ពិធីបុណ្យផ្កាប្រាក់សាមគ្គី ដែលផ្តួចផ្ដើមឡើងដោយព្រះគ្រូចៅអធិការ ព្រះសង្ឃ គណៈកម្មការ អាចារ្យវត្ត និងប្រជាពុទ្ឋបរិស័ទចំណុះជើងវត្តអធ្វា ក្រុងសៀមរាបកាលពីរសៀលថ្ងៃទី៣០ ខែមករា ឆ្នាំ២០២៤កន្លងទៅនេះ ប្រមូលបច្ច័យបានចំនួន ៤២លាន និង ៣៤៣ដុល្លារ សម្រាប់យកទៅប្រើប្រាស់ក្នុងស្ថាបនាផ្លូវបេតុងថ្មី ស្របតាមរបងវត្តប៉ែកខាងជើង ឆ្លងកាត់ភូមិចំនួន៤ នៃសង្កាត់សៀមរាប។
បើតាមគណៈកម្មការវត្ត បានឲ្យដឹងថា កាលពីមុនជាផ្លូវដីក្រហម មានស្ថានភាពពិបាកក្នុងការធ្វើដំណើរខ្លាំង ជាពិសេសក្នុងរដូវវស្សា ហើយដោយមើលឃើញពីភាពលំបាកនេះ អាជ្ញាធរសង្កាត់សៀមរាប ព្រះចៅអធិការ គណៈកម្មការវត្តរួមជាមួយប្រជាពុទ្ឋបរិស័ទចំណុះជើងវត្តអធ្វា បានរួមគ្នាបរិច្ចាគធនធានថវិកា និងបានអំពាវនាវកៀរគរដល់សប្បុតសជិតឆ្ងាយជួយជាវិភាគទានសម្រេចស្ថាបនាផ្លូវនេះថ្មីឡើងវិញ ជាផ្លូវបេតុងដោយចងដែកសរសៃទំហំ១០លី និងចាក់បេតុងតាមលក្ខណៈបច្ចេកទេសត្រឹមត្រូវ។ ផ្លូវបេតុងថ្មីដែលមានប្រវែង ១.០៣៨ម៉ែត្រ ទទឹង៦ម៉ែត្រ កម្រាស់២តិក ជាផ្លូវស្របតាមរបងវត្តប៉ែកខាងជើងឆ្លងកាត់ភូមិចំនួន៤ ខាងលិចជាប់នឹងផ្លូវទៅភ្នំក្រោម ខាងកើតជាប់នឹងផ្លូវមាត់ស្ទឹងសៀមរាប បានចាប់ផ្តើមសាងសង់កាលពីខែមេសា ឆ្នាំ២០២៣ ប្រើរយៈពេលជាង១០ខែ។
ព័ត៌មានជាតិ ថ្មីៗ
ព្រះគ្រូ ភ្លឿន រដ្ឋ ព្រះគ្រូសូត្រស្តាំវត្តអធ្វា មានសង្ឃដីកាថា ការណ៍ដែលព្រះសង្ឃ អាជ្ញាធរមូលដ្ឋាន និងប្រជាពុទ្ឋបរិស័ទ ឯកភាពគ្នាបង្កើតជាអង្គផ្កាសាមគ្គីនេះឡើង គឺដើម្បីប្រមូលបច្ច័យយកទៅសងក្រុមហ៊ុនសាងសង់ដែលនៅខ្វះចំនួន ៦២.០០០ដុល្លារ។ ព្រះអង្គសង្ឃឹមថា ថវិកាដែលនៅជំពាក់នឹងបានរួចរាល់ក្នុងពេលខាងមុខ តាមរយៈការចូលរួមបរិច្ចាគពីញាតិញោមពុទ្ឋបរិស័ទជិតឆ្ងាយ និងកម្មវិធីបុណ្យផ្សេងៗ ព្រោះថា ផ្លូវបេតុងមួយខ្សែនេះគឺបំរើប្រយោជន៍សាធារណៈ ជួយកាត់បន្ថយពេលវេលានៃការធ្វើដំណើរ និងជាពិសេសជួយសម្រួលដល់ស្ត្រីមានផ្ទៃពោះ និងអ្នកមានជំងឺផ្សេងៗងាយស្រួលទៅកាន់មណ្ឌលសុខភាព ដែលស្ថិតនៅតាមផ្លូវនេះ ក៏ដូចជាជួយសុវត្ថិភាពសម្រាប់ការធ្វើដំណើរទៅសាលារៀនរបស់កុមារតូចៗក្នុងមូលដ្ឋាននេះ និងក៏ជាច្រកជួយកាត់បន្ថយការកកស្ទះចរាចរណ៍ពីក្នុងតំបន់ទីប្រជុំជនផងដែរ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
