ក្នុងពិធីរំលឹកខួបលើកទី៣៥ឆ្នាំនៃបេសកកម្មរបស់អង្គការមូលនិធិប្រាសាទពិភពលោក(World Monument Fund សរសេរអក្សរកាត់ថា WMF) របស់សហរដ្ឋអាមេរិក កាលពីរសៀលថ្ងៃទី២៦ ខែមករា ឆ្នាំ២០២៤ អង្គការនេះបានធ្វើពិធីប្រគល់ និង ទទួលជួសជុលការដ្ឋានប្រាសាទចំនួន៣ក្នុងរមណីយដ្ឋានអង្គរ រួមមាន ៖ ១. ប្រាសាទតាសោម , ២. ប្រាសាទព្រះខ័ន និង ៣.រោងទងនៃចម្លាក់សមុទ្រកូទឹកដោះរបស់ប្រាសាទអង្គរវត្តជូនអាជ្ញាធរអប្សរាគ្រប់គ្រងវិញ ក្រោមអធិបតីភាពរបស់លោកជំទាវបណ្ឌិតសភាចារ្យភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ ។
លោកជំទាវបណ្ឌិតសភាចារ្យភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ បានថ្លែងថា អាជ្ញាធរជាតិអប្សរានឹងបន្តថែរក្សាប្រាសាទទាំងបីនេះ ហើយកម្ពុជានឹងចងចាំជារៀងរហូតចំពោះការរួមចំណែករបស់ WMF ក្នុងការជួយការពារបេតិកភណ្ឌជាតិរបស់កម្ពុជា ហើយកម្ពុជាក៏រង់ចាំបន្តធ្វើការជាមួយអង្គការមូលនិធិប្រាសាទពិភពលោកក្នុងវិស័យទូលំទូលាយដូចជាការផ្លាស់ប្តូរជំនាញស្តីពីការអភិរក្ស វេទិកាយុវជនសម្រាប់ការគ្រប់គ្រងបេតិកភណ្ឌ ការស្រាវជ្រាវផ្នែកបុរាណវិទ្យានិងសិក្ខាសាលារួមគ្នាដើម្បីចែករំលែកបទពិសោធន៍ជាដើម។
អ្នកស្រី Benedicte De Montlaur នាយកប្រតិបត្តិរបស់អង្គការមូលនិធិប្រាសាទពិភពលោករបស់សហរដ្ឋអាមេរិក បានថ្លែងថា ការចូលរួមរបស់ WMF ក្នុងការងារជួសជុលប្រាសាទនៅរមណីដ្ឋានអង្គរ បានចាប់ផ្តើមតាំងពីឆ្នាំ១៩៨៩ ជាមួយនឹងបេសកកម្មចុះវាល ដើម្បីវាយតម្លៃស្ថានភាពនៃប្រាសាទ ឆ្លើយតបតាមការស្នើសុំរបស់អតីតព្រះមហាក្សត្រព្រះបាទនរោត្តម សីហនុ ហើយបន្ទាប់មក WMF ក៏បានបង្កើតកម្មវិធីអភិរក្ស និងបណ្តុះបណ្តាលដ៏ទូលំទូលាយ ដោយជួយបំពេញបន្ថែមទៅលើកិច្ចខិតខំប្រឹងប្រែងរបស់សាកលវិទ្យាល័យភូមិន្ទវិចិត្រ សិល្បៈ(RUFA) ដែលទើបនឹងបើកឡើងវិញ។
អ្នកស្រីបន្តថា ចាប់តាំងតែពីឆ្នាំ១៩៩១ ក្នុងពេលដែលប្រធាន WMF បានធ្វើទស្សនកិច្ចលើកដំបូងមកកាន់អង្គរ គឺជាចំណុចចាប់ផ្តើមនៃកិច្ចសហប្រតិបត្តិការដ៏ធំធេងនិងនិរន្តរភាពរវាង WMF និង រាជរដ្ឋាភិបាលកម្ពុជា ដែលរហូតមកដល់ថ្ងៃនេះ WMF បានទទួលការគាំទ្រយ៉ាងត្រចះត្រចង់ទាក់ទងនឹងជំនាញសម្រាប់ការស្រាវជ្រាវ និងឯកសារអំពីបេតិកភណ្ឌស្ថាបត្យកម្មកម្ពុជា អន្តរាគមន៍ក្នុងការផ្តល់ស្ថេរភាព និងការអភិរក្សប្រាសាទ ព្រមទាំងការបណ្តុះបណ្តាលសំខាន់ៗសម្រាប់អ្នកអភិរក្សកម្ពុជា ។
គួររំលឹកថា យោងទៅលើប្រវត្តិសាស្ត្រកម្ពុជា កម្ពុជាសូមថ្លែងអំណរព្រះគុណចំពោះសម្តេចសម្តេចព្រះនរោត្តម សីហនុ អតីតព្រះមហាក្សត្រនៃព្រះរាជាណាចក្រកម្ពុជា បានខិតខំខ្នះខ្នែងអំពាវនាវរកជំនួយអន្តរជាតិក្នុងឆ្នាំ១៩៨៩សម្រាប់ជួយសង្គ្រោះប្រាសាទបុរាណខ្មែរជាច្រើន ហើយកម្ពុជាក៏ទទួលស្គាល់ការដឹកនាំដ៏រឹងមាំរបស់សម្តេចតេជោហ៊ុន សែន អតីតនាយករដ្ឋមន្ត្រីនៃព្រះរាជាណាចក្រកម្ពុជា ចំពោះការប្តេជ្ញាចិត្តក្នុងការការពារអង្គរដ៏អស្ចារ្យរបស់សម្តេចផងដែរ៕
អត្ថបទ និងរូបភាព៖ លោក ឈិត សាវី
កែសម្រួល៖ លោក លីវ សាន្ត
