លោក កាវ៉ាហ្គឹឈិ ម៉ាសាគី តំណាងការិយាល័យកុងស៊ូលជប៉ុនប្រចាំខេត្តសៀមរាប មានប្រសាសន៍ថា លោកមានការភ្ញាក់ផ្អើល និង សូមកោតសសើរចំពោះសិស្សកម្ពុជា ដែលបានរៀនភាសាជប៉ុន ហើយទាំងការអាន និងការបញ្ចេញសំឡេងបានល្អ ប៉ុន្តែទោះយ៉ាងណាក៏ដោយ ក៏ក្រុមគណៈកម្មការបានរកឃើញនូវចំណុចខ្វះខាតក្នុងពេលប្រឡង ដោយសិស្សខ្លះអានប្រយោគឃ្លានិងបញ្ចេញសំឡេង មិនទាន់ត្រឹមត្រូវ១០០ភាគរយ ការអានញាប់ឬលឿនពេក ការលើកដាក់សំឡេងមិនទាន់រលូនទៅតាមខ្លឹមសារអត្ថបទឬសាច់រឿង និង សិស្សខ្លះទៀត អាននៅមានភាពរអាក់រួលឬមិនទាន់ចេះទម្លាក់ឬលើកសំឡេងទៅតាមតួអង្គនៃអត្ថបទរឿង។
លោកមានប្រសាសន៍យ៉ាងដូច្នេះ ក្នុងឱកាសអញ្ជើញជាអធិបតីក្នុងការប្រឡងប្រជែងផ្នែកសមត្ថភាពសិស្សរៀនភាសាជប៉ុន ដែលជាសិស្សនិងនិស្សិតកម្ពុជានៅខេត្តសៀមរាប កាលពីរសៀលថ្ងៃទី២៨ ខែមករា ឆ្នាំ២០២៤ នៅសាកលវិទ្យាល័យអង្គរខេត្តសៀមរាប ។
លោក កាវ៉ាហ្គឹឈិ ម៉ាសាគី បន្តថា៖ ភាសាជប៉ុនសម្រាប់កម្ពុជាជាវិស័យមួយរួមចំណែកក្នុងការអភិវឌ្ឍន៍ និង រឹតចំណងមិត្តភាព សាមគ្គីភាពរវាងកម្ពុជានិងជប៉ុនដែលមានតាំងពីយូរម ហើយឱ្យរឹងរឹតតែរឹងមាំខ្លាំងក្លាឡើងថែមទៀត ជាមួយគ្នានេះមូលនិធិជប៉ុនបានផ្តល់ការគាំទ្រនិងចាត់គ្រូបង្រៀនឱ្យបង្រៀននិងលើកទឹកចិត្តឱ្យកម្ពុជាសិក្សាភាសាជប៉ុនជាបន្តបន្ទាប់មក ។
អ្នកស្រីអូនី ហ៊ីហ្វឺមី គ្រូបង្រៀនភាសាជប៉ុននៃសមាគមគ្រូបង្រៀនភាសាជប៉ុនអង្គរវត្ត មានប្រសាសន៍ថា៖ នៅកម្ពុជា កន្លែងរៀនភាសាជប៉ុនមាននៅតែខេត្តសៀមរាបនិងរាជធានីភ្នំពេញប៉ុណ្ណោះ ខណៈនៅភ្នំពេញកម្មវិធីប្រឡងមានច្រើនបែបយ៉ាង និងមានភាពប្រកួតប្រជែងយ៉ាងសម្បូរបែបដូចជាកម្មវិធីសំណួរចម្លើយកម្មវិធីចំរៀងជាដើម រីឯនៅខេត្តសៀមរាបមានការលំបាកប្រសិនបើចង់ប្រឡងទាល់តែទៅភ្នំពេញ តែដោយសារបញ្ហាបែបនេះទើបសម្រេចឱ្យមានការប្រឡងនៅខេត្តសៀមរាប ដើម្បីឱ្យអ្នកកំពុងរៀនភាសាជប៉ុន មានការប្រឡងប្រកួតប្រជែងវាស់ស្ទង់សមត្ថភាព លើការអាន ការបញ្ចេញសំឡេង ។
លោកស្រីអូនី ហ៊ីហ្វឺមី បន្តថា ៖ នេះជាឆ្នាំទី១៣ សម្រាប់ការប្រឡងវាស់សមត្ថភាពភាសាជប៉ុនសុទ្ឋសាធ ដូចបណ្តាឆ្នាំមុនៗដែរ ប៉ុន្តែដោយសារខេត្តសៀមរាប មានអ្នកសិក្សាភាសាជប៉ុនច្រើន និងមានអាយុខុសៗគ្នា អ្នកខ្លះជាសិស្សបឋមសិក្សា អនុវិទ្យាល័យ និង វិទ្យាល័យ ហើយអ្នកខ្លះជាមន្ត្រីរាជការ និងអ្នកធ្វើការឯកជនផ្សេងៗ ហេតុនេះទើបសម្រេចឱ្យមានការប្រឡងបែបអំណាន មានជាអំណានទោលសម្រាប់សិស្សអនុវិទ្យាល័យចុះក្រោម អំណានជាក្រុមចាប់ពីវិទ្យាល័យឡើងលើ និងការសម្តែងជាក្រុមរឿងខ្លីជាដើម ព្រោះសិស្សបឋមមិនអាចអានសុន្ទរកថាបានល្អនោះទេ ហើយអ្នកធ្វើការក៏មិនមានពេលទន្ទេញដែរ ។
សូមបញ្ជាក់ថា៖ ការប្រឡងប្រជែងផ្នែកសមត្ថភាពសិស្សរៀនភាសាជប៉ុន ដែលជាសិស្សនិងនិស្សិតកម្ពុជានៅខេត្តសៀមរាបនោះ រៀបចំឡើងដោយសមាគមគ្រូបង្រៀនភាសាជប៉ុនអង្គរវត្ត ដែលសហការគាំទ្រពីស្ថានទូតជប៉ុនប្រចាំកម្ពុជា ការិយាល័យកុងស៊ុលជប៉ុនប្រចាំខេត្តសៀមរាប និងសមាគមជនជាតិជប៉ុនកម្ពុជាសាខាខេត្តសៀមរាប មានសិស្សនិងនិស្សិតកម្ពុជានៅខេត្តសៀមរាបចូលរួមប្រកួតចំនួន២៧នាក់ សុទ្ឋតែជាសិស្សដែលបានប្រឡងជាប់នៅវគ្គជំរុះ ដោយឆ្លងកាត់ការវាយតម្លៃយ៉ាងសុក្រិតបំផុត កាលពីថ្ងៃទី១៧ខែធ្នូឆ្នាំ២០២៣នៅគ្រឺះស្ថានអប់រំវប្បធម៌ជប៉ុនអន្តរជាតិ ។
ការប្រឡងលើកទី១៣នេះ វត្តមានគណៈកម្មការវាយតម្លៃ គឺជាមន្ត្រីនៃស្ថានទូតជប៉ុនប្រចាំនៅកម្ពុជា និងការិយាល័យកុងស៊ុលជប៉ុនប្រចាំខេត្តសៀមរាប លោកគ្រូអ្នកគ្រូ ជាសាស្ត្រាចារ្យជប៉ុនជាច្រើនផងដែរ ដើម្បីផ្ទៀងផ្ទាត់ វាយតម្លៃផ្តល់ពិន្ទុនិងផ្តល់វិញ្ញាបនបត្របញ្ជាក់ពីសមត្ថភាព រួមទាំងការផ្ដល់រង្វាន់លើកទឹកចិត្ត ៕
អត្ថបទ និងរូបភាព៖ លោក យូ វង្ស
កែសម្រួល៖ លោក លីវ សាន្ត
