នៅថ្ងៃទី២៩ ខែមករា ឆ្នាំ២០២៤នេះ ព្រះគ្រូវិចិត្រវង្សា ហែម គឹមសាន ញាតិធម្មោ ព្រះចៅអធិការវត្តប្រាសាទគោកចក ក្រុងសៀមរាប បានដឹកនាំសប្បុរសជនមកពីរាជធានីភ្នំពេញ នាំយកនូវសម្ភារៈសិក្សារួមនឹងថវិកាមួយចំនួន ចែកជូនដល់សិស្សានុសិស្សចំនួន ៣៨៥នាក់ ដែលកំពុងសិក្សានៅសាលាបឋមសិក្សាកំពង់ភ្លុក ឃុំកំពង់ភ្លុក ស្រុកប្រាសាទគង ខេត្តសៀមរាប។
ព្រះគ្រូវិចិត្រវង្សា ហែម គឹមសាន មានសង្ឃដីការថា បច្ចុប្បន្នរាជរដ្ឋាភិបាលកម្ពុជា បានផ្តោតការយកចិត្តទុកដាក់ និងធ្វើកំណែទម្រង់ស៊ីជម្រៅទៅលើវិស័យអប់រំ ដោយបង្ខិតសាលារៀនឲ្យកូនចៅប្រជាពលរដ្ឋ ឬអាចនិយាយបានថា សាលារៀនរត់រកមនុស្ស និងដើម្បីពង្រឹងការសិក្សាដល់សិស្សានុសិស្សឲ្យមានគុណភាព ទទួលបានធនធានមនុស្សល្អៗ ប្រកបដោយសមត្ថភាព ចូលរួមចំណែកក្នុងការអភិវឌ្ឍន៍ប្រទេសឲ្យទទួលបានការរីកចម្រើនជាលំដាប់។
ព្រះគ្រូ មានសង្ឃដិកាបញ្ជាក់ថា ចំពោះសម្ភារៈសិក្សាជាច្រើនមុខដែលយកមកចែកជូនដល់ប្អូនៗសិស្សានុសិស្សនាពេលនេះ គឺបានមកពីការចូលរួមបរិច្ចាគពីសំណាក់សប្បុរសជន នៅរាជធានីភ្នំពេញ ដែលអំណោយទាំងនេះ គឺពិតជាបានរួមចំណែកដល់ការបំពេញតម្រូវការខ្វះខាតរបស់ប្អូនៗឲ្យកាន់តែល្អប្រសើរ នៅក្នុងការសិក្សា និងដើម្បីប្រើប្រាស់ក្នុងការរៀនសូត្រ។ ព្រះអង្គក៏បានថ្លែងអំណរគុណចំពោះសប្បុរសជនទាំងអស់ ដែលមានក្ដីស្រលាញ់ចំពោះប្អូនៗមានទឹកចិត្តដ៏ធំក្នុងការជួយទៅដល់ពួកគេ។
ព្រះអង្គ ក៏បានជំរុញនឹងលើកទឹកចិត្តដល់ក្មួយៗ ដល់សិស្សានុសិស្សទាំងអស់ឲ្យខិតខំប្រឹងប្រែងរៀនសូត្រ ឲ្យបានខ្លាំងក្លាថែមទៀត ព្រោះថាចំណេះវិជ្ជា ជាស្ពានមួយដ៏សំខាន់សម្រាប់ក្មួយៗ ឆ្លងឲ្យផុតពីគ្រោះអវិជ្ជា នឹង ធ្វើឲ្យក្មួយៗ ក្លាយទៅជាធនធានមនុស្ស ដ៏មានតម្លៃ របស់ប្រទេសជាតិ។ ក្មួយៗទាំងនេះហើយ ដែលជាសសរស្តម្ភដ៏រឹង មាំក្នុងកិច្ចកសាងអភិវឌ្ឍន៍ប្រទេសជាតិបន្តវេន៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
