ក្នុងរយៈពេលពេញមួយឆ្នាំ២០២៣ មន្ត្រីជំនាញបានធ្វើការទប់ស្កាត់ និងបង្រ្កាបបទល្មើសនេសាទខុសច្បាប់បាន ៣១៨ករណី ខណៈដែលអាជ្ញាធរខេត្តសៀមរាប បានព្រមានចាត់វិធានការទៅតាមផ្លូវច្បាប់ចំពោះជនល្មើសណាដែលមិនរាងចាល ហើយនៅតែបន្តប្រើឧបករណ៍នេសាទខុសច្បាប់បន្តទៀត។
ក្នុងឱកាសដឹកនាំក្រុមការងារចម្រុះចុះទប់ស្កាត់ និងបង្ក្រាបបទល្មើសជលផល និងពិនិត្យការប្រើប្រាស់ឧបករណ៍នេសាទក្នុងភូមិសាស្ត្របឹងទន្លេសាប ខេត្តសៀមរាប នៅថ្ងៃទី២៣ ខែមករា ឆ្នាំ២០២៤នេះ លោក អ៊ឺង គឹមលាង អភិបាលរងខេត្ត បានបញ្ជាក់ថា ក្រោមកិច្ចសហការល្អ និងការខិតខំប្រឹងប្រែងពិនិត្យ និងចុះទប់ស្កាត់ជាញឹកញាប់ ឃើញថាបទល្មើសនេសាទខុសច្បាប់ក្នុងភូមិសាស្ត្រខេត្តសៀមរាប មានការថយចុះជាបន្តបន្ទាប់ ព្រោះប្រជានេសាទមួយចំនួនពួកគាត់ងាកទៅប្រកបមុខរបរជាមួយសហគមន៍ទេសចរណ៍ តាមរយៈការដឹកជញ្ជូនអ្នកទេសចរណ៍តាមកាណូត លក់ដូរចំណីអាហារ វត្ថុអនុស្សាវរីយ៍ ដល់អ្នកទេសចរណ៍ដែលទៅកំសាននៅតំបន់ទន្លេសាបជាពិសេសកំពង់ភ្លុក និងចុងឃ្នៀស។ ប៉ុន្តែទោះជាមន្ត្រីយើងខិតខំបង្ក្រាប និងទប់ស្កាត់ជាញឹកញាប់យ៉ាងណាក្ដី ក៏មិនអាចបំបាត់បទល្មើសអស់ឡើយ តែយើងអាចជួយការពារបានមួយផ្នែកធំដែរ ដូចជាការប្រើស្បៃមុង ឬសាច់អួនខុសក្រឡាដែលច្បាប់ហាមឃាត់ហើយដែលយើងត្រូវរួមគ្នាទប់ស្កាត់ និងបង្រ្កាបជាបន្តទៀត។
លោកបន្ថែមថា បន្ទាប់ពីយុទ្ឋនាការចុះពិនិត្យ និងបំផ្លាញចោលបទល្មើសនេសាទខុសច្បាប់នេះរួច កម្លាំងពាក់ព័ន្ឋនឹងធ្វើការស្រង់ស្ថិតិ និងកំណត់ទីតាំង និងមុខសញ្ញាជនល្មើសតាមរយៈយន្តការផ្សព្វផ្សាយណែនាំ អប់រំ ឱ្យប្រើប្រាស់ឧបករណ៍នេសាទដែលច្បាប់បានកំណត់ ធ្វើកិច្ចសន្យាបើមិនរាងចាល នឹងកសាងសំណុំរឿងទៅតុលាការអនុវត្តតាមច្បាប់តែម្ដង។
បើតាមលោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត បានឱ្យដឹងថា ប៉ុន្មានឆ្នាំចុងក្រោយនេះ ដោយសារអាកាសធាតុមានការប្រែប្រួល បានបណ្តាលឱ្យទឹកមានសភាពគោករាក់ ហើយឆ្នាំនេះស្រកចុះប្រមាណជា១ម៉ែត្រ បើធៀបទៅនឹងឆ្នាំមុន ប៉ុន្តែទិន្នផលត្រីមានការកើនឡើង១៥ភាគរយប្រៀបធៀបពេលដូចគ្នាទៅនឹងឆ្នាំមុន។ ជាមួយនោះមន្ត្រីជំនាញបានចេញបង្ក្រាប និងទប់ស្កាត់ជាញឹកញាប់ ហើយបងប្អូនប្រជានេសាទក៏បានចូលរួមអនុវត្តតាមការណែនាំមិនអនុញ្ញាតិឱ្យប្រើឧបករណ៍ខុសច្បាប់ ប្រជានេសាទភាគច្រើននេសាទជាលក្ខណៈប្រណៃណី និងមួយចំនួនធំបានកែប្រែមុខរបរទៅជាលក់ដូរ ខ្លះស្វែងរកការងារនៅឯទីប្រជុំជន ការងារសំណង់ ខ្លះទៅធ្វើចម្ការជាដើម។
លោកប្រធានមន្ទីរបានឲ្យដឹងទៀតថា ក្នុងឆ្នាំ២០២៣កន្លងទៅ មន្ត្រីជំនាញបានចុះធ្វើការទប់ស្កាត់ និងបង្រ្កាបបទល្មើសចំនួន ៣១៨ករណី ធៀបនឹងឆ្នាំមុន កើនឡើង ១៥ករណី ដោយបំផ្លាញចោលឧបករណ៍បទល្មើសនៅនឹងកន្លែងចំនួន ៣១០ករណី និងបញ្ជូនទៅសាលាដំបូងខេត្តចំនួន ៨ករណី ប៉ុន្តែក៏នៅជួបបញ្ហាប្រឈមខ្លះៗព្រោះតែប្រជានេសាទមានលំនៅដ្ឋានក្នុងដែននេសាទ មានភាពងាយស្រួលក្នុងការប្រព្រឹត្តិបទល្មើសនេសាទ ដូចជាឧបករណ៍ស្បៃមុង ប ឈ្នក់ ឆក់ជាដើម។
សូមជំរាបថា អាជ្ញាធរខេត្តសៀមរាប បានសហការជាមួយមន្ត្រីជំនាញនៃមន្ទីរកសិកម្ម រុក្ខាប្រមាញ់ និងនេសាទខេត្ត និងអ្នកពាក់ព័ន្ធបានចុះយុទ្ឋនាការរយៈពេល ៣ថ្ងៃ ចាប់ពីថ្ងៃទី២២-២៤ ខែមករា ឆ្នាំ២០២៤ ដើម្បីត្រួតពិនិត្យ ទប់ស្កាត់ និងបង្ក្រាបភ្លាមៗ ចំពោះឧបករណ៍នេសាទខុសទៅច្បាប់ស្តីពីជលផល និងសង្កេតពីសកម្មភាពការប្រើឧបករណ៍នេសាទ ក្នុងភូមិសាស្ត្របឹងទន្លេសាបនៃ ខេត្តសៀមរាប។ ក្នុងរយៈពេល២ថ្ងៃកន្លងទៅ ថ្ងៃទី២២-២៣ ខែមករានេះ ក្រុមការងារបានបំផ្លាញឧបករណ៍នេសាទល្មើសច្បាប់ចោលនៅនឹងកន្លែងបានចំនួន ២ករណី ក្នុងនោះ៖ ក្បាលបចំនួន១៨គ្រឿង របាំងសាច់អួនប្រវែង៣.៦០០ម៉ែត្រ ចម្រឹងចំនួន៩០០ដើម និងព្រលែងត្រីចម្រុះចំនួន ១២០គីឡូក្រាម៕
អត្ថបទ និងរូបភាព៖ លោក យូ វង្ស
