ក្រុមកាកបាទក្រហមនៃប្រទេសកូរ៉េជាង ៣០នាក់ បានចុះទស្សនកិច្ចផ្លាស់ប្ដូរបទពិសោធន៍នៃការជួយសង្គ្រោះករណីគ្រោះថ្នាក់ផ្សេងៗ និងមនុស្សធម៌ ជាមួយក្រុមកាកបាទក្រហមកម្ពុជាខេត្តសៀមរាប នៅអនុវិទ្យាល័យសម្ដេចតេជោ ហ៊ុន សែន គ្រួស ក្រុងសៀមរាប នៅថ្ងៃទី២៣ ខែមករា ឆ្នាំ២០២៤។
នាយករង នាយកដ្ឋានធនធានមនុស្សកាកបាទក្រហមកម្ពុជា ឯកឧត្ដម ឃុន សាម៉េង មានប្រសាសន៍ថា ក្រុមប្រតិភូកាកបាទក្រហមនៃប្រទេសកូរ៉េ បានចុះមកធ្វើទស្សនកិច្ចជាមួយកាកបាទក្រហមកម្ពុជា ជាច្រើនលើកមកហើយ ហើយនៅឆ្នាំ២០២៤នេះ គណៈប្រតិភូកាកបាទក្រហមកម្ពុជា ក៏ធ្លាប់បានទៅទស្សនៈកិច្ចនៅប្រទេសកូរ៉េផងដែរ។ ការធ្វើសកម្មភាពរួបគ្នានេះ ក្រុមកាកបាទក្រហមកម្ពុជា និងកាកបាទក្រហមកូរ៉េ បានបង្ហាញការរីករាយ ដែលបានធ្វើការងារសង្គមជាមួយគ្នាជាពិសេសពួកគាត់បានបង្កើតស្នាមញញឹមរវាងប្រជាជននៃប្រទេសទាំងពីរ។
តំណាងប្រតិភូកាកបាទក្រហម សាខាឆុងជី ប្រទេសកូរ៉េ លោកស្រី ផាក យ៉ុងជេ (Park Younghee) បានបង្ហាញការរីករាយដែលបានបំពេញទស្សនៈកិច្ចធ្វើសកម្មភាពមនុស្សធម៌ និងផ្លាស់ប្ដូរបទពិសោធន៍ជាមួយសាខាកាកបាទក្រហមកម្ពុជាខេត្ដសៀមរាប ស្របពេលដែលកាកបាទក្រហមប្រទេសកូរ៉េ គម្រប់ខួប៧០ឆ្នាំ។ លោកស្រីបន្ដថា ការទំនាក់ទំនងកាកបាទក្រហមប្រទេសទាំងពីរ ប្រៀបដូចជាគ្រួសារតែមួយ។ ជាក់ស្ដែងសិស្សានុសិស្សនៅសាលារៀន សម្ដេចតេជោ ហ៊ុន សែន គ្រួស មានភាពរាក់ទាក់គួរឱ្យស្រលាញ់ ដែលលោកស្រីថា នៅឆ្នាំក្រោយៗទៀត ក្រុមកាកបាទក្រហមប្រទេសកូរ៉េ សាខាឆុងជឺនឹងបន្ដមកកាន់ប្រទេសកម្ពុជាថែមទៀត។
លោក លី ប៊ុនណ្ណា លេខាធិការគណៈកម្មាធិការសាខាកាកបាទក្រហមខេត្ដសៀមរាប មានប្រសាសន៍ថា ប្រទេសកម្ពុជាធ្លាប់រងនូវមហាវិនាសកម្មប្រល័យពូជសាសន៍ គ្រប់រចនាសម្ព័ន្ធសង្គមត្រូវបំផ្លាញដល់កំរិតសូន្យ ពិសេសបញ្ញាវ័ន្តរងនូវការកាប់សម្លាប់ស្ទើរអស់ ហើយសង្គ្រាមផ្ទៃក្នុងបានអូសបន្លាយជាច្រើនទស្សវត្ស ប៉ុន្ដែក្នុងរយៈពេលកន្លងមកនេះ រាជរដ្ឋាភិបាល និងប្រជាជនបានរួមគ្នា ខិតខំកសាងឡើងវិញយ៉ាងលំបាក រហូតមានការអភិវឌ្ឍន៍ជាបន្តបន្ទាប់ដល់បច្ចុប្បន្ននេះ។ លោកបន្ដថា មកដល់សព្វថ្ងៃ វិស័យអប់រំក្នុងខេត្តសៀមរាប ក៏មានការរីកដដុះដាលនូវគ្រឹះស្ថានឧត្តមសិក្សា សកលវិទ្យាល័យ មធ្យមសិក្សា បឋមសិក្សា និងមតេយ្យសិក្សា ដែលមានសិស្សានុសិស្សចូលរៀនរាប់ម៉ឺននាក់។ លោកសង្ឃឹមថា ដំណើរទស្សនៈកិច្ចរបស់យុវជនកាកកាទក្រហមកូរ៉េ នឹងបានផ្ដល់បទពិសោធន៍ល្អៗដល់យុវជន និងសិស្សានុសិស្សរបស់កម្ពុជា៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
