នៅថ្ងៃទី៣០ ខែមករា ឆ្នាំ២០២៤នេះ ក្រុមការងាររដ្ឋបាលខេត្តសៀមរាប បានចុះជួប និងទទួលសំណើសុំបន្ដជួយឧបត្ថម្ភកញ្ចប់ថវិកា របស់ប្រជាពលដ្ឋដែលបានស្ម័គ្រចិត្តផ្លាស់ទីលំនៅ ពីតំបន់រមណីយដ្ឋានអង្គរ មករស់នៅក្រុងតេជោសែនរុនតាឯក ដើម្បីដាក់ជូនរាជរដ្ឋាភិបាលសម្រេច បន្ទាប់ពីរាជរដ្ឋាភិបាលកែសម្រួលកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលកូវីដ១៩ នៃ អនុក្រឹត្យ៣៧១។
លោក លី វណ្ណៈ នាយករដ្ឋបាលសាលាខេត្ដសៀមរាប រាជរដ្ឋាភិបាល ដែលដឹកនាំដោយ សម្ដេច ធិបតី ហ៊ុន ម៉ាណែត នៅតែបន្តយកចិត្តទុកដាក់ និងគិតគូរខ្ពស់ទៅដល់បងប្អូនប្រជាពលរដ្ឋ ដែលបានមករស់នៅ ក្រុងតេជោសែន រុនតាឯក។ ជាមួយនោះ រដ្ឋបាលខេត្ត នឹងយកសំណើ របស់បងប្អូនប្រជាពលរដ្ឋដាក់ជូនប្រមុខរាជរដ្ឋាភិបាល និងសង្ឃឹមថា នឹងមានចម្លើយឆាប់ៗនាពេលខាងមុខ។
ទន្ទឹមនឹងការចុះជួបដោយផ្ទាល់ពីសំណាក់អាជ្ញាធរខេត្តនាពេលនេះ ប្រជាពលរដ្ឋភាគច្រើន នៃក្រុងតេជោសែនរុនតាឯក បានបង្ហាញការសប្បាយចិត្ត និងថ្លែងអំណរគុណជាមួយកាយវិការប្រកបដោយព្រហ្មវិហារធម៌របស់ប្រមុខរាជរដ្ឋាភិបាល និងរំពឹងថារាជរដ្ឋាភិបាល នឹងបន្តផ្ដល់ប្រាក់ឧបត្ថម្ភតាមការស្នើសុំដូចដើម។
អត្ថបទ និងរូបភាព៖ លោក បូ សាវី
កែសម្រួល៖ លោក សេង ផល្លី
