្ហានៃការគ្រប់គ្រងហិរញ្ញវត្ថុរបស់ខ្លួន។
គួររំលឹកថា ប្រធានបទសំខាន់ៗ ក្នុងសិក្ខាសាលានេះដូចជា៖ ការណែនាំអំពីការវិវាទពាណិជ្ជកម្ម , ដើមហេតុនៃវិវាទ និងវិធីដោះស្រាយវៃឆ្លាត , កិច្ចព្រមព្រៀងអាជីវកម្មប្រកបដោយប្រសិទ្ធភាព , សារៈសំខាន់នៃការរៀបចំផែនការហិរញ្ញវត្ថុ ,យុទ្ធសាស្រ្តក្នុងការគ្រប់គ្រងបំណុលអាជីវកម្ម , ការបង្កើតFranchise (ហ្រ្វេនឆាយ) និងការរកទីផ្សារ រួមនិងបង្ហាញសេចក្តីណែនាំអំពីមជ្ឈមណ្ឌលជាតិនៃមជ្ឈត្តការផ្នែកពាណិជ្ជកម្មនិងសេវាកម្មដោះស្រាយវិវាទក្រៅប្រព័ន្ធតុលារកា ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក លីវ សាន្ត
