នៅទូទាំងខេត្តសៀមរាប សិស្សប្រឡងជាប់សញ្ញាបត្រមធ្យមសិក្សាទុតិយភូមិ ឬហៅថាបាក់ឌុប ក្នុងឆ្នាំសិក្សា២០២២-២០២៣ ដែលទទួលបាននិទ្ទេស A សរុបចំនួន ១៨៨នាក់ ក្នុងនោះស្រុកពួក ក៏ទទួលបានសិស្សជាប់និទ្ទេស A ចំនួន១៥នាក់ផងដែរ។ នេះបើតាមរបាយការណ៍របស់ ការិយាល័យអប់រំ យុវជន និងកីឡាស្រុកពួក ខេត្ដសៀមរាប បានប្រជុំបូកសរុប និងវាយតម្លៃលទ្ធផលការងារអប់រំយុវជន និងកីឡាឆ្នាំសិក្សា២០២៣ និងលើកទិសដៅឆ្នាំសិក្សា២០២៤ នៅថ្ងៃទី៣១ខែមករា ឆ្នាំ២០២៤ នៅវិទ្យាល័យចំណេះទូទៅ និងបច្ចេកទេសពួក ស្រុកពួក ខេត្ដសៀមរាប។
របាយការណ៍ដដែលនេះ បានបង្ហាញថា សម្រាប់ស្រុកពួក មានសាលាមត្តេយ្យសិក្សាសរុបចំនួន ៦១សាលា។ សាលាកម្រិតបឋមសិក្សាសរុបចំនួន ៦៥សាលា កម្រិតមធ្យមសិក្សាសរុបចំនួន ១៤សាលា ក្នុងនោះវិទ្យាល័យមានចំនួន ៤សាលា។
ព័ត៌មានជាតិ ថ្មីៗ
លោក ស៊ិន ចាន់ថុល អភិបាលស្រុកពួក លើកឡើងថា លទ្ធផលដ៏ល្អប្រសើរនេះ បានបង្ហាញពីការរីកចម្រើន នៃវិស័យអប់រំនៅមូលដ្ឋាន និងការខិតខំប្រឹងប្រែងរបស់លោកគ្រូ អ្នកគ្រូ ព្រមទាំងអ្នកពាក់ព័ន្ធ ដើម្បីកសាងយុវជនរបស់យើង ក្លាយទៅជាមូលធនមនុស្ស ស្របតាមគោលដៅអភិវឌ្ឍន៍ប្រកបដោយចីរភាពឆ្នាំ២០៣០ ដែលជាប្រទេសមានចំណូលមធ្យមកម្រិតខ្ពស់ និងក្លាយជាប្រទេសអភិវឌ្ឍន៍នៅឆ្នាំ២០៥០។
លោកអភិបាលស្រុក ក៏បានបញ្ជាក់ផងដែរថា ដើម្បីពង្រឹងបន្ថែមលើការងារអប់រំនេះ និង ក្នុងនាមយើងជាអ្នកផ្ទេរចំណេះដឹងដល់អ្នកបន្តវេន ចាំបាច់ណាស់ត្រូវបណ្តុះបណ្តាលអ្នកបន្តវេនឱ្យទៅជាមនុស្សពេញលេញ ដែលមានសម្បទាទាំង៤យ៉ាងគឺវិជ្ជាសម្បទា បំណិនសម្បទា ចរិយាសម្បទា និងកាយសម្បទា៕
អត្ថបទ និងរូបភាព៖ លោក បូ សាវី
កែសម្រួល៖ លោក សេង ផល្លី
