ក្នុងកិច្ចពិភាក្សារវាង លោក យុន លីនណេ អភិបាលរងខេត្តសៀមរាប និងលោក ថេន សំវិសុទ្ធ អគ្គនាយកប្រៃសណីយ៍កម្ពុជា នៃក្រសួងប្រៃសណីយ៍ និងទូរគមនាគមន៍ នៅថ្ងៃទី៣១ ខែមករា ឆ្នាំ២០២៣ បានបង្ហាញនូវការគាំទ្រគ្នាទៅវិញទៅមក ក្នុងការស្នើដាក់ឱ្យមានសេវាបញ្ញើឯកសារ ពីអង្គភាពច្រកចេញចូលតែមួយ ទៅកាន់ប្រជាពលរដ្ឋ ដែលសម្រួលដល់ការចំណាយ និងចំណេញពេលវេលា ក្នុងការមកយកឯកសារ។
លោក ថេន សំវិសុទ្ធ បង្ហាញថា ប្រៃសណីយ៍កម្ពុជា ជាសហគ្រាសស្វយ័តរបស់រដ្ឋ ដែលបង្កើតឡើងតាំងពីឆ្នាំ២០១១។ លោក ទទួលស្គាល់ថា កន្លងមក ការផ្ដល់សេវារបស់សហគ្រាសមួយនេះ នៅមានភាពយឺតយ៉ាវនៅឡើយ ប៉ុន្តែស្ថិតក្នងយុគសម័យឧស្សាហកម្ម ៤.០ និងបរិយាកាសអាជីវកម្មប្រកួតប្រជែង ប្រៃសណីយ៍កម្ពុជា បានធ្វើទំនើបកម្មខ្លួន ទៅជាសហគ្រាសរបស់រដ្ឋ ដែលផ្ដល់សេវាលឿនរហ័ស និងឈានមុខគេមួយ ទាំងក្នុង និងក្រៅប្រទេស។
ព័ត៌មានជាតិ ថ្មីៗ
លោក ថេន សំវិសុទ្ធ បញ្ជាក់ថា ប្រៃសណីយ៍កម្ពុជា ផ្ដល់សេវាកម្មបញ្ញើគ្រប់ប្រភេទ កម្រិតស្ដង់ដាអន្តរជាតិ និងមានដៃគូជិត២០០ប្រទេស។ សម្រាប់ខេត្តសៀមរាប សំណើសុំដាក់សេវាបញ្ញើឯកសារ នៅអង្គភាពច្រកចេញចូលតែមួយនៅពេលនេះ មានគោលបំណង ផ្សព្វផ្សាយដល់ប្រជាពលរដ្ឋ ឱ្យងាកមកប្រើប្រាស់សេវាកម្មរបស់រដ្ឋ ដែលប្រកបដោយទំនុកចិត្ត ជាមួយនឹងតម្លៃសមរម្យ លឿនរហ័ស និងការទទួលខុសត្រូវខ្ពស់។
ក្នុងកិច្ចពិភាក្សានេះ លោក យុន លីនណេ បានថ្លែងកោតសរសើរដល់ប្រៃសណីយ៍កម្ពុជា ដែលបានខិតខំអភិវឌ្ឍន៍ខ្លួន ក្លាយជាសហគ្រាសរបស់រដ្ឋ ដែលឈានមុខលើសេវាកម្មបញ្ញើ និងដឹកជញ្ជូនទាំងក្នុង និងក្រៅប្រទេស។ ចំពោះសំណើ នៅក្នុងកិច្ចពិភាក្សានេះ លោកនឹងដាក់ជូនឯកឧត្តម ប្រាក់ សោភ័ណ អភិបាលខេត្តសៀមរាប ដើម្បីពិនិត្យសម្រេច នៅជំហានបន្ត។
អត្ថបទ និងរូបភាព៖ លោក ស៊ុំ គីន
កែសម្រួល៖ លោក សេង ផល្លី
