នាថ្ងៃទី៣១ ខែមករា ឆ្នាំ២០២៤ ឯកអគ្គរដ្ឋទូត នៃសហភាពអឺរ៉ុប ឯកអគ្គរដ្ឋទូត នៃប្រទេសអាល្លឺម៉ង់ និងអាជ្ញាធរខេត្តសៀមរាប បានធ្វើទស្សនកិច្ចទៅកាន់តំបន់បម្រុងជីវចម្រុះបឹងទន្លេសាប ក្នុងភូមិសាស្ត្រខេត្តសៀមរាប និងខេត្តបាត់ដំបង ដើម្បីចូលរួមអភិរក្សជីវៈចម្រុះ សំដៅលើកកម្ពស់ការអនុវត្តប្រកបដោយនិរន្តរភាព និងការគាំទ្រសហគមន៍មូលដ្ឋានក្នុងប្រទេសកម្ពុជា។
ឯកឧត្តម Igor Driesmans ឯកអគ្គរដ្ឋទូតសហភាពអឺរ៉ុប លើកឡើងថា បេសកកម្មនៅបឹងទន្លេសាបនាពេលនេះ ជាសក្ខីភាពមួយចំពោះការចូលរួមយ៉ាងសកម្មរបស់សហភាពអឺរ៉ុប ក្នុងការប្តេជ្ញាចិត្តរួមគ្នា បន្តជួយជ្រោមជ្រែងប្រទេសកម្ពុជា លើកិច្ចការងារអភិរក្សបរិស្ថាន និងជីវៈចម្រុះនៅបឹងទន្លេសាប ក្នុងបរិបទ នៃការបម្រែបម្រួលអាកាសធាតុជាសាកល។ បន្ថែមលើនេះ ក៏មានការចូលរួមពីអង្គការក្រៅរដ្ឋាភិបាល និងអង្គការសង្គមស៊ីវិល ដែលជាអ្នកអនុវត្តន៍គម្រោងផ្សេងៗ របស់រដ្ឋសមាជិក និងរដ្ឋាភិបាលកម្ពុជា តាមរយៈសកម្មភាពរួមរបស់សហភាពអ៉ឺរ៉ុប ដើម្បីធានាដល់ប្រព័ន្ធអេកូឡូស៊ី សហគមន៍ និងជីវចម្រុះដែលធន់នឹងការប្រែប្រួលបរិស្ថានយ៉ាងឆាប់រហ័សនៅក្នុងតំបន់បម្រុងជីវៈមណ្ឌលបឹងទន្លេសាប។
ឯកឧត្តម Igor Driesmans បន្តថា ប្រសិនបើកម្ពុជាមានធម្មជាតិ និងបរិស្ថានស្រស់ស្អាត នោះវានឹងអាចទាក់ទាញភ្ញៀវទេសចរនានា ឱ្យមកកម្សាន្តនៅកម្ពុជាបានកាន់តែច្រើន។ មួយវិញទៀត អេកូទេសចរណ៍ធម្មជាតិ បានដើរតួនាទីយ៉ាងសំខាន់ ក្នុងការជួយលើកស្ទួយជីវភាពរបស់ប្រជាពលរដ្ឋក្នុងតំបន់ តាមរយៈការបម្រើសេវាកម្មផ្សេងៗ។ សក្តានុពលប្រព័ន្ធអេកូទេសចរណ៍ពិតជាមានសារៈសំខាន់យ៉ាងខ្លាំង ក៏ប៉ុន្តែទាមទារឱ្យមានការចូលរួមយ៉ាងសកម្មបន្ថែមទៀតពីគ្រប់ភាគីពាក់ព័ន្ធផងដែរ។
ជាមួយគ្នានេះ ឯកឧត្តម Stefan Messerer ឯកអគ្គរដ្ឋទូតអាល្លឺម៉ង់ ក៏បានលើកឡើងផងដែរថា តាមរយៈមូលនិធិជាច្រើនរបស់អាឡឺម៉ង់ បានរួមចំណែកបង្កើតប្រាក់ចំណូល ទៅដល់សហគមន៍មូលដ្ឋានដូចជា តំបន់រ៉ាមសារ ព្រែកទាល់ និងស្ទឹងត្រែង គុណប្រយោជន៍ទាំងនេះក៏ទទួលបានពីការការពារជីវចម្រុះ និងប្រព័ន្ធអេកូឡូស៊ីតាមដងទន្លេមេគង្គផងដែរ។ គម្រោងកិច្ចសហប្រតិបត្តិការទឹកឆ្លងដែនទាំងអស់ ទទួលបានការគាំទ្រដោយគណៈកម្មការទន្លេមេគង្គ (MRC) ហើយគម្រោងនេះ ក៏បានគាំទ្រនៅក្នុងប្រទេសថៃ និងឡាវ សម្រាប់ការគ្រប់គ្រងគ្រោះរាំងស្ងួតឱ្យកាន់តែប្រសើរឡើង ព្រមទាំងធាតុផ្សំ សម្រាប់តាមដានការបំពុលប្លាស្ទិកនៅក្នុងអាងទន្លេមេគង្គក្រោមផងដែរ។
អត្ថបទ និងរូបភាព៖ លោក ជា ស្រស់
កែសម្រួល៖ លោក សេង ផល្លី
