ប្រធានមន្ទីរសុខាភិបាលខេត្តសៀមរាប បានជំរុញ និងលើកទឹកចិត្ដដល់ក្រុមគ្រូពេទ្យឲ្យទទួលបានការបណ្ដុះបណ្ដាលក្រមសីលធម៌ វិជ្ជាជីវៈដល់គិលានុបដ្ឋាក ដើម្បីពង្រឹងសមត្ថភាពនៃការថែទាំដល់អ្នកជំងឺប្រកបដោយគុណភាព សមភាព និងប្រសិទ្ធភាពខ្ពស់ ដែលធ្វើឱ្យទទួលបានការពេញចិត្ដពីអ្នកជំងឺ។
ក្នុងពិធីបណ្តុះបណ្តាលអំពីក្រមសីលធម៌គិលានុបដ្ឋាកកម្ពុជា នៅមន្ទីរពេទ្យបង្អែកខេត្ដសៀមរាប កាលពីរសៀលថ្ងៃទី៣០ ខែមករា ឆ្នាំ២០២៤នេះ លោកវេជ្ជបណ្ឌិត ក្រុស សារ៉ាត់ ទីប្រឹក្សាក្រសួង និងជាប្រធានមន្ទីរសុខាភិបាលខេត្ត មានប្រសាសន៍ថា គិលានុបដ្ឋាកនៅក្នុងមន្ទីរពេទ្យបង្អែកខេត្តសៀមរាប នាពេលបច្ចុប្បន្ន បានធ្វើការយ៉ាងសកម្មក្នុងការថែទាំអ្នកជំងឺ ដែលត្រូវមានវគ្គបណ្តុះបណ្តាលឱ្យបានគ្រប់គ្នា ដើម្បីពង្រឹងសម្ថភាពក្រមសីលធម៌ វិជ្ជាជីវៈថែទាំ នៃការថែទាំ ប្រកបទៅដោយ គុណភាព ប្រសិទ្ធភាព សុវត្ថិភាព និងសមភាព ដើម្បីទទួលបានត្រលប់មកវិញនូវការពេញចិត្តពីសំណាក់អ្នកជំងឺ ក៏ដូចជាអតិថិជន ដែលបានប្រើប្រាស់សេវាសុខាភិបាលនៅក្នុងអង្គភាពរបស់យើង។
លោវេជ្ជបណ្ឌិតបន្ដថា គិលានុបដ្ឋាក គឺជាអ្នកនៅជិតស្និទ្ធស្នាលបំផុតជាមួយអ្នកជំងឺ ទាំងការថែទាំព្យាបាល និងការផ្តល់ប្រឹក្សាជាប្រចាំ។លោក បានក្រើនរំលឹកដល់គិលានុបដ្ឋាក-យិការទាំងអស់ ដែលមិនទាន់បានចុះបញ្ជីកាក៏ដូចជាអ្នកដែលបានចុះបញ្ជីកាហើយ អស់សពុលភាព ត្រូវចុះបញ្ជីកានិង បន្តសុពលភាព ដើម្បីបំពេញភាពស្របច្បាប់ក្នុងការអនុវត្ត វិជ្ជាជីវៈថែទាំរបស់ខ្លួន។
លោក អ៊ុន សាន ប្រធានក្រុមប្រឹក្សាគណៈគិលានុបដ្ឋាកជាតិ មានប្រសាសន៍ថា ការបណ្ដុះបណ្ដាលគិលានុបដ្ឋាក ក្នុងទិសដៅបន្តការបង្កើត និងថែទាំស្តង់ដារថែទាំប្រកបដោយវិជ្ជាជីវៈ ការពារសុវត្ថិភាពសាធារណៈ និងដើម្បីកសាងសមត្ថភាពរបស់ក្រុមប្រឹក្សាឲ្យទទួលបានគិលានុបដ្ឋាកទាំងបរិមាណ និងគុណភាព និងពង្រឹងកិច្ចសហប្រតិបត្តិការជាតិ និងអន្តរជាតិដើម្បីចែករំលែកចំណេះដឹង និងបទពិសោធន៍របស់គណៈគិលានុបដ្ឋាកកម្ពុជា (គ.គិ.ក)។ លោកថា តួនាទីរបស់គណៈគិលានុបដ្ឋាកកម្ពុជា (គ.គិ.ក) គឺមិនមែនស្វែងរកកំហុសឆ្គងដើម្បីផ្តន្ទាទោសបុគ្គលនោះទេ ជាជាងឃ្លាំមើលការប្រព្រឹត្តទៅនៃបណ្តាគោលការណ៍សីលធ៌ម ភាពសុច្ចរិត យុត្តិធ៌ម និងភក្តីភាពដែលចាំបាច់ក្នុងការប្រកបវិជ្ជាជីវៈឲ្យបានគង់វង្ស និងមានប្រសិទ្ធិភាព។
សូមបញ្ជាក់ថា គិលានុបដ្ឋាក គឺជាកម្លាំងពលកម្មធំជាងគេដែលមានចំនួន ៦០% នៅក្នុងប្រព័ន្ធសុខាភិបាលកម្ពុជា ហើយក៏ជាកម្លាំងចលកររបស់ក្រសួងសុខាភិបាល ដែលជាអ្នកជំរុញឱ្យមានប្រសិទ្ធភាពប្រសិទ្ធផល ក្នុងការផ្ដល់សេវាថែទាំប្រកបដោយគុណភាព និងលើកកម្ពស់សុខភាពអ្នកជំងឺនិងប្រជាពលរដ្ឋ។ ដូចនេះគិលានុបដ្ឋាកទាំងអស់ ត្រូវការបង្កើនសមត្ថភាពទាំងចំណេះដឹង ជំនាញ និងឥរិយាបទ ដើម្បីផ្ដល់សេវាថែទាំដែលមានគុណភាព និងសុវត្ថិភាពដល់អ្នកជំងឺ និងពង្រឹងការលើកម្ពស់សុខមាលភាពជូនប្រជាពលរដ្ឋ ស្របតាមគោលនយោបាយជាតិកាត់បន្ថយបាតុភាពអវិជ្ជាមាននានា ដែលបណ្ដាលមកពីការមិនបានគោរពនូវគោលការណ៍ និងក្រមសីលធម៌វិជ្ជាជីវៈ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
